Ononkhia mba Jesus Netutilo Liae​—Oityi Vipondola Okukuetela

Ovanthu kavatungilwe opo vankhie

“Jeova Huku wapola omulume emupake motyikunino tyo Endene, opo etyilime, nokutyiyunga. Iya Jeova Huku apopila omulume okuti: ‘Komiti aviho vio motyikunino upondola okulia ngetyi uhanda. Mahi, komuti wenoñgonoko liotyiwa notyivi, wahalieko, mokonda onthiki uliako, tyotyili monkhi.’”​—Gênesis 2:15-17.

Huku wapakele omulume wo tete, Andau, motyikunino tyo Endene, momphangu yombembwa pano pohi, ankho mueyula ovinyama, nomiti viayova nawa. Ankho muna omiti viima, oku Andau ankho apondola okulia ngetyi ahanda. Mahi, Jeova Huku ahangununina nawa Andau opo ahalie komuti wike vala, emulondola okuti inkha uliako, mankhi.

Okuti Andau wanoñgonokele elondolo olio? Andau ankho ononkhia umbwii. Ankho umona ovinyama tyina vinkhia. Inkha Andau ankho watungua opo ankhie, ñgeno ankho Huku kesukisile vali okumulondola. Mahi, Andau ankho utyii okuti inkha wetavelele ku Huku, ahali komuti ailikwa, ñgeno watualako nomuenyo apeho, ahankhi.

Vamwe vetavela okuti omuti vailikilwe, ankho okulinga otyihola. Mahi otyo hatyili-ko, mokonda Jeova wahandele Andau nomukai wae Eva, “velityite, avakala ovanyingi, aveyulisa ohi iya aveitumina.” (Gênesis 1:28) Etyi vailikilwe ankho omuti umwe. Jeova waihana omuti oo okuti “omuti wenoñgonoko liotyiwa notyivi,” mokonda ankho ulekesa okuti oe vala watokala okupopila ovanthu etyi tyaviuka netyi tyapenga. Inkha Andau kalile komuti oo, ñgeno kalekesile vala okuti utavela, tupu ñgeno walekesa okuti wapanda Una wemueta kouye, nokuemuavela oviwa ovinyingi.

Andau wankhia mokonda ketavelele ku Huku

“Iya [Huku] apopila Andau okuti: ‘Mokonda . . . walia komuti nekuilika, . . . opo ulie ombolo, una okupuila moulili ine ometukuta, alo ukondoka keheke, tyetyi oko wapolua. Mokonda ove uheke iya keheke oko mokondoka.’”​—Gênesis 3:17, 19.

Andau walile komuti ailikwa. Otyipuka otyo alinga ankho onkhali onene. Ankho oumphuki, iya tyalekesa okuti watomba ovipuka aviho oviwa Jeova ankho emulingila. Mokualia komuti oo, Andau ankho waanya Jeova, akoyo okulitumina, mahi otyo, ankho matyeta ovitateka ovinene.

Ngetyi Jeova alaele, Andau ankhi. Huku ankho watunga Andau “nonthata,” iya emupopila okuti “makondoka keheke.” Andau kaile komphangu onkhuavo ine o kouye omukuavo. Etyi ankhia, wakala ngeheke apa apolelwe.​—Gênesis 2:7; Eclesiastes 9:5, 10.

Onthue tunkhia mokonda tuatuka ku Andau

“Mokonda yomunthu wike vala onkhali yanyingila mouye, iya onkhali yaeta ononkhia. Moluotyo ononkhia mbeliyandyana kovanthu vatyo aveho, mokonda aveho valinga onkhali.”​—Romanos 5:12.

Onkhali ya Andau​—yaeta—​ovitateka ovinene. Etyi Andau alinga onkhali, kavombesile omuenyo womanima 70 ine 80 vala, mahi wavombesa omuenyo uhapu. Tupu, Andau wavombesa omuenyo uhena onkhali, iya etyi ankho apondola okutambulisa ovana vae aveho, onkhali vala.

Onthue atuho tuvana va Andau. Kwe tuapiñgana-ko onkhali, nolutu luayembela kokulinga onkhali, konyima atunkhi, iya katutyivili okulityilika-vio. Paulu wapopia nawa onkhalelo yetu. Wahoneka okuti: “Ame ndyihitu, nalandeswa konkhali. Ame ndyipongo! Olie mandyovola kolutu lunthuala kononkhia ombu?” Konyima, Paulu elikumbulula okuti: “Ndyipandula Huku, menyina lia Jesus Kristu Tatekulu yetu!”​—Romanos 7:14, 24, 25.

Jesus waava omuenyo wae opo onthue tukale nomuenyo apeho

“He watuma Omona wae opo akale Omuyovoli wouye.”​—1 João 4:14.

Jeova Huku waovola onkhalelo yokutuyovola kovivi viatuka konkhali, no kokunkhia tyihena ekevelo liokututila. Ñgeni? Watumine Omona wae ehole, okumupola keulu eya okutyitwa pano pohi, akala omunthu uhena onkhali ngetyi ankho Andau ali. Mahi, Jesus welikalela na Andau, mokonda “kalingile onkhali.” (1 Pedro 2:22) Mokonda utupu onkhali, ankho kapondola okunkhia mokonda yonkhali ya Andau, ankho upondola okukalako apeho.

Mahi, Jeova wayekele Jesus aipawe no nondyale mbae. Etyi palamba ononthiki ononthatu, Jeova emututilisa, nolutu lwo keulu opo akondoke keulu. Iya keulu, Jesus apakula ku Huku esilivilo liotyilikutila tyomuenyo wae uhena onkhali, opo akondole ovana va Andau komuenyo Andau avombesa. Jeova wetavela otyilikutila otyo, iya aikula ondyila opo vana vena ekolelo mu Jesus vakakale nomuenyo uhapu.​—Romanos 3:23, 24; 1 João 2:2.

Ngotyo, Jesus wakondola-po etyi Andau apesela. Wetunkhila opo tukale nomuenyo apeho. Ombimbiliya yati: “Jesus . . . wamuene ononkhumbi mbokunkhia, opo mokankhenda okanene ka Huku, amakele ononkhia pala ovanthu aveho.”​—Hebreus 2:9.

Eonganeko olio Jeova alinga, lilekesa ovipuka ovinyingi konthele yae. Mokonda youviuki wae omunene, ovanthu ovakuankhali kavetyivili okuliyovola konkhali. Mahi, oluembia lwae, nokankhenda kae, viemulunda okueendela motyitumino muene aavele, iya elipolo otyipuka tyimwe otyinene, okuava Omona wae opo aave ofeto yeyovo.​—Romanos 5:6-8.

Tyotyili, Jesus waliko iya wankhile, mahi oityi tyilekesa okuti watutilisua? Tyimwe povipuka ovinene vilekesa okuti tyotyili Jesus watutilisua, omokonda wamonekelele ovanthu ovanyingi ponomphangu mbelikalaila. Otyikando tyimwe, wamonekelele ovanthu valamba po 500. Apostolu Paulu wetyihoneka momukanda atumine ko va Korintu. Iya, alekesa okuti vamwe povanthu ovo vemumuene ankho nkhele vena omuenyo, pala okulekesa okuti ankho vapondola okupopia etyi vamuene, netyi veivile.—1 Coríntios 15:3-8.

Jesus watutilisua, iya ovanthu ovakuavo tupu mavatutiliswa

“Pahe Kristu watutilisua po vokuankhia. Oe tete kuaveho velele mononkhia. Tyetyi ononkhia mbeya mokonda yomunthu wike, tupu vokuankhia mavakatutila mokonda yomunthu wike. Mokonda, ngetyi mu Andau aveho vankhia, tupu mu Kristu aveho mavakakala nomuenyo.”​—1 Coríntios 15:20-22.

Etyi Paulu ahoneka okuti Kristu “oe tete” pu vana vatutiliswa, ankho ukahi nokulekesa okuti kuna ovanthu ovakuavo ankho mavatutiliswa. Muene Jesus wapopile okuti makuya omuvo “aveho vekahi momalangalo mavekeiva ondaka yae, iya avatundumo.”​—João 5:28, 29.

Opo tukale nomuenyo apeho, tuna okukala nekolelo mu Jesus

“Mokonda Huku una oluembia olunene novanthu, waava Omona wae wongunga, opo kese munthu ukala nekolelo mwe ahakanyimueko, mahi akakale nomuenyo uhapu.”​—João 3:16.

Otestu yo tete Yombimbiliya, itupopila onalupi ononkhia mbahimbika, no ñgeni Omphangu Yombembwa yavombeswa. Otestu yahulililako, itupopila onalupi ononkhia mambukapwa. Tupu itupopila okuti Huku maeta vali Omphangu Yombembwa pano pohi. Ovanthu mavakakala nehambu, nomueyo uhapu. Revelação [Apocalipse] 21:4 yati: “Ononkhia kamambukakala-ko vali.” Pala okulekesa okuti omulao oo tyotyili maufuiswapo, oversikulu 5 yati: “Onondaka ombu ombotyotyili nokuakolela.” Etyi Jeova alaa, upondola okutyilinga.

Ove utavela okuti “onondaka ombu ombotyotyili nokuakolela”? Lilongesa vali konthele ya Jesus Kristu, nokukala nekolelo mwe. Inkha ulinga ngotyo, mopandwa na Jeova. Kumayambwa vala pahetyino, mahi mokamona omuenyo uhapu Momphangu Yombembwa pano pohi, “muhakakala vali ononkhia nokulila, no nongembia.”