Sokolola Koluembia Lutualako lwa Jeova

1, 2. (a) Omokonda yatyi tuna onthumbi yokuti Jeova uhole ovanthu vae? (b) Ovanthu valingwa nehando patyi?

OMOKONDA yatyi tuna onthumbi yokuti Jeova uhole ovanthu vae? Tyina wehenekumbulule epulo eli, tala onongeleka ombu: Mokueenda kuomanima omanyingi, ovakuatate nonomphange vapamekele omphange utiwa Taylene. Vapopila omphange opo ahasoke unene kovipuka uhevili okulinga. Omphange ati: “Inkha Jeova kenthyole, ñgeno kavatuaileko okunkhuatesako.” Brigitte, utekula ovana aike etyi omulume wae anyima wati: “Okutekula ovana mouye wa Satanasi tyipuilisa unene, haunene tyina wehena omulume. Mahi, ame ndyina onthumbi yokuti Jeova unthyole mokonda unkhuatesako momuwo wononkhumbi, tupu kandyeke ndyilambele movitateka nehevili okukoleleya.” (1 Coríntios 10:13) Sandra una ouvela uhevilwa okuhakulwa. Motyonge omphange umwe alekesa esuko na Sandra. Omulume wa Sandra ati: “Namphila ankho tuhemwi, esuko enene alekesa alihiki komitima vietu. Esuko lio vakuatate vetu no nomphange lilekesa okuti Jeova utuhole unene.”

² Jeova walinga ovanthu vakale noluembia navakuavo tupu opo valekeswe oluembia. Mahi, tupondola okusoya mokonda yovitateka viekongoko ine vio nombongo ine mokonda ovanthu kavetutavela movilinga vietu viokuivisa. Inkha tuhimbika okusoka okuti Jeova utupu oluembia nonthue, tuesukisa okuhinangela okuti tuakolela unene kwe iya oko ekahi nokutukuata mokuvoko opo etukuateseko. Nalumwe metulimbwi inkha tukala ovakuatyili kwe.​—Isaías 41:13; 49:15.

3. Oityi tyipondola okulunda onthumbi yetu yokuti oluembia Jeova ena nonthue lutualako?

³ Onombangi mbapopiwa konyima mbuna onthumbi yokuti Huku wevekuatesako momuvo wovitateka. Nonthue tupondola okukala nonthumbi yokuti Huku metukuatesako. (Salmo 118:6, 7) Monthele ei, matulilongesa ovipuka vikuana Jeova etuavela vilekesa okuti utuhole. (1) ovipuka atunga, (2) Ombimbiliya, (3) elikuambelo, (4)  otyilikutila tyeyovo. Okusoka kovipuka oviwa Jeova ekahi nokulinga tyitukuatesako okupandula vali unene oluembia atualako okutulekesa.​—Tanga Salmo 77:11, 12.

SOKA KOVIPUKA JEOVA ATUNGA

4. Oityi tulilongesila kovipuka Jeova atunga?

⁴ Tyina tutala ovipuka Jeova atunga, tyitulongesa okuti utuhole unene. (Romanos 1:20) Mongeleka, Jeova walinga ohi novipuka aviho viesukisa opo tukalemo. Wetuavela ovipuka aviho tuesukisa opo tukale nomuenyo una ehambu. Onthue tuesukisa okulia, mahi Jeova wetuavela ovikulia vielikalela vipepa unene. (Eclesiastes 9:⁠7) Omphange umwe utiwa Catherine uhambukilwa ovipuka viatungwa, haunene pomuvo wondyovo ko Canadá. Wati: “Tyihuvisa unene oñgeni ovipuka vialingwa opo viyove vali, ngononthemo mbumena liwa pohi noviila vikondoka koungendi wavio, okukutikinyamo okambindya kavasa ondyila opo kavase okulia konyima yondyuo yange. Jeova utuhole unene mokutuavela ovipuka ovinyingi vihambukiswa.” Tate yetu uhole ovipuka atunga, iya uhanda nonthue tuvihambukilwe.​—⁠Atos 14:​16, 17.

5. Oñgeni oluembia lwa Jeova lutalelwa konkhalelo atunga ovanthu?

⁵ Jeova wetuavela ounongo wokulinga ovipuka oviwa nokuvihambukilwa. (Eclesiastes 2:24) Wavela ovanthu otyilinga tyokulityita, tyokulima ohi, nokuyunga onombisi noviila novipuka ovikuavo vina omuenyo. (Gênesis 1:26-28) Tupu wetutunga novituwa oviwa opo tutyivile okumuhetekela.​—Efésios 5:1.

ONDAKA YA HUKU YAKOLELA

6. Omokonda yatyi tuna yokupanda unene Ondaka ya Huku?

⁶ Jeova wetuavela Ombimbiliya mokonda utuhole unene. Itupopila etyi tuesukisa okulinga opo tunoñgonoke Jeova noñgeni atala ovanthu. Mongeleka, Ombimbiliya itupopila oñgeni Jeova akala etyi ova Isilayeli vehemutavelele. Salmo 78:38 yati: “Ankho una okankhenda, ankho weevela oviponyo viavo, kevehanyaunineko. Ovikando ovinyingi ankho ukondola onyengo yae, iya ankho kalekesa onyengo yae aiho.” Okusokolola ko versikulu ei tyipondola okukukuatesako okutala okuti Jeova una oluembia olunene iya wesuka nove. Tupondola okukala nonthumbi yokuti Jeova wesuka unene nonthue.​—⁠Tanga 1 Pedro 5:​6, 7.

7. Omokonda yatyi Ombimbiliya yakolela kuonthue?

⁷ Ombimbiliya yakolela unene kuonthue. Omokonda yatyi? Omokonda Jeova utomphola nonthue Nondaka yae. Tyina ovohe novana vatomphola nawa, vakala noluembia pokati kavo nokuliyumba onthumbi. Jeova o Tate yetu woluembia. Iya namphila katupondola okumumona ine okuiva ondaka yae, mahi utomphola nonthue Nombimbiliya. Onthue tupondola okumutehelela. (Isaías 30:​20, 21) Tyina tutanga Ondaka ya Huku, tumunoñgonoka nokumuyumba onthumbi, etuhongolela nokutuamena.​—⁠Tanga Salmo 19:​7-11; Provérbios 1:⁠33.

8, 9. Oityi Jeova ahanda tunoñgonoke? Popia ongeleka Yombimbiliya.

⁸ Jeova uhanda tunoñgonoke okuti utuhole iya katale vala koviponyo tulinga. Mahi utala kovituwa vietu oviwa. (2 Crônicas 16:9) Tutalei oñgeni Jeova atala ovituwa oviwa vio Hamba Jeosafa yo Judaa. Jeosafa walingile etokolo liahaviukile etyi elipaka kumwe Nohamba Akabe yo Isilayeli iya avakaluisa o Siria ko Ramote-Gileade. Namphila ovauli 400 vomatutu vapopilile Ohamba onkhalavi Akabe okuti matilisa onondyale, Mikeia omuuli wotyotyili wa Jeova apopila Jeosafa na Akabe okuti inkha vakalwa mavatiliswa. Ngatyo umwe tyimoneka. Akabe ankhila kovilwa, iya Jeosafa ahupu. Etyi ovilwa viapwa Jeova aundapesa Jeú opo akaviyule Jeosafa mokonda yovivi alinga. Jeú emupopila okuti: “ Walinga ovipuka oviwa.”​—2 Crônicas 18:4, 5, 18-22, 33, 34; 19:1-3.

⁹ Momanima okualamba, Jeosafa wapopilile ovana vonohamba, nova Levita, novanakwa vakatalelepo omapundaumbo o Judaa opo valongese ovanthu ovitumino via Jeova. Atyiavela omphitilo opo ovanthu vomalongo omakuavo vanoñgonoke Jeova. (2 Crônicas 17:3-10) Namphila Jeosafa alingile etokolo lihaviukile konyima, Jeova kalimbuilwe ovipuka oviwa alingile omanima okualamba. Ongeleka oyo itupameka mokonda ovikando vimwe tupengesa. Mahi, inkha tulinga etyi tuvila opo tuumbile Jeova, matualako okukala noluembia nonthue, tupu kamalimbuiko ovipuka oviwa tualingile.

PANDA ELAO LIOKULIKUAMBELA

10, 11. (a) Omokonda yatyi elikuambelo otyiawa tyakolela tya Jeova? (b) Oñgeni Huku akumbulula omalikuambelo etu? (Tala olutalatu pefo pahimbikila onthele.)

¹⁰ He woluembia wovola omuvo opo atehelele ovana vae tyina vena etyi vahanda okupopia. Uhanda okunoñgonoka oñgeni velitehelela mokonda uvehole unene. Tate yetu woluembia, Jeova, nae otyo alinga. Ututehelela tyina tulinga omalikuambelo. Okupopia na Tate yetu elao limwe enene!

¹¹ Onthue tupondola okulikuambela ku Jeova ovikando aviho. Jeova epanga lietu, iya apeho wafuapo opo atehelele omalikuambelo etu. Taylene wapopiwa konthyimbi, wati, “Upondola okumupopila ovipuka aviho netyi uhanda.” Tyina tupopila Jeova etyi tyitusukalalesa, upondola okutukumbulula no Vihonekwa, ine onthele imwe yomikanda vietu, ine nepameko litunda kovakuatate vetu no nomphange. Jeova utehelela tyina tumuita nomutima auho, iya utunoñgonoka namphila pehena omunthu utyivila. Onkhalelo akumbulula omalikuambelo tyilekesa umwe okuti oluembia ena nonthue lutualako

12. Omokonda yatyi tuna yokulilongesa omalikuambelo ekahi Mombimbiliya? Ava ongeleka.

¹² Onthue tulilongesa ovipuka viakolela komalikuambelo avasiwa mo Mbimbiliya. Pamwe otyiwa okulilongesa omalikuambelo amwe mefendelo liombunga. Matulingi vali nawa omalikuambelo putyina tusokolola momalikuambelo alingwa novaumbili va Huku vokohale. Mongeleka, lilongesa elikuambelo lia Jona etyi ekahi meimo liombisi onene. (Jonas 1:17–2:10) Pitulula elikuambelo Salomau alinga nomutima auho ku Jeova etyi ekahi nokupakula ondyuo ya Huku. (1 Reis 8:22-53) Tupu sokolola kelikuambelo Jesus alongesile. (Mateus 6:9-13) Tyakolela vali, apeho “ita unene ku Huku nomalikuambelo kumwe nolupandu.” Okulinga ngotyo, “ombembwa ya Huku, ipona onondunge nomalusoke aeho, maiyungu omitima vienyi nomalusoke enyi.” Olupandu luetu mokonda yoluembia lwa Jeova lutualako, malutualako okuliyawisa.​—Filipenses 4:6, 7.

LEKESA OKUTI UPANDULA OTYILIKUTILA TYEYOVO

13. Omphitilo patyi onthue tuna mokonda yotyilikutila tyeyovo?

¹³ Jeova wetuavela ofeto yeyovo “opo tukale vali nomuenyo.” (1 João 4:9) Apostolu Paulu wapopia konthele yoluembia Huku ena nonthue etyi ahoneka okuti: “Kristu wankhia mokonda yovanthu onondingavivi. Tyetyi, tyipuiya omunthu okunkhia mokonda yomuviuki. Mahi, ondalawa, tyafuile omunthu upondola okumunkhila. Huku wetulekesa oluembia lwae ena nonthue, puetyi Kristu ankhia mokonda yetu, etyi ankho onthue nkhele tuvakuankhali.” (Romanos 5:6-8) Otyilikutila tyeyovo otyilekeso otyinene tyoluembia lwa Huku iya tyavela ovanthu omphitilo yokukala noupanga nae.

14, 15. Oityi otyilikutila tyeyovo tyilekesa (a) kovakristau ovalembulwa? (b) kuvana vena ekevelelo liokukakala pano pohi?

¹⁴ Otyikundyi otyitutu tyo Vakristau vaimbuka okuti Jeova uvehole monkhalelo imwe yakolela. (João 1:​12, 13; 3:​5-7) Huku wevelembula nospilitu yae iya mokonda yotyo pahe ovana vae. (Romanos 8:​15, 16) Inkha vamwe puvo nkhele vekahi pano pohi, omokonda yatyi Paulu apopila okuti vepumphi “ponomphangu mbavo keulu kumwe na Kristu Jesus”? (Efésios 2:⁠6) Omokonda Jeova weveavela ekevelelo liokukala nomuenyo wahapu keulu.​—⁠Efésios 1:​13, 14; Colossenses 1:⁠5.

¹⁵ Vana vahalembulilwe, navo vapondola okukala omapanga a Huku inkha valekesa okuti vena ekolelo motyilikutila tyeyovo. Tupu vena omphitilo yokukala ngovana va Huku nokukala nomuenyo wahapu momphangu yombembwa pano pohi. Otyilikutila tyeyovo tyilekesa okuti Jeova uhole ovanthu aveho. (João 3:16) Tyihambukiswa unene okunoñgonoka okuti inkha tutualako okuumbila Huku nekolelo, meketuavela omuenyo omuwa unene mouye omupe! Otyo tyilekesa okuti onthue tupanda otyilikutila tyeyovo, otyilekeso otyinene tyoluembia lutualako Huku ena nonthue.

LEKESA OLUEMBIA LUOVE MU JEOVA

16. Okusokolola koluembia lwa Huku tyitulunda okulinga tyi?

¹⁶ Katutyivili okupopia ononkhalelo ambuho Jeova alekesa oluembia lwae kuonthue. Ohamba David waimba okuti: “Kuame, omalusoke ove omawa unene! Ove Huku, kaevilwa okuvalulwa! Inkha ndyihetekela okuevalula ombalulo yao ilamba poluheke.” (Salmo 139:17, 18) Okusokolola ononkhalelo ononyingi Jeova etulekesa oluembia lwae matyitulundu okumuhumba nokumuavela atyiho tuvila.

17, 18. Ombupi ononkhalelo mbumwe tupondola okulekesa ohole yetu ku Huku?

¹⁷ Kuna ononkhalelo ononyingi tupondola okulekesa okuti tuhole Jeova. Mongeleka, onthue tupondola okulekesa okuti tuhole Jeova tyina tupopila vakuetu nombili onondaka onongwa Mbouhamba. (Mateus 24:14; 28:19, 20) Tupu tulekesa okuti tuhole Huku pokukoleleya tyina tukahi nokulolwa. (Tanga Salmo 84:11; Tiago 1:2-5.) Alo umwe tyina tumoneswa unene ononkhumbi, tupondola okukala nonthumbi yokuti Jeova uluete ononkhumbi mbetu iya metukuatesako, mokonda onthue tuakolela kwe.—Salmo 56:8.

¹⁸ Ohole tuna na Jeova itulunda okusokolola kovipuka aviho oviwa atunga. Onthue tulekesa okuti tuhole Jeova Nondaka yae tyina tulongesa vakuetu Ombimbiliya. Onthue tulikuambela apeho ku Jeova mokonda tumuhole iya tuhanda okupameka oupanga wetu nae. Tyina tusokolola kotyilikutila tyeyovo otyiawa etuavela, ohole yetu nae iliyawisa. (1 João 2:1, 2) Ombo ononkhalelo mbumwe vala tupondola okulekesa ku Jeova okuti tupandula oluembia lwae lutualako ena nonthue.