Maluku
16 Ngotyo, etyi Otyasapalo tyalamba, Maliya Mandalena na Maliya ina ya Tiaku na Salomee, avalande onombao opo vakawaveke olutu lwa Sesusi. 2 Iya komuhuka-huka monthiki yo tete yosimanu* tyina ekumbi litunda, avaende kelangalo. 3 Ankho vekahi nokulipula okuti: “Olie meketupolela emanya pombundi yelangalo?” 4 Mahi etyi vayumba omaiho kelangalo, avamono okuti emanya ankho liapolwa-po, ngwe ankho enene unene. 5 Etyi vanyingila melangalo, avamono omukuendye umwe wavala omuvalo utuela, upumphi kokulio, iya avahuvu. 6 Evepopila okuti: “Muhatilei owoma. Onwe mukahi nokuovola Sesusi omu Nasalee una wapapelelue momuti. Wapindulua-po. Muno kemo. Talei, apa ankho vemulangekele opapa. 7 Mahi endei kapopilei ovalongwa vae na Petulu okuti: ‘Ukahi nokuenda komutwe wenyi okuenda no ko Galileia, oko mamukemumonena, ngetyi emupopilile.’” 8 Moluotyo etyi valupuka-mo, avatundu-ko nokuhateka otyo vateketa iya ankho vahuva unene. avehetyipopila nawike, mokonda ankho vatila owoma.*