Okukala Omukwa-Kilisitu Tyipunguhuna-tyi? — Oityi Ombimbiliya Ipopia?

Hono kuna ovanthu ovanyingi velipaka-ko veliti ovakwa-Kilisitu, ya ovo yatyo valinga ovipuka viehekahi nawa, vietela vakwavo ovitateka. Vamwe valinga vala evi mwene vahanda, ononkhembi, vetupu okankhenda. Ava ovakwavo vaenda konyima ava velinepa navo. Evi valinga vitwala ovanthu vamwe kokulipula okuti: ‘Mwene-mwene tyitiwa okukala omukwa-Kilisitu oityi?’

Okukala omukwa-Kilisitu mwene-mwene tyipunguhuna-tyi?

Omunthu okuliti ndyimukwa-Kilisitu tyipepuka. Mahi otyo katyituuka. Ngeetyi Ombimbiliya ipopia, omukwa-Kilisitu, omulongwa wa Sesusi Kilisitu. (Ovilinga 11:26) Sesusi wati: “Ine mukala mondaka yange amwahatundu, opo muvalongwa vange umwe tyili.” (Swau 8:31) Tyili, petupu omunthu utyivila okulinga atyiho Sesusi apopia. Mahi omukwa-Kilisitu ulikwatesila alinge etyi Sesusi alongesa, tupu ulikwatehila umwe ononthiki ambuho alekese umwe okuti uhole evi Sesusi alongesa. Tutalei-po vala vimwe apa.

Omukwa-Kilisitu Uhole Vakwavo

Oityi Sesusi apopile: “Ame ndyimupa otyitumino otyipe, lilingei olwembia na vakwenyi, ngeetyi ame nemulinga olwembia, noonwe lilingei olwembia na vakwenyi. Ovanthu aveho mavetyimono vala okuti muvalongwa vange — tyina mulilinga olwembia na vakwenyi.” — Swau 13:34, 35.

Oityi Sesusi alingile: Sesusi ankho uhole ovanthu vatyo aveho, tyilinge ava vena-tyo tyilinge ava vehena-tyo. Wahakulile vokwavela, wapele okulia vokwaliwa nondyala, waavele umwe nomwenyo wae ayovole vakwavo. — Mateusi 14:14-21; 20:28.

Ovakwa-Kilisitu oityi valinga: Ovakwa-Kilisitu vehole vakwavo, vena otyali, vetupu okapungulula, velievela. Vakwatesako ava vena etyi vesuka natyo, tupu vapeselela-po umwe viavo vakwateseko vakwavo. — 1 Swau 3:16.

Ovakwa-Kilisitu kavakembe

Oityi Sesusi apopile: “Ame . . . ame tyili.” — Swau 14:6.

Oityi Sesusi alingile: Sesusi movipuka aviho ankho alinga neevi apopia, uyumbwa onthumbi. Petupu onthiki naike Sesusi akembele vakwavo, aa hamwe okupopia onondaka mbokuyondya. Ovanthu ankho vemwii okuti upopia otyili, naapa umwe ankho tyimwetela. — Mateusi 22:16; 26:63-67.

Ovakwa-Kilisitu oityi valinga: Ovakwa-Kilisitu kavakembe. Vana vafeta omalilimu, kavavake, no povilinga umwe onoola vatiwa ombo umwe vena okuundapa, ombo umwe vaundapa. (Ova Loma 13:5-7; Ova Efesu 4:28) Kavavake vakwavo, ovakwatyili, kavakembe pomikanda tyopala okunyingila povilinga vimwe. — Ova Hembeleu 13:18.

Ovakwa-Kilisitu vena okankhenda

Oityi Sesusi apopile: “Endywei no kwaame, endywei amuho onwe vokwepwila, vokuli nokututumba nomitengi, ame ndyimupepulule. Lipandekei okanga yange, amulilongesila kwaame, ame ndyindalawa, napepuka omutima, endywei mupululukwe. Okanga yange yapepuka, omutengi wange kawalemene.” — Mateusi 11:28-30.

Oityi Sesusi alingile: Sesusi ankho omunthu wovanthu, una okankhenda. Ankho uyakula nawa ovana, upameka vokweihamenwa, ovanthu ankho uvelinga onthilo. — Maluku 10:13-15; Luka 9:11.

Ovakwa-Kilisitu oityi valinga: Ovakwa-Kilisitu tyina vapopia na vakwavo, vapopia nokankhenda, vetupu ononthumba-ungo. (Ova Efesu 4:29, 31, 32) Vesuka na vakwavo, velikwatehila umwe vakwateseko vakwavo. — Ova Ngalasiya 6:10.

Ovakwa-Kilisitu kavaende konyima ava velinepa navo

Oityi Sesusi apopile: “Etyi Huku apandeka kokanga ike, omunthu ehetyipandulule.” — Maluku 10:9.

Oityi Sesusi alingile: Namphila Sesusi ankho ahanepele, wapele ondundo vokwelinepa veheliende konyima. (Mateusi 19:9) Wevelondolele valunguke kokulinga ovipuka vivetwala kokutyopola otyinepo tyavo. — Mateusi 5:28.

Ovakwa-Kilisitu oityi valinga: Ovakwa-Kilisitu velityilika okulinga ovipuka vityopola otyinepo tyavo. (Ova Hembeleu 13:4) Vokwelinepa velitekula nolwembia nonthilo. — Ova Efesu 5:28, 33.