OMAPULO OVAKUENDYE NOVAHIKUENA VELILINGA
Oityi Tuesukisila Okulikuambela?
Ko Estados Unidos vapula ovakuendye vamwe novahikuena vamwe ine velikuambela. Vamwe vapopia okuti vehole umwe okulikuambela mahi o pamwe-pamwe vala. Mahi mokutala vamwe puvo vehole okulipula okuti: ‘Okuti ñgaa okulikuambela pena umwe etyi tyilinga, ine okupeselela-po vala omuvo?’
Okulikuambela oityi?
Tyina tulikuambela tuli nokutomphola na Huku, wokuatunga ovipuka aviho. Siovaa omukulu vali kovanthu vatyo aveho, mahi no ngotyo ‘kekahi kokule na kese umwe pu onthue.’ (Ovilinga 17:27) Otyo Ombimbiliya yatila: “Fuenei ku Huku, nae mafuene ku onwe.” — Tiaku 4:8.
Mahi oñgeni mofuene ku Huku?
Tyina ulikuambela, ngotyo uli nokupopia na Huku.
Tyina utanga Ombimbiliya, ngotyo o Huku uli nokupopia no ove.
Ine ulinga ovipuka ovio vivali, okulikuambela, nokutanga Ombimbiliya, molingi epanga enene lya Huku.
“Okutomphola na Siovaa, omunene wouye auho, otyipuka otyiwa vali onthwe vanthu tupondola okukala natyo.” — Jeremias.
“Tyina ndyipopila Siovaa atyiho tyili momutima wange ngoti ndyikala vali popepi nae.” — Miranda.
Huku ñgaa utehelela umwe omalikuambelo?
Hamwe uhole okulikuambela mokonda utavela okuti kouye kuna Huku, mahi hamwe utupu nawa onthumbi yokuti tyina ulikuambela Huku ukutehelela umwe. Ombimbiliya ipopia okuti Siovaa “utehelela omalikuambelo.” (Salmo 65:2) Atee umwe yati: ‘Pakulei otyiho tyenyi atyiho kwe, mokonda ngwe wesuka no onwe.’ — 1 Petulu 5:7.
Nkhele soka: Apeho wovola omapanga ove mutomphole, ine hatyo? Tupu ovola okutomphola na Siovaa. Ombimbiliya yati: “Tualeiko okulikuambela.” (1 Ova Tesalonika 5:17) Naina likuambela apeho ku Siovaa, otumbula umwe enyina liae. — Salmo 86:5-7; 88:9.
“Tyina ndyilikuambela ndyipopia umwe atyiho mokonda ndyityii okuti ndyili nokutomphola na Tate.” — Moisés
“Ame Siovaa ndyimupopila umwe ovipuka viange aviho ngetyi ndyipopila mee nomapanga ange.” — Karen.
Oityi mandyipopi tyina ndyilikuambela?
Ombimbiliya yati: “Mu kese tyipuka likuambelei, amulivondela ku Huku kumwe nokupandula, amunoñgonokesa Huku etyi muiita.” — Ova Filipu 4:6.
Oityi onondaka ombo mbahanda okupopia? Mbahanda okuti tyina ulikuambela upondola okupopila Siovaa ovitateka viove aviho. Otyo Ombimbiliya yatila: “Pakula omulemo wove ku Siovaa, ngwe mekukuatesako. Kamayeke omunthu wokulinga oviwa atoke.” — Salmo 55:22.
Tyina uti pokulikuambela kupondola vala okupopia ovitateka viove. Omuhikuena umwe utiwa Chantelle wati: “Ine tyina ndyilikuambela ku Siovaa ndyipopia umwe vala ovitateka viange opo katumapangako-ale. Nkhele tete ndyina okumupandula, otyo ngwe ndyina ovipuka ovinyingi ndyipondola okumupandula.”
Nkhele soka: Ovipuka patyi uhole unene uhanda okupandula Siovaa? Soka kovipuka vitatu Siovaa ekulingila hono omupandula.
“Nokutala umwe vala onthemo yehiwa nawa tyitwavela okulikuambela tupandule Siovaa.” — Anita.
“Soka kotyipuka tyimwe uhole Siovaa atunga oo kotesitu imwe uhole unene omupandula.” — Brian.