Huku Olie?

Nkhele vala tya kohale, ovanthu vafenda onohuku ononyingi. Mahi Ombimbiliya ipopia okuti kuna Huku umwe, “omunene vali kono huku ononkhuavo.” (2 Crônicas 2:5) Iya Huku yatyo oo olie? Omokonda yatyi Ombimbiliya imupopila okuti omunene vali kono huku ononkhuavo? Tala etyi muene Huku yatyo elipopia mo Mbimbiliya.

1. Huku utiwa olie? Oityi tyilekesa okuti uhanda tunoñgonoke enyina liae?

Mo Mbimbiliya, Huku wapopia-mo enyina liae. Wati: “Ame, ame Siovaa. Eli olio enyina liange.” (Tanga Isaías 42:5, 8.) Melaka lyo Hebeleu, enyina “Siovaa”, lipopia okuti “Ukala Etyi Ahanda Okukala.” Siovaa tyili uhanda tunoñgonoke enyina liae. (Êxodo 3:15) Oityi tupopila ngotyo? Tupopia ngotyo mokonda mo Mbimbiliya, enyina lya Huku livasiwamo onovesi mbulamba po 7.000!a Siovaa, enyina lya “Huku yotyotyili, una una okufendwa keulu, na pano pohi.” — Deuteronômio 4:39.

2. Ongeñi Ombimbiliya ipopia Siovaa?

Ovanthu vafenda ono huku ononyingi. Mahi Ombimbiliya ipopia okuti Siovaa, oe vala Huku wike yotyotyili. Omokonda yatyi? Tyo tete, omokonda Siovaa oe utumina ovipuka aviho. Ombimbiliya yati Siovaa, oe “Omukulami kombanda yohi aiho.” (Tanga Salmo 83:18.) Tya vali, Siovaa petupu natyike tyimupona. Tyina ena etyi asoka okulinga, utyilinga umwe natyike tyimutyilika. Tya tatu, Siovaa oe “watunga ovipuka aviho”. Tyilinge ovipuka keulu, tyilinge ovipuka pano pohi, oe wevitunga. (Eholololo 4:8, 11) Ovanthu vakutulwa, mahi Siovaa kekahi ngovanthu. Siovaa oko eli vala apeho, tupu makalako apeho. — Salmo 90:2.

3. Huku tyiti ava vemutumbula ñgaa, ava vemutumbula ñgaa

Pamwe omunthu tumutumbula enyina liae muene, mahi pamwe tumutumbula enyina ekuavo liayemba kotyilinga aundapa. Opo utyinoñgonoke nawa, talei OVIDIU, amutomphola epulo eli:

OVIDIU: Utumbulwa Omanyina Omanyingi, Mahi Una Enyina Like Vala (0:41)

• Okuti nga waihana omunthu okuti “Tatekulu”, ngotyo watumbula enyina liae? Oityi wakumbululila ngotyo?

Ombimbiliya ipopia okuti ovanthu vamwe vafenda ono huku ononyingi. Tangei Salmo 136:1-3, amutomphola epulo eli:

• Olie wapopiwa mono velesikulu ombu okuti o “Huku yono huku” na “Tatekulu yovo tatekulu”?

4. Siovaa uhanda unoñgonoke enyina liae, olitumbula

OVIDIU: Huku Una Enyina? — Otyinthimbu (3:11)

• Tyina utala, omokonda yatyi Huku ahandela ovanthu vanoñgonoke enyina liae?

Siovaa tupu uhanda ovanthu vatumbule enyina liae. Tangei Ova Loma 10:13, amutomphola omapulo aa:

• Oityi tuesukisila okutumbula enyina lya Huku?

• Oñgeni ove ukala tyina omunthu umwe ekutumbula enyina liove?

• Tyina usoka, Siovaa ukala ñgeni tyina utumbula enyina liae?

5. Siovaa uhanda ukale epanga liae

OVIDIU: Puetyi Ankho Ndyili Nokuovola Huku Yotyotyili (8:18)

• Ngetyi tuamona movidiu, oñgeni Soten akala etyi anoñgonoka enyina lya Huku?

Tyina uhanda okukala epanga lyo munthu umwe, tete mulitumbulila omanyina enyi, ine hatyo? Tangei Tiaku 4:8a, amutomphola omapulo aa:

• Siovaa uhanda ulinge-tyi?

• Pahe wanoñgonoka enyina lya Huku. Okuti pahe mupondola okukala omapanga? Oityi wapopila ngotyo?

ETYI WELILONGESA

Siovaa, enyina lya Huku. Uhanda tukale omapanga ae. Otyo etupopilila enyina liae.

Okupitulula

• Oñgeni Siovaa elikalela nono huku ononkhuavo ovanthu vafenda?

• Omokonda yatyi tuesukisila okutumbula enyina lya Huku?

• Oityi tyilekesa okuti Siovaa uhanda ukale epanga liae?

KUHANDE OKUOVOLA VALI?

Tala ovipuka vitano vilekesa umwe okuti kouye kuna Huku.

“Okuti Kouye Kuna Umwe Huku?” (Mo jw.org)

Otyipuka otyo tyokuti Huku utupu ou wemutunga, momutwe wovanthu vamwe katyifumo. Tanga onthele ei, utale ine etyi ovanthu ovo vapopia otyili umwe.

“Olie Watunga Huku?” (Omutala Womulavi, 1 ya Agosto yo 2014)

Tanga onthele ei unoñgonoke oityi tuesukisila okutumbula enyina lya Huku, namphila tuehetyii oñgeni ankho litumbulwa kohale.

“Siovaa Olie? Oityi Tuesukisila Okutumbula Enyina Liae?” (Mo jw.org)

Okuti tutei vala enyina tuatumbula Huku, ina kesukile-ale? Tala oityi tupopila okuti una una vala enyina like.

“Huku Una Omanyina Eñgapi?” (Mo jw.org)