Undapesa Ombimbiliya Nounongo
1. Omokonda yatyi Ombimbiliya yakolela unene?
1 Okuundapesa nounongo ondaka ya Huku, tyituavela ondundo pala okuivisa nokulongesa otyili nokuayandyuluka, nokuhololola omalongeso omatutu, noviso vio vakuaukulu.—2 Tim. 2:15; 1 Ped. 3:15.
2. Oityi matyitukuatesako okuovola onotestu nounongo?
2 Yawisa Enoñgonoko Liove Konthele Yombimbiliya: Okuundapesa apeho otyiti tyimue, tyikukalesa vali omunongo konthele yokuundapesa otyiti otyo. Okutanga Ombimbiliya aiho matyikuvatela okunoñgonoka osapi Yombimbiliya. Tupu, otyo matyikuvatela okuhinangela onotestu, nokumbuvasa liwa. Putyina enoñgonoko liove konthele Yovihonekwa liliyawisa, mopopi nombili onene, nonthumbi, tyina wavela oumbangi vakuenyi movilinga viokuivisa natyina ukaenda-enda vala.—1 Tes. 1:5.
3, 4. (a) Oityi tupondola okulinga opo tuyawise ounongo wetu konthele Yombimbiliya? (b) Okuti ukahi nokuundapesa ononkhalelo ononkhuavo opo unoñgonoke vali Ovihonekwa?
3 Kala notyituwa tyokuikula Ombimbiliya yove, nokulandula onotestu mbutangwa mokueenda kuomaliongiyo mewaneno. Tyina ulinga elilongeso liove lioulike, nokulipongiya pala omaliongiyo mewaneno, tanga onotestu Mbovihonekwa, nokusokolola nawa oñgeni upondola okumbuundapesa. Ovanyingi vatala okuti okutanga onotestu Mombimbiliya yatyo muene, tyivevatela okuvasa vali liwa onotestu tyina vesukisa nambo movilinga viokuivisa, tyipona okumbutanga mo komputadole.—João 14:26.
4 Onombunga mbumue, mbuovola omuvo pala okutanga onotestu nokumbupaka momutwe. Otyo tyipondola okulingwa okuundapesa oupapelo iya amuhonekapo otestu, iya konyima yopapelo amupakeko etyi otestu oyo ipopia. Vaundapesa onkhalelo oyo pala okutala inkha vapondola okupopia onondaka mbo testu ine okuhinangela apa ivasiwa. Tupu, tyiyawisa ounongo wetu okupongiya omalekeso omovilinga viokuivisa, nokuundapesa Ombimbiliya pala okukumbulula epulo.
5. Omokonda yatyi tuhanda okuyawisa ounongo wetu konthele Yombimbiliya?
5 Petupu omukanda omukuavo wakolela vali tyipona Ombimbiliya. Oyo, ina vala onondaka mbukalesa ovanthu “ovanongo pala eyovo.” (2 Tim. 3:15) Mokonda ovanthu motelitoliu yetu vetupu enoñgonoko konthele yomalumono akolela avasiwa Mombimbiliya, tuna ehunga ewa pala okuyawisa ounongo wetu opo tuvelekese etyi Ombimbiliya tyili ilongesa.—Pro. 2:1-5.