Elekeso Enene Liekolelo!
1. Ovipuka patyi Jesus apopile okuti mavikamoneka?
1 Ono apostolu vatehelele nawa etyi Jesus apopia konthele yokuya kuae, nonthyulilo youye uno. Wapopile okuti ovita, nondyala, novinimawe, nomauvela, mavikaetela ovanthu ononkhumbi ononene. Konyima, Jesus wapopile okuti ovalongwa vae mavayalwa, nokumoneswa emone, alo umue okuipawa. Tupu wapopile okuti makukamoneka ovauli vomatutu, iya avakayapula ovanthu ovanyingi motyili. Iya ohole yovanthu ovanyingi maikatenda.
2. Omokonda yatyi tupopila okuti onondaka onongwa mbukahi nokuiviswa mouye auho?
2 Mokonda yovipuka ovio, ono apostolu vasokele okuti ankho kamavetyivili okufuisapo ovilinga Jesus eveavelele, viokuivisa onondaka onongwa Mbouhamba kombanda yoohi aiho. (Mateus 24:3-14) Hono onthue tuete elekeso enene liokuti eulo olio likahi nokufuiswapo. Namphila tukahi momuwo umue wononkhumbi, onombangi mba Jeova vekahi nokuivisa nombili onondaka onongwa Mbouhamba wa Huku. Nohole yovanthu ovanyingi ikahi nokutenda, onombangi mba Jeova vatualako nokulekesa ohole. Namphila tuyalwa novanthu vovilongo aviho, onthue tutualako nokulongesa ovanthu aveho.
3. Omuvalu patyi upameka ove wavasa molelatoliu yovilinga vialingwa mouye auho?
3 Okutala ovilinga Onombangi mba Jeova valinga mokueenda kuenima liovilinga liokualamba vikahi pefo 3 alo pefo 6, tyitupameka unene! Mokueenda kuomanima 16, Onombangi mba Jeova valinga onoola mbulamba pombiliau movilinga viokuivisa noviokulinga ovalongwa. Tyotyili olio elekeso enene liekolelo! Tupu omuvalu wovakokoli-ndyila, novaivisi, novalongwa vo Mbimbiliya, novaivisi vambatisalwa menima liovilinga liokualamba weliyawisa, ngetyi motale pomuvalu ukahi pefo 3. Tyihambukiswa unene okutala ovanthu valamba ponomiliau epandu vekahi nokuumbila Jeova. Puetyi watanga olelatoliu oyo, oityi tyekupameka vali?
4. Ovitateka patyi omulume umue evila okutetulula opo ambatisalwe?
4 Tyotyili omuvalu oo utuhuvisa, iya nalumue tupondola okulimbuako okuti olio elekeso enene liovanthu vokuna ekolelo. Tala ongeleka ya Guillermo wekulila ko Bolivia. Watyitua menima lio 1935, aundapa mepia limue enene liepangwe tunde etyi ankho ena omanima 9. Tupu tunde pouna ankho unthiakina epangwe opo akale nononkhono mbokulinga ovilinga ovio, mokonda ankho uundapa unene. Konyima ahimbika okunua unene nokusipa. Mahi etyi ahimbika okulilongesa konthele yetyi Huku ahanda kue, Guillermo wayekapo okusipa nokunua unene. Otyitateka tyae otyinene ankho okuyekapo okunthiakina epangwe, mokonda otyipuka ankho alinga tunde pouna. Guillermo welikuambela unene ku Jeova iya etyivili okuyekapo otyituwa otyo otyivi, ambatisalwa. Oe wapopia okuti: ‘Pahe ndyina omuenyo wasukuka, nehambu enene.’
5. Olipi ehando liove?
5 Tyotyili Jeova wesuka unene novanthu. Uhanda ovanthu aveho velivele onomkhali mbavo. (2 Pedro 3:9) Noonthue tuhanda ovanthu aveho velivele. Moluotyo, tutualeiko nokuvatela ovanthu vokuna omitima viaviuka opo navo vanoñgonoke Jeova, nokukala nohole nae, ngetyi onthue tuna ohole nae.