Atuho Tuna Etyi Tupondola Okuavela Jeova
1 Ove utyii okuti ovanthu vapondola okuavela otyipuka tyimue Huku? Abel, waavelele Jeova ovipako viae ankho ehole unene. Noe na Jó, navo valingile oviawa pala Jeova. (Gên. 4:4; 8:20; Jó 1:5) Tyotyili, oviawa ovio kaviaavelele Huku ouhona, mokonda Huku omuene yovipuka aviho. Mahi ovilikutila ovio vialekesile okuti ovalume ovo vekolelo ankho vena ohole onene na Huku. Hono, onthue tupondola okuundapesa omuvo wetu, nononkhono mbetu, nomalumono etu, opo tuavele Jeova ‘otyilikutila pala okumuhilivika.’—Heb. 13:15.
2 Omuvo: Vana vatepula omuwo kovipuka valinga viahasilivila unene pala okuundapa vali movilinga viokuivisa, vatokala okupandwa! (Efé. 5:15, 16) Hamue tupondola okupilulula oprograma yetu opo tuundape ngovakokoli-ndyila vapola pokati ohanyi ike ine onombali menima. Hamue tupondola okuundapa vali omuvo omunyingi movilinga viokuivisa. Okuundapa onominutu 30 movilinga viokuivisa kese osimano mohanyi, matuyawisa kovilinga vietu onoola onombali!
3 Ononkhono: Opo tukale nononkhono pala okuundapa movilinga viokuivisa, tuesukisa okulityilika ovitalukiso novilinga vitukalesa tyepuila unene atuhapondola okuundapela nawa Jeova. Tupu tuesukisa okuyekapo okusukalala unene novipuka vipondola okusoyesa omutima wetu, avitupolo ononkhono mbokuumbila Huku. (Pro. 12:25) Inkha tuna tyili otyipuka tyimue tyitusukalalesa, hahe ‘okupakula omulemo wetu ku Jeova.’—Sal. 55:22; Fil. 4:6, 7.
4 Omalumono: Onthue tupondola okuava omalumono etu pala okuvatela ovilinga viokuivisa. Apostolu Paulu waavelele ondundo ovakuatate ovakristau pala okupaka nawa onombongo, ovilia, ine otyipuka otyikuavo, opo vakale apeho notyipuka tyimue pala okuvatela vana vokuesukisa. (1 Cor. 16:1, 2) Tupu, nonthue tupondola okupaka nawa onombongo opo tuvatele etyi tyesukisa mewaneno lietu, novilinga viokuivisa mouye auho. Jeova upandula unene etyi tumuavela nomutima auho, namphila pamue tyehehi.—Luc. 21:1-4.
5 Jeova utuavela ovipuka ovinyingi. (Tia. 1:17) Onthue tulekesa olupandu luetu putyina tuava omuvo wetu, nononkhono mbetu, nomalumono etu, pala okuumbila Jeova. Okulinga ngotyo, tuhambukiswa Jeova ‘mokonda Huku uhole una wava nehambu.’—2 Cor. 9:7.