Okuti Ankho Utyiyale?

Okuti tyotyili ova Judeu “vatundile kovilongo aviho mombuelo yeulu,” okuya mo Jelusalei ko Pendekoste yenima 33 Pomuvo wa Kristu?

Okuyawisa kehipululo lio Mbimbiliya livasiwa mu Atos 2:5-11, Philo omu Judeu umwe pomuvo opo, wahonekele ehipululo lipopia ovanthu ovanyingi ankho veya mo Jelusalei ko Pendekoste yenima 33 Pomuvo wa Kristu.

Konthele yonongendi ankho mbuenda ko Jelusalei, Philo wahoneka okuti: “Ovanthu ovanyingi-nyingi ankho vatunda komapundaumbo omanyingi, koutundilo no koutakelo. Vamwe vaendela pohi ovakuavo o monowato melunga, okuya kovipito.” Tupu, wapopile-mo onondaka mbumwe mbomukanda Agripa omutekula wa Herode, atumikisile Caligula Ohamba Youtumini Omunene wo Roma. Momukanda oo, Agripa wapopia konthele yo Jelusalei okuti: ‘Epundaumbo Likola . . . ankho kalitumina vala otyilongo tyo Judeia, tupu ankho litumina ovilongo ovikuavo, mokonda yotyikundyi tyo vaundapi, ankho lituma-tuma movilongo ovikuavo.’

Agripa wapopia ovilongo ankho muvasiwa ova Judeu, okukutikinya-mo vio kokule ko Mesopotamia, no kokulio kwo Afilika, no ko Asia Menor, no Grecia, no koulongo wo pokati komeva ko Mediterraneo. Omunongo Joachim Jeremias wati: “Namphila omukanda oo kaupopi omaungendi okuenda ko Jelusalei, olusoke omo lukahi, mahi kaluayandyulukile, mokonda ova Judeu aveho ovakulu ankho vena okuenda-ko pomuvo opo.”–Deuteronômio 16:16.

Ovanthu ovanyingi ankho veya mo Jelusalei kotyipito tyo va Judeu opi ankho vehikila?

Ankho kese nima mo Jelusalei mulingilwa ovipito vitatu, o Pasikwa, no Pendekoste, no Tyipito Tyomakaka. Pomuvo wo Vakristau votete, ounyingi wovanthu ankho valinga oungendi okuenda ko Jelusalei povipito ovio, okutunda mo Isilayeli aiho no kovilongo ovikuavo ankho kukala ova Judeu. (Lucas 2:41, 42; Atos 2:1, 5-11) Onongendi ombo ambuho ankho mbuna okuvasa apa mbuhikila.

Vamwe ankho vehikila komapanga avo, ovakuavo o monondyuo vapakelwa. Ovanyingi ankho valinga ononthanda momakaka konthele yotyimato tye pundaumbo. Oungendi wa Jesus wahulilila-ko mo Jelusalei, wehikilile mepundaumbo lio Betania, ankho likala popepi no Jelusalei.​—Mateus 21:17.

Popepi nondyuo ya Huku, ankho patungwa onondyuo ononyingi mbuna oundyuo wokulikohela. Ovanthu vasoka okuti onondyuo ombo, ankho o pala ovaenda vehikile-mo, iya avelikoho opo vanyingile mondyuo ya Huku. Onondaka mbahonekwa ku imwe po nondyuo ombo, mbulekesa okuti Theodotus omunakwa ankho utumina ondyuo yokufendela potyilongo, “watungile ondyuo yokufendela ankho mutangelwa omukanda utiwa Tora, . . . no nondyuo mbokuhikila ovaenda, mbuna omaande pala vana vatunda kokule.”