Tuesukisa Okupwa-elundo Movilinga Vietu Viokuivisa
1. Oñgeni Jeova alekesa okuti wapua-elundo novanthu?
1 Huku wapua unene elundo novanthu. (Êx. 34:6; Sal. 106:41-45; 2 Ped. 3:9) Ongeleka imwe yavilapo ilekesa okuti oe wapua unene elundo ipondola okutalelwa kovilinga viokuivisa Ouhamba vikahi nokulingwa ouye auho. Jeova ukahi nokuundapa novanthu omanima alamba po 2.000, iya no pahetyino utualako nokukokela ovanthu kwe. (João 6:44) Oñgeni movilinga vietu viokuivisa tuhetekela Jeova wapua-elundo?
2. Oñgeni tupondola okupwa-elundo tyina tuundapa motelitoliu yetu?
2 Ovilinga Viokuivisa Umbo na Umbo: Tuhetekelei oupwa-lundo wa Jeova pokuivisa “tyihatalama” moteletoliu omu ovanthu nkhele vahalekesa esuko. (Atos 5:42) Tukoleleyei noupua-lundo tyina ovanthu vehetavela, vetulinga omukuele, noundyale movilinga vietu viokuivisa. (Mar. 13:12, 13) Tupu, tulekesa oupwa-lundo tyina tutualako okulinga ononkhono mbokutapelela onombuto mbotyili namphila tyepuiya okuvasa ovanthu peumbo.
3. Omokonda yatyi tyesukisila okupwa-elundo tyina tukatalelapo ovanthu nokuvelongesa Ombimbiliya?
3 Okulongesa Ovanthu Ombimbiliya: Opo omuti ukule tyihanda okupwa-elundo. Tupondola okuutapelela nokuupaka ombumbi, mahi katupondola okuulumbaneka okukula. (Tia. 5:7) Tupu, omunthu ukula mopaspilitu katutu katutu, mokueenda kuomuvo. (Mar. 4:28) Vana tulilongesa navo hamwe vatala okuti katyapepukile okuyekapo omatavelo onongeleya mbomatutu ine ovituwa vihelikuatele Nombimbiliya. Katupondola okukuluminya omulongwa wetu okukula opo alinge omapiluluko. Tyihanda okupwa-elundo opo tuyeke ospilitu ya Huku ikuateseko omulongua.—1 Cor. 3:6, 7.
4. Oñgeni okupwa-elundo tyipondola okutukuatesako okuava oumbangi nounongo konombunga mbehelilongesa?
4 Onombunga Mbehelilongesa: Namphila tuhanda unene onombunga mbetu mbehelilongesa mbulilongese otyili, onthue tuesukisa okupwa-elundo tyina tukevelela omuvo ukahi nawa opo tupopie navo konthele yekolelo lietu. Mahi, tuesukisa okuliyunga opo tuhapopie unene. (Ecl. 3:1, 7) Tupu, tuyekei ongeleka yetu ipopie, atukala tyafuapo pala okupopia konthele yekolelo lietu nomutima wapoleya nonthilo onene. (1 Ped. 3:1, 15) Tyotyili, okupwa-elundo movilinga viokuivisa matukala vali ovanongo nokuhambukiswa Tate yetu keulu.