Ovakoyesi
1 Etyi Susuwee anyima,+ ova Isilayeli* avapulu ku Siovaa okuti:+ “Olie pwoonthwe makatuka tete, akalwisa ova Kanaa?” 2 Siovaa akumbulula okuti: “O vomuhoko wa Sundaa mavaende-ko.+ Mandyipakula* otyilongo otyo pomavoko avo.” 3 Vomuhoko wa Sundaa avapopila vomuhoko wa Simiyau, vana velilandula nae, okuti: “Twendei atuho mohika napewa,*+ tukalwise ova Kanaa. Haa matweende vali atuho mohika ove wapewa.” Vomuhoko wa Simiyau avaende navo.
4 Etyi vomuhoko wa Sundaa vaya-ko, Siovaa apakula ova Kanaa nova Peliseu pomavoko avo,+ avalwisa ovalume 10.000 ko Mbeseke, avatili-ko. 5 Etyi valwisa ova Kanaa+ nova Peliseu,+ avavasi Andoni-Mbeseke ko Mbeseke, ngako vemulwisila. 6 Etyi Andoni-Mbeseke akahomboka, avemutaata, avemukwata, avemutyoko omitundunu* vyo komavoko no vyo konomphai. 7 Andoni-Mbeseke apopi okuti: “Kuna onohamba 70 mbukoya ovinyanya mombwelo yomesa yange, mbatyokwa omitundunu vyo komavoko no vyo konomphai. Huku wankhondolela etyi nevelinga.” Pahe avemutwala ko Selusalei,+ ngako akankhila.
8 Ovalume vo Sundaa tupu avakalwisa o Selusalei,+ aveitambula-ko. Avavange ovanthu vo mepunda-umbo nomutunga, ngwe avelipake otupia. 9 Pahe ovalume vo Sundaa avaende avakalwa nova Kanaa vakala motyilongo tyonomphunda, nomo Nengembe, nomo Sefelaa.+ 10 Vomuhoko wa Sundaa pahe avalwisa ova Kanaa vakala mo Hemboloo (enyina lyo tete lyo Hemboloo o Kiliyate-Alumba), avaipaa Sesai, na Aimaa, na Talumai.*+
11 Etyi vatunda oko, avakalwisa ovanthu vakala mo Ndembile.+ (Enyina lyo tete lyo Ndembile o Kiliyate-Sefele.)+ 12 Pahe Kalembe+ ati: “Omulume wamalwisa o Kiliyate-Sefele, eitambula-ko, mandyimunepesa omona wange Akesa.”+ 13 Otiniyeli+ omona wa Kenasi,+ Kenasi ondenge ya Kalembe, alwisa epunda-umbo, elitambula-ko. Kalembe emunepesa omona wae Akesa. 14 Etyi Akesa ati pokwiilulwa ende keumbo liomulume wae, akuluminya Otiniyeli ngwe nkhele akaite epia ku he. Atuluka kotyimbulu* tyae. Kalembe emupulu ati: “Oityi wahanda?” 15 Akumbulula okuti: “Mbambavo, mphevo otyipuka otyiwa, kombanda* wamphako-ale eheke, mphevo vali ohika yo Ngulote-Maii.”* Kalembe emwavela ohika yo Ngulote yo Kombanda, no Ngulote yo Kombwelo.
16 Vana vokuatuka momu Keneu,+ he-ivi ya Mwisesi,+ avatundu mepunda-umbo liomindende+ novanthu vo Sundaa, avaende koluhandya lwo Sundaa, kombwelo yo Alande.+ Avaende, ngako vakakala kumwe novanthu vo oko.+ 17 Vomuhoko wa Sundaa no vomuhoko wa Simiyau, vana velilandula nae, avaende avalwisa ova Kanaa vakala mo Sefate, aveveipaa.+ Ngootyo epunda-umbo olio aveliluku okuti o Holomaa.*+ 18 Pahe vomuhoko wa Sundaa avatambula-ko o Ngasa+ novilongo viatyo, no Asikeloo+ novilongo viatyo, no Ekoloo+ novilongo viatyo. 19 Siovaa akwatesako vomuhoko wa Sundaa, avatambula-ko otyilongo tyonomphunda, mahi avehetyivili okutaata ovanthu vokukala monthanthalahi* mokonda vena omatemba ovilwa ena onofoso.*+ 20 Avaavela Kalembe o Hemboloo ngeetyi Mwisesi apopile,+ Kalembe ataata-mo ovana vetatu va Anake.+
21 Ova Mbesamii avahataata ova Sembusi vakala mo Selusalei; ova Sembusi avatwalako okukala nova Mbesamii mo Selusalei atee hono.+
22 Pononthiki opo, veumbo lya Susee+ vakalwisile o Mbetele. Siovaa evekwatesako.+ 23 Veumbo lya Susee vekahi nokulava o Mbetele (mahi enyina lyo tete liepunda-umbo litiwa Lusi),+ 24 ovalavi avamono omulume umwe ukahi nokutundilila mepunda-umbo. Avemupopila okuti: “Mbambavo, tupopile oñgeni matunyingila mepunda-umbo, ove matukwevela.”* 25 Omulume evelekesa oñgeni mavanyingila mepunda-umbo, avavange ovanthu vo mepunda-umbo nomutunga, mahi omulume oo nombunga yae aiho aveveyeke.+ 26 Omulume oo aende kotyilongo tyova Hete, atungu-ko epunda-umbo eliluku okuti o Lusi, alikala enyina lialio atee hono.
27 Vomuhoko wa Manasesi kavetyivilile okulwisa o Mbete-Seyaa novilongo viatyo,* no Taanake+ novilongo viatyo, novanthu vokukala mo Ndole novilongo viatyo, novanthu vokukala mo Imbeleyau novilongo viatyo, novanthu vokukala mo Mesitu novilongo viatyo.+ Ova Kanaa avahatundu-mo, avatwalako okukala movilongo ovio. 28 Etyi ova Isilayeli vakala vali tyapama kuvo, avakuluminya ova Kanaa okulinga ovilinga vialema,+ mahi avehevetaata-mo aveho.+
29 Tupu vomuhoko wa Efalaii kavataatele ova Kanaa vakala ko Sesele. Ova Kanaa avatwalako okukala ko Sesele,+ pokati kova Efalaii.
30 Vomuhoko wa Sembulau avahataata vana vakala mo Kiteloo, na vana vakala mo Naaloli.+ Ova Kanaa avatwalako okukala pokati kavo, avakuluminywa okulinga ovilinga vialema.+
31 Vomuhoko wa Asele avahataata vokukala mo Ako, na vana vakala mo Sindone,+ nomo Alambe, nomo Akisimbe,+ nomo Helimba, nomo Afike,+ nomo Leombe.+ 32 Ova Asele avatwalako okukala pokati kova Kanaa vakala motyilongo otyo, mokonda kavevetaatele.
33 Vomuhoko wa Nafitalii avahataata vokukala mo Mbete-Seme, na vana vakala mo Mbete-Anate,+ mahi avatwalako okukala pokati kova Kanaa vakala motyilongo otyo.+ Ovanthu vokukala mo Mbete-Seme nomo Mbete-Anate avahimbika okulingiswa ovilinga vialema.
34 Ova Amoleu avahitikinyina ova Ndaa motyilongo tyonomphunda, aveheveyeke vatuluke vende monthanthalahi.*+ 35 Ova Amoleu vahanda okukala momphunda yo Helesi, ko Aisaloo+ no ko Saalumbii.+ Mahi etyi veumbo lya Susee veliyawisa,* avakala tyapama, ova Amoleu avakuluminywa okulinga ovilinga vialema. 36 Otyilongo tyova Amoleu tyihimbikila kotyilondeka tyo Akilambii+ no ko Sela, atyiende atee kehimba.