ELONGESO 12
Oityi Matyikukuatesako Okuahayekeko Okulilongesa?
Okulilongesa Ombimbiliya otyiwa umwe, mahi pamwe katyapepukile. Hamwe nthiki imwe wasokele-ale oti: ‘Otyipuka etyi hahe ndyityiyekepo.’ Mahi oityi wesukisila okutualako okulilongesa? Oityi matyikukuatesako okuahayekeko?
1. Ine ulilongesa Ombimbiliya mopoloko-tyi?
‘Ondaka ya Huku ina omwenyo, ina ononkhono.’ (Ova Hebeleu 4:12) Okulilongesa Ombimbiliya otyiwa mokonda unoñgonoka etyi Huku asoka, netyi ekuhandela. Mahi hakuti vala monoñgonoka Ombimbiliya, mahi tupu molingi ovipuka nonondunge, iya kumasoyo tyina una ovitateka mokonda utyii okuti kumbi ovipuka maviviuku. Mahi otyipuka otyiwa vali mopoloko tyina ulilongesa Ombimbiliya, okukala epanga lya Huku. Tyina ulilongesa Ombimbiliya, opo ngotyo uli nokuyeka Huku ekukuateseko ukale nawa.
2. Oityi wesukisila okuhumba etyi uli nokulilongesa mo Mbimbiliya?
Ovipuka vili mo Mbimbiliya oviwa unene. Otyo Ombimbiliya yatyo muene ipopila okuti “landa otyili, wehetyilandese.” (Provérbios 23:23) Ine tyili tuhumba umwe etyi tulilongesa Mondaka ya Huku, nga tukala-kala ñgoo novitateka, kamatuyekeko okulilongesa. — Tanga Provérbios 2:4, 5.
3. Oñgeni Siovaa mekukuatesako opo wahayekeko okulilongesa?
Siovaa Huku, Omutungi wovipuka aviho, Epanga liove, mekukuatesako okutualako okulilongesa opo umunoñgonoke umwe nawa. Mekuavela “ononkhono” utualeko okulilongesa Ondaka yae. (Tanga Ova Filipu 4:13.) Pamwe tyina wamatale okuti tyina usoka okulilongesa uponwa, Siovaa mekukuatesako. Okuti pamwe tyikupuiya okulinga etyi welilongesa? Okuti pena otyipuka tyimwe tyihanda okukutyika opo wehelilongese vali? Okuti pamwe ombunga yove nomapanga ove vehole okukupenya mokonda yetyi uli nokulilongesa? Movipuka ovio aviho, Siovaa mekukuatesako. Apeho tyina ulikuambela ku Siovaa, muiita ekukuateseko utualeko okulilongesa Ondaka yae Ombimbiliya. — 1 Ova Tesalonika 5:17.
KUHANDE OKUNOÑGONOKA VALI?
Ine una ovilinga ovinyingi, oo hamwe vakwenyi kavahande ulilongese, monoñgonoka etyi una okulinga opo wahaponwe. Pahe ha motale oityi Siovaa alinga opo ekukuateseko wahayekeko okulilongesa.
4. Tyokulilongesa suka umwe natyo
Pamwe mokonda tuna ovilinga ovinyingi, tupondola atuti: ‘Nkhele tyokulilongesa tyikalele vala opo. Ame ndyitupu omuvo!’ Ine tyina utala ñgaa ngoti utupu omuvo, oityi upondola okulinga? Tangei Ova Filipu 1:10, amutomphola omapulo aa:
Tyina utala ñgaa, ovipi “ovipuka viesukisa vali”?
Oityi una okulinga opo tyokulilongesa Ombimbiliya, natyo tyikale otyipuka pahe usuka umwe natyo?
Ine ukuata ombaliti, opake-mo eheke, keheke oko otentheka-ko omamanya, omamanya kamaafu-mo
Mahi ine upaka-mo tete omamanya, pahe otyokela-mo eheke, lifwa-mo vala nawa. Ine no onthwe tutetekela okulinga “ovipuka viesukisa vali,” nkhele makuhupu omuvo wokulinga ovipuka ovikwavo
Muene-muene ovanthu aveho, momutima vahanda umwe okunoñgonoka Huku, nokumufenda. Tangei Mateusi 5:3, amutomphola epulo eli:
Ine tyokulilongesa Ombimbiliya tusuka umwe natyo, matupolopo-tyi?
5. Ine hamwe vakwenyi kavahande ulilongese, koleleya vala
Pamwe vakwenyi kamavahande ulilongese Ombimbiliya. Vapondola okulinga ovipuka vimwe vikusoyese umwe oyekeko. Otyo tyalingilwe Francesco. Talei OVIDIU, amutomphola omapulo aa:
Etyi Francesco apopila mee yae, nomapanga ae okuti ukahi nokulilongesa Ombimbiliya, vakalele ñgeni?
Okuti Francesco walingile wakoleleyile?
Tangei 2 Timotiu 2:24, 25, amutomphola omapulo aa:
Oñgeni omapanga ove nombunga yove vakala etyi vetyiiva okuti uli nokulilongesa Ombimbiliya?
Ngetyi tyipopia onovelesikulu ombu tuatanga, oñgeni una okukala tyina omunthu umwe ahahande ulilongese Ombimbiliya?
6. Yumba-ko onthumbi Siovaa mekukuatesako
Katutu-katutu tyina tukala vali omapanga a Siovaa, tupu matuhande okulinga ovipuka vimuhambukiswa. Mahi muene-muene umwe, pamwe okuyekapo ovipuka Siovaa ahahande katyapepukile. Okuti no ove nthiki imwe wasokele-ale ngotyo? Ine wetyisokele-ale, wahaponwe! Yumba vala onthumbi mu Siovaa, ngwe mekukuatesako okupiluluka. Talei OVIDIU, amutomphola omapulo aa:
Movidiu tuatala, ovipuka patyi Jim ankho alinga, pahe eviyekepo?
Etyi watala ñgaa etyi Jim ankho ekahi, netyi pahe pahetyino ekahi, oityi tyekulongesa?
Tangei Ova Hebeleu 11:6, amutomphola omapulo aa:
Oityi Siovaa makalingila ava velikuatehila vemunoñgonoke umwe nawa, avalingi etyi tyaviuka?
Ngetyi tuamona mo tesitu, Siovaa ukala ñgeni tyina ekumona ukahi nokulinga ononkhono ulilongese Ombimbiliya?
INE HAMWE PAMONEKA OMUNTHU UMWE EKUPULU OKUTI: “Ñgaa ulilongesila-tyi Ombimbiliya?”
Momutiwi?
ETYI WELILONGESA
Welilongesa okuti pamwe okulilongesa Ombimbiliya katyapepukile. Mahi otyo vala matyikukuatesako ukale-ko apeho. Wamona okuti ine utualako okuyumba onthumbi mu Siovaa, ngwe mekukuatesako.
Okupitulula
Oityi uholelele etyi uli nokulilongesa mo Mbimbiliya?
Oityi una okulinga opo utyivile okulinga “ovipuka viesukisa vali”?
Oityi wesukisila okuita ku Siovaa opo ekukuateseko utualeko okulilongesa?
KUHANDE OKUOVOLA VALI?
Tala ovipuka vikuana upondola okulinga opo wahanyane nomuvo wove.
“Linga Ngetyi Ukuate Nawa Omuvo Wove” (Pahukei!, Fevereiro yo 2014)
Omukai umwe etyi akala Ombangi, omulume wae ehetyihande. Ovidiu ei, ipopia oñgeni Siovaa emukuatesileko.
Omukulu ou, wakalinga tupu Ombangi ya Siovaa, omukai wae wahayekeleko okulilongesa.
Ovanthu vamwe vehole okupopia okuti Onombangi mba Siovaa vayapaula onombunga. Okuti otyipuka otyo otyili?
“Okuti Onombangi mba Siovaa Vayapaula Ovanthu ko Vavo?” (Mo jw.org)