Luka
14 Onthiki imwe, akalia keumbo lionkhalamutwe yova Faliseu Motyasapalo, iya ovanthu aveho veli-mo ankho vekahi nokumutala unene. 2 Iya komutwe wae ankho kuna omulume umwe una ouvela* wemumitisa omavoko novikalo. 3 Pahe Sesusi apulu ovanongo Vovitumino nova Faliseu okuti: “Tyaviuka okuhakula Motyasapalo ine tyapenga?” 4 Mahi avahapopi natyike. Ngotyo, akuate omulume oo emuhakula, emutumu aye. 5 Pahe Sesusi evepulu okuti: “Olie pu onwe inkha omona wae ine ongombe yae itokela metoto Motyasapalo, kahateka liwa-liwa eipolo-mo?” 6 Avehetyivili okukumbulula.
7 Etyi amona okuti vokuakongwa vekahi nokuholovona onomphangu mbukahi vali nawa, evepopila* okuti: 8 “Tyina wamakongua motyipito tyotyinepo, uhapumphame pomphangu ikahi vali nawa. Hamwe pena ou wakongua omunene vali tyipona ove. 9 Pahe una wemukonga eya ekupopila okuti, ‘Katuka-po, omphangu ei oyou.’ Matyikukundisa tyina pahe ukapumphama pomphangu yo konyima. 10 Mahi tyina wamakongua, kapumphame pomphangu yo konyima opo tyina wokuekukonga ameya ekupopila okuti, ‘Panga liange, endyu upumphame apa pekahi vali nawa.’ Ngotyo monkhimana pokati ka aveho vakongwa. 11 Mokonda vana velipaka-ko mavakapakwa pombuelo, iya vana velipaka pombuelo mavakapakwa kounene.”
12 Pahe apopila vali wokuemukonga okuti: “Tyina uteleka okulia kwo komutenya ine ondalelo, uhakonge omapanga ove ine ovakuatate vove ine ombunga yove ine ovahona vakuenyi. Mokonda navo vapondola okukukonga, iya atyikala ngatyina vekukondolela. 13 Mahi tyina ulinga otyipito, konga ovahepi, novilema novamphoki. 14 Iya mokala nehambu, mokonda vetupu natyike mavekuavela. Ove mokapewa ondyambi petutilo liovaviuki.”
15 Etyi umwe po vokuakongwa eiva ovipuka ovio, emupopila okuti: “Omunthu makalia* Mouhamba wa Huku, una ehambu.”
16 Sesusi emupopila okuti: “Omulume umwe wapongiya otyipito otyinene, akongo ovanthu ovanyingi. 17 Atumu omupika wae moola yokulia opo akapopile vokuakongwa okuti: ‘Endyuei, mokonda ovipuka aviho viapia-le.’ 18 Mahi aveho avahimbika okutatesa. Wo tete emupopila okuti: ‘Ame nalanda epia iya nahanda okukelitala. Otyiponyo, kamatyitavela okuya.’ 19 Omukuavo ati: ‘Ame nalanda onongombe ekwi* mbokunana, ndyienda-ko ndyikembutale; otyiponyo, kamatyitavela okuya.’ 20 Nkhele omukuavo ati: ‘Ame himeya mokonda nanepa pehepano.’ 21 Moluotyo, omupika eya okupopila omuhona wae ovipuka ovio. Ngotyo hekulu yeumbo anumana unene, apopila omupika wae okuti: ‘Kanyauka enda momatapalo omanene, no monondyila mbepunda-umbo, kapole ovahepi, novilema, novamphoki.’ 22 Etyi omupika akondoka, apopi okuti: ‘Muhona, etyi watuma tyalingwa, mahi nkhele muna omphangu.’ 23 Moluotyo, omuhona apopila omupika okuti: ‘Enda momatapalo no monondyila vekuluminya veye okunyingila, opo ondyuo yange iyule. 24 Ndyimupopila okuti, povanthu vana ankho vokuakongwa nawike meya okumakela kokulia kuange.’”
25 Iya ankho una ovanthu ovanyingi moungendi wae, apiluluka evepopila okuti: 26 “Inkha omunthu umwe uya ku ame, mahi ahayale* he na ina nomukai wae, nomona wae, nondenge yae, nomphange yae alo umwe omuenyo* wae, kapondola okukala omulongwa wange. 27 Una uhelityindila omuti wae wemone,* andandula, kapondola okukala omulongwa wange. 28 Mongeleka, olie pu onwe tyina ahanda okutunga ondyuo, tete kasoko atale inkha etyi ena-tyo matyituuka okuitunga aipu? 29 Okuhalingi ngotyo, upondola okutunga elisesu mahi ehetyivili okuitunga aipu iya ovanthu aveho veitala avahimbika okumulinga omukuele, 30 avati: ‘Omunthu ou wahimbikile okutunga mahi ehetyivili okuimanuhula.’ 31 Ine, ohamba patyi yenda vala kovilwa, tete aihapakelwa-mo okutala inkha omafualali 10.000 atuuka okukaluisa ohamba ina omafualali 20.000? 32 Ngotyo, inkha utala kametyivili, utuma ovatumwa-ndaka vae vaye-ko avalingi ombembwa tyina nkhele ohamba onkhuavo ikahi kokule. 33 Tyelifwa notyo, no onwe kalei tyityii okuti una uhasi-po* ovipuka viae aviho, kapondola okukala omulongwa wange.
34 “Tyotyili omongwa ukahi nawa. Mahi inkha upwa ononkhono, oityi matyiupepesa vali? 35 Kausilivila vali, nii okuupaka meheke ine okuulinga ombumbi. Ovanthu vekeuuvahi vala. “Olie una omakutwi okutehelela, atehelele.”