Tete Linga Oupanga Nomukuatate Wove—Oñgeni molingi?

Soka ñgeno ove ankho ukala mo Galileia pomuvo wa Jesus. Ukahi nokulinga oungendi okuenda noko Jelusalei okukalinga otyipito tyomakaka. Mepunda-umbo mueyula ovanthu vatunda kovilongo viokokule veya okulinga ovilikutila. Iya nove uhanda okuava otyilikutila ku Jeova. Watyinda otyingi tyove potyipepe, ohimbika okueenda metapalo mueyula ovanthu, venda no kondyuo ya Huku. Tyina uya, uvasa pondyuo ya Huku peyula ovanthu navo veya okulinga ovilikutila. Tyina uti ñga, omuvo wove wokuava otyipako komunakwa wehikapo. Liwa-liwa ohinangela omukuatate wove hamwe ukahi pokati kovanthu ovanyingi, ine ukahi pomphangu onkhuavo ou una nae otyitateka. Jesus wapopia oityi ove upondola okulinga. (Tanga Mateus 5:24.) Oñgeni ove nomukuatate muelileva nae mamukala nombembwa Jesus apopia? Onondaka mbukahi poukasa pombuelo, holovonapo ei yaviuka.

OVE UPONDOLA . . .

• okupopia nomukuatate wove inkha ove usoka okuti pena etyi ekulinga tyekunumanesa.

• okupopia nomukuatate wove monkhalelo ikahi nawa inkha ove usoka okuti kasete okunumana.

• okumutehelela nawa tyina apopia, namphila uhanoñgonokele nawa etyi ekahi nokupopia, nomutima weliola omuiti otyiponyo mokonda yetyi wemulinga ine hamwe onkhalelo onondaka mbove mbemukalesa.

OMUKUATATE WOVE UPONDOLA. . .

• okuita ekuateso kovanthu ovakuavo mewaneno opo evepopile okuti nalingwa onya.

• okunoñgonoka nawa ovipuka aviho viemunumanesa iya etavela okuti wapengesa.

• okuliola omutima aimbuka oviponyo viae, amulingi oupanga iya omuevela nomutima auho.

Namphila efendelo lietu hono, kamuakutikinyine ovilikutila viovinyama, oityi Jesus ankho ahanda okutulongesa konthele yokukala nombembwa novakuatate opo efendelo lietu litavelwe na Huku?