Tuna Okukala Apeho Tyelipongiya Pala Okuivisa
1. Oñgeni tutyii okuti ovaivisi vo Pomuvo wo Vakristau votete, ankho vakala apeho tyelipongiya pala okuivisa?
1 Ovaivisi vombili Pomuvo wo Vakristau votete, ankho vaivisa onondaka onongwa “tyihatalama,” kese pana ankho vavasa ovanthu. (Atos 5:42) Mokutala, ankho tyina vakaivisa umbo na umbo, ankho kavalambe ovanthu mondyila avahapopi navo. Tupu, ankho tyina vamamane ovilinga viavo viokuivisa, kavelityilika okuava oumbangi tyina vamona omphitilo pokuenda konovenda, na kuna kulandehilwa. Nga Jesus, ankho vakala apeho tyelipongiya pala okuivisa.—Mar. 6:31-34.
2. Okutyinda omuenyo welikuata nenyina lietu tyakuatekenya tyi?
2 Tukahi Apeho Tyelipongiya: Enyina lietu, Onombangi mba Jeova, kalilekesa vala etyi onthue tulinga, tupu lilekesa oñgeni onthue tuatuwa. (Isa. 43:10-12) Ngotyo, onthue apeho tukahi tyelipongiya pala okuyakulila ekevelelo lietu, alo umwe tyina tuhaivisa umbo na umbo. (1 Ped. 3:15) Okuti ove uhole okusoka ko nomphitilo mbokuava oumbangi upondola okuvasa tyina uhekahi movilinga viokuivisa, nokusoka oityi upondola okupopia? Okuti utyinda apeho omikanda opo wavele vana vesuka? (Pro. 21:5) Ove wivisa vala umbo na umbo, ine tyina tyitavela tupu uyandyanesa onondaka onongwa kovanthu uvasa ponomphangu ononkhuavo?
3. Omokonda yatyi ankho tyesukisila unene okuivisa momatapalo, na pana patalama omatuku-tuku, na apa papululukilwa ovanthu, no povitanda, no ponomphangu ononkhuavo?
3 Okuava Oumbangi “Mounyingi”: Onthue tuivisa momatapalo, na pana patalama omatuku-tuku, na apa papululukilwa ovanthu, na pana palingilwa ovitanda no nonkhuavo vali. Okuti okulinga ngotyo, okuundapa tyihaonganene, nokulihakamo vala, ine okuundapa tyina omunthu ahanda? Apostolu Paulu wati oe ankho wivisa “mounyingi” na umbo na umbo. (Atos 20:20) Okuivisa umbo na umbo, onkhalelo yetu yotete nokuaviuka vali yokuhikiya onondaka Mbouhamba wa Huku kovanthu. Anthi, ovaivisi Pomuvo wo Vakristau votete, ankho vasuka novanthu ha no nondyuo. Moluotyo, ankho vaovola onomphitilo ambuho pala okupopila ovanthu otyili, mounyingi, na umbo na umbo, na tyina veheli movilinga viokuivisa. Nonthue tuesukisa okutala kovanthu opo tufuisepo ovilinga vietu viokuivisa.—2 Tim. 4:5.