Ombupi “Onosapi Mbouhamba”?

Ekumbululo Liombimbiliya

“Onosapi Mbouhamba” mbupopia omunthu wapewa otyilinga tyokuyeka vakuavo ‘vanyingile Mouhamba wa Huku.’ (Mateusi 16:19; Ovilinga 14:22)a “Onosapi Mbouhamba wo keulu” Sesusi wembuavela Petulu. Oityi otyo tyihangununa? Tyihangununa okuti Petulu, oe ankho wapewa otyilinga tyokupopila ovanthu okuti, vana vehole Huku, ankho vapondola okunyingila Mouhamba wo keulu ine vatambula ononkhono mba Huku.

Ovalie Petulu aikulila ondyila yokunyingila Mouhamba?

Petulu waikulile ondyila yokunyingila Mouhamba wo keulu ovikundyi vitatu:

1. Ova Sundeu, novanthu ankho vetavela ovitumino viova Sundeu. Konyima yetyi Sesusi apita keulu, apositolu Petulu walongesile ovanthu vamwe ankho vetavela-le ovitumino vya Huku. Evepopila vayumbe-ko onthumbi yokuti Huku pahe ankho waholovona Sesusi akale ohamba Youhamba wa Huku. Tupu evepopila etyi ankho vena okulinga opo vayovolwe. Mokualongesa ngotyo, Petulu waikulile ondyila opo ovanthu ovo vanyingile Mouhamba wa Huku. Iya Ombimbiliya ipopia okuti ovanyingi puvo ‘avetavela ondaka yae.’ — Ovilinga 2:38-41.

2. Ova Samaliya. Konyima, Petulu atumwa okukaikulila ondyila ova Samaliya.b Etyi vehika oko na apositolu Suau, avelikuambela opo ova Samaliya “vatambule ononkhono mba Huku.” (Ovilinga 8:14-17) Pahe ankho ondyila yova Samaliya yokunyingila Mouhamba ankho yaikulwa.

3. Ovanthu vehe va Sundeu. Etyi palamba omanima etatu etyi Sesusi ankhia, Huku wapopilile Petulu okuti ovanthu vana vehe va Sundeu, navo ankho vapondola okunyingila Mouhamba. Etyi apopilwa ngotyo, Petulu akalongesa ovanthu ovo ondaka ya Huku. Mokualinga ngotyo, Petulu weveikulila ondyila opo vatambule ononkhono mba Huku, avakala Ovakilisitau. Okutuka opo pahe ankho vapondola okunyingila Mouhamba. — Ovilinga 10:30-35, 44, 45.

Oityi okunyingila Mouhamba?

Vana vanyingila Mouhamba, opala vakatumine na Sesusi keulu. Ombimbiliya ipopia okuti ovanthu ovo, ‘mavakapumphama kovipundi vioutumini’ ‘avakala onohamba avatumina kombanda yohi.’ — Luka 22:29, 30; Eholololo 5:9, 10.

Omalusoke apenga ovanthu vena konthele yonosapi Mbouhamba

Omatutu: Petulu ankho wikulila ovanthu ondyila tyina ahanda; Huku na Sesusi ankho vetei vala kwe.

Otyili: Etyi Sesusi aavela Petulu onosapi Mbouhamba, wemupopila okuti: “Atyiho wiika pano pohi, no keulu tyaikwa iya etyi wiikula pano pohi no keulu tyaikulwa.” (Mateusi 16:19) Onondaka ombo, ovanthu vamwe vembunoñgonoka okuti etyi Petulu ankho amapopi, otyo tyina okulingwa keulu. Mahi ondaka yo Geleku Sesusi apopila Petulu, ihangununa okuti Petulu oe ankho una okutavela etyi tyapopiwa keulu, haeko ankho una okupopia, vo keulu avetyitavela.c

Ononthele ononkhuavo mbo Mbimbiliya, nambo mbupopia umwe nawa okuti Petulu ankho utei keulu vapopie onalupi ena okuikulila ondyila ovanthu vanyingile Mouhamba. Mongeleka, etyi akaikulila ondyila ovanthu vehe va Sundeu, o Huku wemutumine-ko. — Ovilinga 10:19, 20.