Otyilikutila Tyeyovo — “Otyiawa Tyimwe” Tyatunda ku Tate

1. Ovipuka patyi oviwa mavietua notyilikutila tyeyovo?

OTYILIKUTILA tyeyovo tya Jesus Kristu tyaeta ononkhano ononyingi onongwa. Mongeleka, tyavela omphitilo opo ovana aveho va Andau vehole ouviuki vakale nthiki imwe mombunga ya Huku. Ononkhano ononkhuavo omokonda tupondola okukalako apeho nehambu. Haunene vali, otyilikutila tyeyovo tyelikuata kumwe notyipuka tyimwe tyakolela tyilinge keulu na pano pohi.—Hebreus 1:8, 9.

2. (a) Ovipuka patyi viakolela vio keulu no vio pohi Jesus apopia melikuambelo? (Tala olutalatu pefo pahimbikila onthele.) (b) Oityi matulilongesa monthele ei?

² Etyi kuakamba omanima evali opo Jesus aipawe, Jesus walongesile ovalongwa vae okulikuambela okuti: “Tate yetu keulu, enyina liove lisukukiswe. Ouhamba wove uye. Ehando liove lilingwe pano pohi, ngetyi lilingwa keulu.” (Mateus 6:9, 10) Tutalei oñgeni otyilikutila tyeyovo tyelikuata kumwe nokusukukisa enyina lia Jeova, nouhamba wa Huku nehando Liae.

“ENYINA LIOVE LISUKUKISWE”

3. Enyina lia Jeova lilekesa tyi? Oñgeni Satanasi atyitukilapo enyina lia Jeova?

³ Tete, Jesus welikuambela opo enyina lia Jeova lisukukiswe. Enyina lia Jeova lilekesa nawa oe lie. Jeova omunthu una vali epondolo, tupu omuviuki vali Kovanthu aveho mouye. Jesus tupu umuihana okuti “Tate Musukuki.” (João 17:11) Mokonda Jeova omusukuki, ovipuka aviho alinga novitumino viae aviho vikahi nawa. Mahi motyikunino tyo Endene, Satanasi watyitukilapo ovitumino Huku aavela ovanthu. Wakemba konthele ya Jeova nokutyitukilapo enyina lia Huku.—Gênesis 3:1-5.

4. Oñgeni Jesus ankho atala enyina lia Huku?

⁴ Mahi, Jesus ankho uhole enyina lia Jeova iya walinga atyiho opo elisukukise. (João 17:25, 26) Ñgeni? Novituwa viae nelongeso liae, Jesus wakuatesako vakuavo okutala okuti ovitumino via Jeova viaviuka iya ovipuka aviho etuita opala ouwa wetu. (Tanga Salmo 40:8-10.) Alo umwe etyi Satanasi emumonesa ononkhumbi nokuipawa ononkhia mbumwe mbeihama, Jesus watuaileko noukuatyili. Jesus walekesa nawa okuti omunthu uhena nkhali upondola okutavela Jeova nomutima auho.

5. Oñgeni tusukukisa enyina lia Jeova?

⁵ Oñgeni tupondola okulekesa okuti tuhole enyina lia Jeova? Novituwa vietu. Jeova uhanda tukale tyasukuka. (Tanga 1 Pedro 1:15, 16.) Otyo tyilekesa okuti tuna okumufenda nokumutavela nomutima auho. Namphila tumoneswa ononkhumbi, tulinga ononkhono mbokutyinda omuenyo welikuata kumwe nomalongeso a Jeova. Tyina tutyinda omuenyo welikuata novitumino via Jeova, tuetela omunkhima enyina Liae. (Mateus 5:14-16) Tulekesa okuti ovitumino viae viaviuka iya Satanasi onkhembi. Onthue tuvakuankhali, tulinga oviponyo. Mahi tyina tuamalingi oviponyo, tulivela nokuyekapo okulinga ovipuka vipenyesisa enyina lia Jeova.—Salmo 79:9.

6. Omokonda yatyi Jeova etutala okuti tuvaviuki, namphila tuvakuankhali?

⁶ Tyilinge tuvalembulwa ine “tunongi ononkhuavo,” Jeova maevela vala ononkhali mbetu inkha tuna ekolelo motyilikutila tyeyovo. Etavela tukale mombunga yae yavana velipakula kwe. Upopila Ovakristau ovalembulwa okuti ovana vae ovaviuki iya “onongi ononkhuavo” omapanga ae ovaviuki. (João 10:16; Romanos 5:1, 2; Tiago 2:21-25) Mahi, nkhele pehepano, otyilikutila tyeyovo tyituavela omphitilo yokukala noupanga na Tate yetu nokusukukisa enyina liae.

“OUHAMBA WOVE UYE”

7. Oviwa patyi mavitundilila kotyilikutila tyeyovo?

⁷ Melikuambelo Jesus alongesa ovalongwa vae, wati: “Ouhamba wove uye.” Oñgeni otyilikutila tyeyovo tyelikuata kumwe Nouhamba wa Huku? Ouhamba wa Huku maukatuminwa na Jesus novanthu vena 144.000 vakoyua pano pohi. Otyilikutila tyeyovo tyaikula ondyila opo ovanthu ovo vatutiliswe nokukakala keulu. (Apocalipse 5:9, 10; 14:1) Ovanthu ovo mavakakala onohamba novanakwa avakatumina ohi na Jesus mokueenda kuomanima ovityita ekwi. Mokueenda kuomuvo oo, Jeova maundapesa Ouhamba opo alinge ohi ikale omphangu yombembwa nokukuatesako ovanthu vakala tyihena onkhali. Okutunda opo ovaumbili va Jeova keulu na pano pohi mavakala vala ombunga ike. (Apocalipse 5:13; 20:6) Jesus mahanyeko Satanasi nokumanako ovitateka aviho aetako.—Gênesis 3:15.

8. (a) Oñgeni Jesus alongesa ovalongwa okunoñgonoka okuti Ouhamba wa Huku wakolela? (b) Oñgeni hono tukuatesako Ouhamba?

⁸ Jesus wakuatesako ovalongwa vae okunoñgonoka omokonda yatyi Ouhamba wa Huku wakolela. Ñgeni ngotyo? Liwa-liwa konyima yombatisimo yae, Jesus ehimbika okulongesa “onondaka onongwa Mbouhamba wa Huku” kovanthu aveho. (Lucas 4:43) Tupu apopila ovalongwa vaave oumbangi konthele yae “alo kononthele mbokokule-kule mbohi.” (Atos 1:6-8) Hono, novilinga viokuivisa ouhamba, ovanthu ovanyingi vena omphitilo yokulilongesa konthele yotyilikutila tyeyovo nokukala onomphinga Mbouhamba wa Huku. Onthue tulekesa okuti tuvakuatyili Kouhamba tyina tukuatesako ovalembulwa okuivisa onondaka onongwa mouye auho.—Mateus 24:14; 25:40.

“EHANDO LIOVE LILINGWE PANO POHI”

9. Omokonda yatyi tuna onthumbi yokuti Jeova mafuisapo ehando liae ena novanthu?

⁹ Oityi Jesus ankho ahanda okupopia etyi ati: “Ehando liove lilingwe pano pohi”? Tyina Jeova apopia okuti otyipuka tyimwe matyimoneka, tyimoneka umwe. (Isaías 55:11) Oumphuki wa Satanasi kawatalamekele ehando lia Jeova. Olipi ehando lia Jeova pala ohi? Ankho uhanda muyule ovana va Andau na Eva vehena onkhali. (Gênesis 1:28) Inkha Andau na Eva vankhile tyehena ovana, ehando lia Huku lio kuyulisa ohi novana vavo ñgeno kaliafuisiluepo. Jeova eveyeke vakale novana. Otyilikutila tyeyovo tyaavela kovanthu aveho vekolelo omphitilo yokukala nomuenyo wahapu. Jeova uhole ovanthu iya uhanda tukale nomuenyo umwe ukahi nawa.

10. Oñgeni otyilikutila tyeyovo tyietela ouwa vana vokuankhia?

¹⁰ Iya ovanthu ovanyingi vokuankhia mahi vahanoñgonokele Jeova? Jeova uhandela ovanthu omuenyo. Tupu uhanda okukondolela omuenyo ovanthu vokuankhia. Otyilikutila tyeyovo tyaavela omphitilo ovanthu vakale vali nomuenyo. Mavekelilongesa konthele ya Jeova nokukakalako apeho. (Atos 24:15) Jeova ondyivi-ndyivi yomuenyo. Tyina Jeova amakondolela omuenyo vana vokuankhia, makakala Tate yavo. (Salmo 36:9) Melikuambelo alongesa ovalongwa vae, Jesus wapopia okuti Jeova o “Tate yetu uli keulu.” (Mateus 6:9) Jeova waavela Jesus otyilinga tyimwe tyakolela tyokututilisa vokuankhia. Jesus wati: “Ame tutilo nomuenyo.”—João 6:40, 44; 11:25.

11. Oityi Huku ahandela “otyinyingi tyovanthu”?

¹¹ Tupu Jesus wati: “Kese munthu ulinga ehando lia Huku, ondenge yange, omphange yange tupu ome.” (Marcos 3:35) Huku uhanda ovanthu vomalongo aeho nomihoko nomalaka vemufende. Vaihanwa okuti “otyinyingi tyovanthu, tyihevilwa okuvalulwa nomunthu nawike.” Vena ekolelo motyilikutila tyeyovo nokutavela Huku. Vemuhivilika nokupopia okuti: “Eyovo lietu litunda ku Huku yetu, una wapumphama kotyipundi tyoutumini, no Kondyona.”—Apocalipse 7:9, 10.

12. Melikuambelo lia Jesus, oityi tulilongesa konthele yehando lia Jeova pala ovanthu?

¹² Onthue tulilongesa unene konthele ya Jeova nehando ena novanthu, melikuambelo Jesus alongesa. Tete, tuna okulinga atyiho opo tusukukisa enyina lia Jeova nokumunkhimaneka. (Isaías 8:13) Otyilikutila tya Jesus, tyituavela omphitilo yokuyovolwa tupu tyinkhimaneka enyina lia Huku. Enyina lia Jesus lihangununa okuti “Jeova Omuyovoli.” Vali, tulilongesa okuti, Jeova uundapesa Ouhamba wae opo aetele ouwa ovanthu aveho vetavela menyina lio tyilikutila. Tupu, tuna onthumbi yokuti natyike tyipondola okutalameka ehando lia Jeova.—Salmo 135:6; Isaías 46:9, 10.

PANDULA JEOVA MOKONDA YOTYILIKUTILA TYEYOVO

13. Omokonda yatyi tumbatisalelwa?

¹³ Onkhalelo imwe yakolela tulekesa okuti tupandula otyilikutila tyeyovo, oputyina tulipakula ku Jeova nokumbatisalwa. Tyina tulinga ngotyo, tulekesa okuti tuna ekolelo motyilikutila tyeyovo tupu “tuvanthu va Jeova.” (Romanos 14:8) Tyina tumbatisalwa, tuita ku Jeova etuavele “omutima omuwa.” (1 Pedro 3:21) Jeova utukumbulula tyina etuavela oviwa viaetwa notyilikutila tyeyovo. Tuna onthumbi yokuti metuavela ovipuka aviho etulaa.—Romanos 8:32.

14. Omokonda yatyi Jeova etupopila opo tukale nohole na vakuetu?

¹⁴ Ovipuka aviho Jeova alinga ulundwa noluembia. Iya uhanda ovanthu vemufenda, vemuhetekele nokukala noluembia navakuavo. (1 João 4:8-11) Tyina tuhole ovanthu, tulekesa nawa-nawa okuti tuhanda okukala “ovana va Tate [yetu] ukahi keulu.” (Mateus 5:43-48) Ovitumino vivali viakolela tyotete tyati, okukala nohole na Jeova, tyavali una okukala nohole na vakuenyi. (Mateus 22:37-40) Onkhalelo imwe tulekesa okuti tuhole ovanthu oputyina tuvelongesa onondaka onongwa Mbouhamba wa Huku. Inkha tutavela otyitumino tya Jeova tyokukala nohole navakuetu, haunene ovakuatate vetu, ohole yetu na Jeova mailiyawisa.—1 João 4:12, 20.

OTYILIKUTILA TYEYOVO OTYIAWA TYATUNDA KU JEOVA

15. (a) Oviwa patyi tutambula pehepano ku Jeova? (b) Oviwa patyi matukapewa komutwe wandyila?

¹⁵ Jeova utulaa okuti mokonda tuna ekolelo motyilikutila tyeyovo, ononkhali mbetu “mambunyimwa.” Jeova malimbwa ononkhali mbetu pala apeho. (Tanga Atos 3:19-21.) Ngetyi tuapopia konthyimbi, otyilikutila tyeyovo tyaavela omphitilo opo Jeova aholovone ovanthu vamwe vakakale ovana vae keulu. Ovana ovo ovalembulwa. (Romanos 8:15-17) Tupu Jeova ukonga “onongi ononkhuavo” opo vakale ombunga yae pano pohi. Tyina vamakala tyihena onkhali, mavalolwa monkhalelo yahulilila. Inkha vakala ovakuatyili ku Jeova, tupu navo mavakala ovana va Huku. (Romanos 8:20, 21; Apocalipse 20:7-9) Jeova apeho matualako okupanda ovana vae. Otyilikutila tyeyovo atyitualako okueta ononkhano onongwa. (Hebreus 9:12) Jeova wetuavela otyiawa tyimwe otyiwa, petupu omunthu nawike upondola okutupola tyo.

16. Oñgeni otyilikutila tyeyovo tyituyovola?

¹⁶ Inkha tulivela ononkhali mbetu, petupu etyi Eliapu lipondola okulinga opo litutyilike okukala ombunga ya Jeova. Jesus wankhia “like mahi pala apeho.” Otyilikutila tyeyovo katyiwanwa-wanwa vali. (Hebreus 9:24-26) Andau wetuetela ononkhia, mahi otyilikutila tya Jesus tyetuetela omuenyo uhapu. Otyilikutila tyeyovo tyipondola okutuyovola kouye wa Satanasi nokowoma wononkhia.—Hebreus 2:14, 15.

17. Oityi oluembia lwa Jeova lulekesa pala ove?

¹⁷ Omilao via Huku apeho vifuisuapo. Ngetyi ovitumino Jeova apakako opo vihongolele ohi kavipiluluka, na Jeova kapiluluka. Tupondola okuyumba onthumbi yokuti apeho mafuisapo etyi apopia. (Malaquias 3:6) Jeova wetuavela omuenyo novipuka vali ovikuavo ovinyingi. Una oluembia nonthue. “Onthue tuehika okumunoñgonoka, iya atukala noluembia Huku etulekesa. Huku oluembia.” (1 João 4:16) Omilao viae apeho ovio tyotyili. Apa katutu ohi maikala omphangu yombembwa. Aveho mavakakalamo mavakahetekela Jeova iya nokukala nohole kese umwe namukuavo. Ovaumbuli vae aveho keulu novo pohi mavakati: “Omunkhima nounongo nolupandu nehumbilo, iya noutumini iya nononkhono vikale via Huku pala apeho. Amém.”—Apocalipse 7:12.