Oviimbo 46:10 — “Lifefei Kwaame, Amunoñgonoka Okuti Ame Huku”

“Lifefei kwaame, amunoñgonoka okuti ame Huku. Ame mandyihilivikwa pokati kovanthu vovilongo. Andyinkhimanekwa kombanda yohi.” — Oviimbo 46:10, Ombimbiliya Ikola Yaava Ekevelelo Liouye Omupe.

“Muti filuu, amunoñgonoka okuti ame Huku. Ame mandyihilivikwa pokati kovanthu vovilongo. Andyinkhimanekwa kombanda yohi.” — Oviimbo 46:10, Ombimbiliya imwe itiwa Versão Rei Jaime.

Etyi Tyihangununa Oviimbo 46:10

Huku ukahi nokupopila ovanthu aveho vemufenda vanoñgonoke okuti oe vala watamo mokutumina ohi. Ovanthu vahanda okukakala nomwenyo wahapu, vena okunoñgonoka omunkhima wae nounene wae. — Eholololo 4:11.

“Lifefei kwaame, amunoñgonoka okuti ame Huku.” On’Ombimbiliya mbumwe ponondaka mbuhimbika ovelesikulu oyo, mbapopia-po okuti “muti filuu.” Otyo tyitwala ovanthu ovanyingi okusoka okuti otyo otyitumino tya Huku tyipopia okuti tyina ovanthu veli mokapela kavapondola okuviela, valekese okuti vena onthilo. Mahi ondaka yo Hembeleu yapitiywa okuti, “lifefei kwaame, amunoñgonoka okuti ame Huku,” mwene omu yapopilwa ongatyina Siovaaa ankho ekahi nokuviyula ovanthu vomalongo aeho okuti, yekeipo okunthyitukila-po amunoñgonoka okuti ame vala natamo mokufendwa.

Otyipuka otyo tyelifwa neetyi tyapopiwa momukanda Oviimbo 2. Omu Huku apopia okuti, mahanyeko vana vemutyitukilapo. Mahi vana vanoñgonoka okuti oe watamo mokutumina, vayumba-ko onthumbi yokuti mevehongolela, meveavela ononkhono nounongo. “Aveho vaholama Mwe vahambukwa,” vatula omutima haunene umwe momuvo wovitateka. — Oviimbo 2:9-12.

“Ame mandyihilivikwa pokati kovanthu vovilongo. Andyinkhimanekwa kombanda yohi.” Kohale Siovaa wahilivikilwe etyi ayovolele ovanthu vae nononkhono mbae ononene. (Okutunda 15:1-3) Komutwe wandyila makahivilikwa vali unene tyina ovanthu aveho kombanda yohi maveketavela okutuminwa nae, avekemufenda. — Oviimbo 86:9, 10; Isaiya 2:11.

Etyi tyipopia Oviimbo 46:10

Omukanda umwe wapopia okuti omukanda Oviimbo 46, “otyiimbo tyokuhinangela ononkhono ononene mba Huku, wokuyakulila ovanthu vae.” Tyina ovanthu ankho vaimba otyiimbo tyili m’Oviimbo 46, ankho valekesa okuti vayumba onthumbi mu Siovaa yokuti meveyakulila, nokuvekwatesako. (Oviimbo 46:1, 2) Ankho tyivehinangelesa okuti Siovaa apeho uli ponthele yavo. — Oviimbo 46:7, 11.

Onondaka mbotyiimbo otyo, mbukwatesako ovanthu va Huku okusoka kovipuka vihuvisa Huku atunga, otyo ankho tyikwatesako ovanthu va Huku okuyumba onthumbi mononkhono mbae mbokuveyakulila. (Oviimbo 46:8) Haunene otyiimbo otyo, ankho tyivekwatesako okunoñgonoka okuti Huku utyivila okumanako ovilwa. (Oviimbo 46:9) Kohale Siovaa wamaneneko ovilwa etyi ayakulila ovanthu vae konondyale mbavo. Mahi Ombimbiliya ipopia okuti komutwe wandyila Huku makalinga vali otyinene tyilamba pwotyo, makamanako ovilwa pala apeho. — Isaiya 2:4.

Okuti na hono Siovaa nkhele ukwatesako-ñgo ovanthu vae? Eenga. Otyo apositolu Paulu apopilile Ovakilisitau vayumbe-ko onthumbi yokuti, Siovaa mevekwatesako. (Ova Hembeleu 13:6) Etyi tyipopia omukanda Oviimbo 46, tyiyawisa konthumbi yetu yokuti Siovaa metukwatesako. Itukwatesako okutala Huku ‘ngotyiholamo tyetu.’ — Oviimbo 46:1.

Tala ovindiu ei unoñgonoke etyi tyipopia omukanda Oviimbo.