Omapulo Alingwa Novatangi
Oityi Provérbios 24:27 Itulongesa?
Omuhoneki wa Proverbio walondola omukuendye okuti: “Undapa nokufuisapo ovilinga viove kondye, opongiya eepia liove. Iya konyima, tupu una okupameka vomeumbo liove.” Oityi onthele oyo ya proverbio itulongesa? Ilekesa okuti omulume wesukisa okulipongiya tyina nkhele ehenenepe nokuhenehimbike ombunga yae muene, okuimbuka otyilinga tyokunepa.
Kohale oversikulu oyo pamwe ankho ihangununwa okuti omulume wanepa nokuna ovana, una okuundapa opo atekule ombunga. Mahi, tupu una okulinga ononkhono mbokuvelongesa konthele ya Huku no Yombimbiliya. Namphila olusoke olo, oluo tyotyili, nokuatunda Movihonekwa, mahi, ngoti otyo, hatyoko tyakolela vali moversikulu oyo. Omokonda yatyi? Tala omahunga evali.
Tete, oversikulu kaikahi nokupopia okutunga kuokuavela ondundo ine okupameka ombunga omulume enale. Anthi, ipopia onthele yokutunga ondyuo. Ondaka yapitiyua “okutunga,” tupu ipondola okulekesa okutunga monkhalelo onkhuavo, ine okukala nombunga, mokunepa nokutyita ovana.
Vali, oversikulu oyo ipopia unene okulinga ovipuka monkhalelo yaviuka nokuelilandula, ngatyina yati, “Tete ove linga etyi, iya konyima olingi otyo.” Ngotyo, okuti proverbio ilekesa okuti otyilinga tyokutekula mopalutu otyo tete, tyipona okuvelongesa konthele ya Huku? Au!
Kohale, inkha omulume uhanda “okutunga veumbo [liae],” ine okunepa opo akale nombunga, ankho wesukisa okulipula oe muene okuti, ‘Ame nafuapo umwe pala okutekula omukai novana tupondola okutyita?’ Tyina nkhele ehenekale nombunga, oe una ovilinga ena okulinga, viokulima omapia nokuteya. Ngotyo, Ombimbiliya Today’s English Version oversikulu oyo ipopia okuti: ‘Uhatunge ondyuo yove nokupumphika eumbo liove, alo omapia ove ayela, iya okala nonthumbi yokuti una eteku liomuenyo.’ Okuti otyitumino otyo tyina esilivilo mononthiki mbetu?
Enga. Omulume uhanda okunepa, wesukisa okulipongiya nawa pala otyilinga otyo. Inkha ukahi nawa molutu, oe una okuundapa. Anthi, ovilinga ovinene viomulume opo atekule ombunga yae, hakuovola vala eteku liopalutu. Ondaka ya Huku ilekesa okuti omulume uhasukile nomasuka-suka ombunga yae molutu, momalusoke, no kokufenda Huku, wapona una uhena ekolelo! (1 Timóteo 5:8) Moluotyo, tyina omukuendye elipongiya pala okunepa nokukala omutwe wombunga, wesukisa okulilinga omapulo aa: ‘Okuti ame nelipongiya umwe nawa pala okuavela ombunga eteku vesukisa molutu? Nafuapo pala okukala onkhalamutwe yombunga konthele yokufenda Huku? Okuti mandyifuisapo otyilinga tyokulilongesa Ombimbiliya nomukai wange novana vetu?’ Ondaka ya Huku ipopia unene konthele yotyilinga otyo tyakolela unene.—Deuteronômio 6:6-8; Efésios 6:4.
Moluotyo, omukuendye wovola omukai, wesukisa okusoka nawa ovitumino vivasiwa mu Provérbios 24:27. Tupu, omufikuena nae wesukisa okulipula oe muene, inkha afuapo pala otyilinga tyokunepwa nokutyita ovana. Ovakuendye vokuelinepa, navo vapondola okulilinga omapulo ngoo, tyina vasoka okutyita ovana. (Lucas 14:28) Okuendela monondonga ombo Huku aava, tyivatela ovanthu va Huku okulityilika ononkhumbi, nokuvekalesa nomuenyo omuwa mombunga.
[Ehangununo liolutalatu pefo 10]
Omapulo patyi konthele yokunepa omukuendye esukisa okulilinga oe muene?