Hetekela Sesusi Opo Utualeko Nombembwa

1-2. Omokonda yatyi Sesusi ankho asukalalela?

MOTYINTHIKI tyahulililako tyomuenyo wae pano pohi, Sesusi ankho wasukalala unene. Namphila ankho etyii okuti maipawa novanthu ovakalavi, no ngotyo ankho kasukalalele vala no nonkhia mbae. Ankho uhole unene Tate yae iya ankho uhanda okumuhambukiswa. Sesusi ankho utyii nawa okuti inkha utualako okukala omukuatyili movitateka malambela, ankho masukukisa enyina lya Siovaa. Tupu ankho uhole unene ovanthu iya ankho utyii okuti mavakakala vala nomuenyo uhapu inkha atualako okukoleleya alo kononkhia.

² Namphila Sesusi ankho asukalala unene, mahi ankho una ombembwa. Wapopilile ovalongwa vae okuti: “Ame ndyimuavela ombembwa yange.” (Suau 14:27) Sesusi ankho una “ombembwa ya Huku,” ine ankho watula omutima mokonda youpanga ena na Siovaa. Ombembwa oyo yemukuatesileko okuhasukalala. — Fili. 4:6, 7.

3. Oityi matulilongesa monthele ei?

³ Onthue nalumwe matukala novitateka Sesusi akalele navio. Mahi aveho vokulandula Sesusi mavakala novitateka. (Mat. 16:24, 25; Suau 15:20) Iya nga Sesusi, nonthue pamwe tusukalala unene. Oityi matyitukuatesako okuhasukalala opo tutualeko nombembwa? Pahe matulilongesa ovipuka vitatu Sesusi alingile etyi ali pano pohi, no ñgeni tupondola okumuhetekela tyina tulambela movitateka.

SESUSI WATUAILEKO OKULIKUAMBELA

4. Ngetyi tyipopia 1 Tesalonika 5:17, onongeleka patyi mbulekesa okuti Sesusi welikuambelele unene motyinthiki tyahulililako tyomuenyo wae pano pohi?

⁴ Tanga 1 Tesalonika 5:17. Sesusi welikuambelele unene motyinthiki tyahulililako tyomuenyo wae pano pohi. Etyi Sesusi alinga Ehinangelo lyo nonkhia mbae, welikuambelele opo aave ombolo novinyu. (1 Kol. 11:23-25) Etyi ehenetunde pomphangu valingila Opasikwa, Sesusi elikuambela vali novalongwa vae. (Suau 17:1-26) Tupu Sesusi welikuambelele ovikando ovinyingi etyi ankho vekahi novalongwa vae Komphunda Yomindyambi kounthiki. (Mat. 26:36-39, 42, 44) Alo umwe onondaka apopia etyi ehungi kononkhia, ankho elikuambelo. (Luka 23:46) Sesusi welikuambelele konthele yovipuka aviho viaendele-po monthiki oyo.

5. Omokonda yatyi ono apositolu mba Sesusi mbahatuaileko okukoleleya?

⁵ Otyipuka tyimwe tyakuatesileko Sesusi okukoleleya movitateka, omokonda ankho uyumba onthumbi mu Tate yae, iya walekesile onthumbi oyo tyina ankho elikuambela kwe. Motyinthiki otyo, ono apositolu kavakoleleyile movitateka mokonda kavatuaileko okulikuambela. (Mat. 26:40, 41, 43, 45, 56) Tyina tulambela movitateka, matutualako vala noukuatyili ku Siovaa inkha tulandula ongeleka ya Sesusi, ‘atutualako okulikuambela.’ Mahi oityi matuiti melikuambelo?

6. Oñgeni ekolelo malitukuatesako okutualako nombembwa?

⁶ Onthue tupondola okuita opo Siovaa “etuavele vali ekolelo.” (Luka 17:5; Suau 14:1) Tuesukisa ekolelo mokonda Satanasi ulola ovalanduli aveho va Sesusi. (Luka 22:31) Oñgeni ekolelo malitukuatesako okutualako nombembwa tyina tuna ovitateka ovinyingi? Onthue matulingi atyiho tuvila opo tutetulule ovitateka vietu, mahi ekolelo malikuatesako okuhasukalala, nokuviyekela pomaoko a Siovaa mokonda tuna onthumbi yokuti metukuatesako momuvo watyo. — 1 Pet. 5:6, 7.

7. Oityi tulilongesila ku etyi Robert apopia?

⁷ Okulikuambela tyitukuatesako okukala nombembwa, katyesukisile ovitateka patyi tukala navio. Tala ongeleka ya Robert, omukulu wewaneno una omanima alamba po 80. Wapopia okuti: “Onondaka mbukahi mu Filipu 4:6, 7 mbankhuatesako unene tyina ankho ndyina ovitateka momuenyo wange. Nakalele omuvo umwe tyihena onombongo. Tupu nayekelepo okukala omukulu wewaneno.” Oityi tyikuatesako Robert okutualako nombembwa? Wapopia okuti tyina ankho ahimbika okusukalala, ulikuambela. Wayawisako okuti: “Tyina ankho ndyitualako okulikuambela, ankho ndyilitehelela vali nawa.”

SESUSI WAIVISILE NOMBILI

8. Ngetyi tyipopia Suau 8:29, oityi vali tyakuatesileko Sesusi okukala nombembwa?

⁸ Tanga Suau 8:29. Sesusi ankho una ombembwa alo umwe tyina ankho amoneswa ononkhumbi mokonda ankho utyii okuti ukahi nokuhambukiswa Tate yae. Watuaileko okutavela ku Siovaa, alo umwe tyina ankho tyihapepukile. Ankho uhole unene Tate yae iya otyipuka tyakolela vali momuenyo wae ankho okumuumbila. Etyi ankho eli keulu, wakuatesileko Tate yae okutunga ovipuka aviho. (Pro. 8:30) Iya etyi ankho eli pano pohi, alongesa vakuavo konthele ya Tate yae. (Mat. 6:9; Suau 5:17) Sesusi ankho uhambukilwa unene otyilinga otyo. — Suau 4:34-36.

9. Oñgeni ovilinga viokuivisa vitukuatesako okutualako nombembwa?

⁹ Onthue tuhetekela Sesusi tyina tulinga etyi Siovaa etutuma, ‘nokuundapa unene apeho movilinga vya Tatekulu.’ (1 Kol. 15:58) “Okuundapa unene” movilinga viokuivisa, tyitukuatesako okutala ovitateka vietu monkhalelo yaviuka. (Ovil. 18:5) Mongeleka, ovanthu tuvasa movilinga viokuivisa, vena vali ovitateka ovinyingi tyipona onthue. Mahi tyina vakala nohole na Siovaa, avaendela muetyi valongeswa, omuenyo wavo ukala vali nawa iya avakala nehambu. Okumona ovipuka ovio tyiyawisa onthumbi yetu yokuti Siovaa metukuatesako. Iya onthumbi oyo, maitukuatesako okutualako nombembwa. Omphange umwe ankho ulitehelela okuti kasilivila waimbuka okuti otyo otyili. Wati: “Tyina ndyiundapa unene movilinga viokuivisa ndyilitehelela vali nawa iya tyinthyambukiswa. Ndyilitehelela ngotyo mokonda tyina ndyikahi movilinga viokuivisa, oupanga wange na Siovaa upama vali.”

10. Oityi tulilongesila ku etyi tyapopia Brenda?

¹⁰ Tupu tala ongeleka yomphange Brenda. Oe nomona wae vavela otyintheya. Brenda wendela kotyipundi tyomalola iya utupu ononkhono. Tyina tyitavela wivisa umbo na umbo, mahi haunene uhonekela ovanthu omikanda. Wati: “Etyi naimbuka okuti himaveluka vali mouye uno, andyihimbika okuundapa vali unene movilinga viokuivisa. Okuivisa tyinkhuatesako okuhasoko kovitateka viange. Ame ndyisuka vali unene na vana ndyihole okuvasa movilinga viokuivisa. Tupu ovilinga viokuivisa vinthyinangelesa etyi ndyikevelela komutwe wandyila.”

SESUSI WETAVELELE OKUKUATESUAKO NOMAPANGA AE

11-13. (a) Ovipuka patyi ono apositolu mba Sesusi no vakuavo valingile vialekesile okuti ankho omapanga a Sesusi? (b) Oñgeni omapanga a Sesusi emukalesile?

¹¹ Ono apositolu mba Sesusi vakalele nae mokueenda kuovilinga viae viokuivisa. Otyo tyilekesa okuti ankho omapanga omawa. Ankho omapanga apopiwa mu proverbio okuti: “Kuna epanga enene vali tyipona ou mulikuai nae.” (Pro. 18:24) Sesusi ankho upanda unene omapanga ae. Mokueenda kuovilinga viokuivisa, onondenge mbae ankho vetupu ekolelo mwe. (Suau 7:3-5) Alo umwe, ombunga yae ankho vasoka okuti wavela komutwe. (Mar. 3:21) Mahi, motyinthiki tyahulililako tyomuenyo wae, Sesusi ankho una omahunga omanyingi opo apopile ovalongwa vae okuti: “Onwe muatualako okukala na ame mononkhumbi mbange.” — Luka 22:28.

¹² Ono apositolu mba Sesusi valingile ovipuka ankho vipondola okumunumanesa, mahi Sesusi ehesuku noviponyo viavo. Tyakolela vali kwe, ekolelo ono apositolu ankho vena mwe. (Mat. 26:40; Malu. 10:13, 14; Suau 6:66-69) Motyinthiki tyahulililako tyomuenyo wae, Sesusi wapopilile ovalongwa vae okuti: “Ame ndyikahi nokumuihana okuti mapanga, mokonda nemupopila ovipuka aviho neiva ku Tate.” (Suau 15:15) Tuna onthumbi yokuti omapanga a Sesusi emupamekele unene. Sesusi wapandulile unene ekuateso ovalongwa vae vemuavelele movilinga viokuivisa. — Luka 10:17, 21.

¹³ Tyihe ono apositolu vala, Sesusi tupu ankho una omapanga omakuavo emukuatesileko movilinga viokuivisa, no mononkhalelo ononkhuavo. Vamwe ankho vemukonga opo vakalie nae momaumbo avo. (Luka 10:38-42; Suau 12:1, 2) Ovakuavo ankho venda nae tyina alinga oungendi, nokumuavela ovipuka vimwe ankho esukisa. (Luka 8:3) Sesusi ankho una omapanga omawa mokonda nae ankho epanga ewa. Ankho uvelingilako ovipuka oviwa iya ankho wapola pokati ku etyi akevelela kuvo. Sesusi ankho hamukuankhali, mahi wetavelele okukuatesuako novanthu ovakuankhali. Iya tupondola okukala nonthumbi yokuti omapanga oo emukuatesileko okutualako okukala nombembwa.

14-15. Oityi matyitukuatesako okukala nomapanga omawa, iya oñgeni maetukuatesako?

¹⁴ Omapanga omawa maetukuatesako okutualako noukuatyili wetu ku Siovaa. Iya opo tukale nomapanga omawa, nonthue tuna okukala omapanga omawa. (Mat. 7:12) Mongeleka, Ombimbiliya itulunda okuundapesa omuvo wetu nononkhono opo tukuateseko vakuetu, haunene vana vesukisa. (Efe. 4:28) Okuti uhinangela omunthu wewaneno lienyi upondola okukuatesako? Iya konthele yovakuatate vahapondola okulupuka pondye mokonda yokuakulupa ine okuavela, okuti upondola okuvelandelako ovipuka vesukisa? Okuti upondola okuavela okulia ombunga imwe ihena etyi ilia? Inkha utyivila okuundapesa nawa o site jw.org^® no JW Library^®, okuti upondola okulongesa ovakuatate mewaneno lienyi okuundapesa oviti ovio? Okumanena omuvo wetu mokukuatesako vakuetu, tyitukalesa nehambu liotyotyili. — Ovil. 20:35.

¹⁵ Omapanga etu maetukuatesako tyina tuamakala novitateka tupu maetukuatesako okutualako nombembwa. Ngetyi Eliu atehelele nawa etyi Job ankho ekahi nokupopia ovitateka viae, tupu omapanga etu maetutehelela nawa tyina tuamevepopila onkhalelo tulitehelela. (Jó 32:4) Katupondola okukevelela okuti omapanga etu maetulingilako omatokolo, mahi tuesukisa okuvetehelela nawa tyina vetuavela onondonga mbapolwa mo Mbimbiliya. (Pro. 15:22) Ngetyi Ohamba Daviti yetavelele okukuatesuako nomapanga ae, nonthue katupondola okukala nomalityindailo atuhetavela tyina vakuetu vetukuatesako muetyi tuesukisa. (2 Sam. 17:27-29) Omapanga omawa, otyiawa tya Siovaa. — Tia. 1:17.

OÑGENI MOTUALAKO NOMBEMBWA?

16. Ngetyi tyipopia Filipu 4:6, 7, oñgeni matukala nombembwa yotyotyili? Hangununa.

¹⁶ Tanga Filipu 4:6, 7. Omokonda yatyi Siovaa etupopila okuti matukala nombembwa “menyina lya Kilisitu Sesusi”? Omokonda matukala vala nombembwa yotyotyili inkha tunoñgonoka, atukala nekolelo motyilinga Huku aavela Sesusi. Mongeleka, Siovaa wevela ononkhali mbetu pokati kotyilikutila tyeyovo. (1 Suau 2:12) Okusoka kotyipuka otyo tyitukuatesako okutula omutima! Iya mokonda Ohamba Youhamba wa Huku, Sesusi makamanako ovitateka viaetwa na Satanasi nouye wae. (Isa. 65:17; 1 Suau 3:8; Ehol. 21:3, 4) Ekevelelo olio litukalesa nawa! Namphila Sesusi etuavela otyilinga tyipuiya unene mononthiki mbuno mbonthyulilo, mahi ukahi nokutukuatesako. (Mat. 28:19, 20) Okuhinangela otyipuka otyo, tyitukolesa omutima! Pahe tuaimbuka ovipuka vitatu vitukuatesako okutualako nombembwa: Okutula omutima, ekevelelo, nokukola omutima.

17. (a) Oñgeni ovaumbili va Siovaa vapondola okutualako nombembwa? (b) Ngetyi tyipopia Suau 16:33, oityi matulingi?

¹⁷ Mahi oñgeni motualako okukala nombembwa tyina una ovitateka ovinyingi? Motualako vala nombembwa inkha uhetekela Sesusi. Tete, tualako okulikuambela. Vali, linga etyi Siovaa ahanda oundapa nombili movilinga viokuivisa, alo umwe tyina tyihapepukile. Tatu, ita ekuateso komapanga ove. Inkha ulinga ngotyo, ombembwa ya Huku maiyungu omutima wove nomalusoke ove. Iya nga Sesusi, motyivili okulambela mu kese tyitateka tyikumonekela. — Tanga Suau 16:33.