Ononkhalamutwe Mbonombangi Mba Siovaa Ovalie?

Ononkhalamutwe mbonombangi mba Siovaa, otyikundyi tyimwe tyina vala ovanthu vehehi, vakalela komutwe Onombangi mba Siovaa mouye auho. Motyilinga tyavo mwakutikinya ovipuka vivali:

• Okululika, nokupongiya okulia kwopaspilitu tuvasa momikanda vietu nomaliongiyo etu nomo nosikola Mbouhamba. — Luka 12:42.

• Vakalela komutwe ovilinga vyo Nombangi mba Siovaa vilingwa mouye auho. Movilinga ovio mwakutikinya okululika ovilinga viokwivisa nokutala nawa ine onombongo ovanthu vaava mbuli umwe nokuundapeswa nawa.

Ononkhalamutwe mbo Nombangi mba Siovaa valinga vala ngeetyi ankho tyilinga ‘ono apositolu novakulu vo mo Selusalei.’ Ovanthu ovo tyina valinga ovipuka vevilinga pala ewaneno aliho Liovakilisitau. (Ovilinga 15:2) Ngeetyi tyalingile ovakulu ovo vokohale ovakwatyili, tupu nononkhalamutwe Mbonombangi mba Siovaa havoko ovahekulu vovilinga vilinga meongano lya Siovaa. Ovo Vaendela mweetyi tyipopia ondaka ya Huku Ombimbiliya, vetyii okuti Siovaa Huku watuma Sesusi opo akale omutwe wewaneno. — 1 Ova Kolindu 11:3; Ova Efesu 5:23.

Omanyina Ononkhalamutwe Mbonombangi Mba Siovaa

Ononkhalamutwe Mbonombangi Mba Siovaa ovava: David Splane, Gage Fleegle, Geoffrey Jackson, Gerrit Lösch, Jacob Rumph, Jeffrey Winder, Jody Jedele, Kenneth Cook Jr., Mark Sanderson, Samuel Herd e Stephen Lett. Ovakulu ovo vaundapa kombala Yonombangi mba Siovaa ouye auho ikala ko Warwick, Nova York, Estados Unidos.

Oñgeni Vaonganekwa?

Ononkhalamutwe Mbonombangi Mba Siovaa Vaonganeka ono komisau epandu mbululika ovilinga vilingwa mouye auho. Ovanthu vamwe kaveli vala mokomisau ike, veli mononyingi.

• Okomisau Yononkhalamutwe: Vokuundapa mokomisau oyo vena otyilinga tyokupopia nonombonge, Tupu vahongolela ovilinga viokukwatesako ovakwatate ouye auho tyina pamoneka ovihuna, na tyina vamoneswa ononkhumbi no novanthu vokuyele Onombangi mba Siovaa.

• Okomisau Yovanthu: Okomisau oyo, ina otyilinga tyokukwatesako ovanthu vokuundapa mono Mbetele ouye auho.

• Okomisau Yomikanda: Vana vaundapa mo komisau oyo, ovo vahongolela ovilinga viokulinga omikanda nokuvitumikisa mouye auho, novilinga viokutunga Onondywo Mbouhamba, nonondywo mbokupitiyila omikanda vietu. Tupu vahongolela ovilinga vilingwa monondywo muundapela Onombangi mba Siovaa.

• Okomisau Yovilinga: Vana vaundapa mo komisau oyo valulika ovilinga viokwivisa, “onondaka onongwa Mbouhamba wa Huku.” — Mateusi 24:14.

• Okomisau Yokulongesa: Okomisau oyo ilulika ovilinga viokupongiya okulia kwopaspilitu tuvasa momikanda vietu nomaliongiyo etu nomo nosikola Mbouhamba. Tupu ihongolela otyilinga tyokungalavala omikanda no novidiu.

• Okomisau Yokuhoneka: Ovakwatate vokomisau oyo, vahongolela otyilinga tyokupongiya omikanda. Tupu yonganeka o site yeongano nokuhongolela ovilinga viokupitiya vilingwa mouye auho.

Tyehe ovilinga vilingwa mono komisau twapopia apa, tupu Ononkhalamutwe Mbonombangi mba Siovaa veliongiya nonosimanu ambuho opo vatale evi viesukisa okulingwa meongano lya Siovaa. Tyina veliongiya vatala mo Mbimbiliya etyi mavalingi, avalandula umwe nawa oku ononkhono mba Huku mbuvehongolela. Tyina valinga omaliongiyo avo vahanda umwe vala okukala nolusoke lwike avehelinane. — Ovilinga 15:25.

Ovalie Vakwatesako Ononkhalamutwe Mbonombangi mba Siovaa?

Ovakilisitau vayumbwa onthumbi vakwatesako ono Komisau mbononkhalamutwe Mbonombangi mba Siovaa. (1 Ova Kolindu 4:2) Ovakulu ovo ovanongo vetyivila okululika nawa ovilinga vilingwa monokomisau vaundapa. Onosimanu ambuho valinga omaliongiyo amwe ovakulu vokululika ovilinga mono Mbetele. Mahi ovakulu ovo, havoko vapopia evi vina okulingwa, ngwe vapopia vala etyi vasoka tyapwa. Tyina valinga etyi vasoka vetyitala ine tyili umwe nokweenda nawa. Navo pamwe vatumwa no Nonkhalamutwe Mbonombangi mba Siovaa, okukatalela-po ovakwatate vetu vakala movilongo ovikwavo. Vehole okukalinga omalongomona momaliongiyo omanene no monosikola mbo Sileade.