Susee o umwe povana ovatutu va Sakoo. Ovakulu vae avetyimono okuti Susee uholwe unene na tate yavo. Ove utyii oñgeni tyevekalesile? Avalu onkhi Susee, avemuyale. Monthiki imwe, Susee aloto onondyoi. Etyi etyipopila ovakulu vae, avasoko okuti onondyoi ombo mbuhangununa okuti Susee nthiki imwe mevetumina. Otyo atyivilisapo umwe ovakulu vae okumuyala!

Onthiki imwe ovakulu va Susee avakalisa onongi popepi nepunda-umbo lyo Sikei. Sakoo atumu Susee akatale oñgeni ovakulu vae vekahi. Etyi vamona Susee ukahi nokuya, avahimbika okulipopila okuti: ‘Wonondyoi ukahi nokuya. Tumwipaei!’ Avemukwate, avemuyumbu monyombo yaya kohi. Mahi Sundaa umwe povakulu vae ati: ‘Twehemwipaei! Tumulandesei akale omupika.’ Avalandesa Susee kova Mindiyaa vekahi nokwenda ko Isitu, avemulandesa onombongo 20 mbopalata.

Konyima, ovakulu va Susee avankhinkhi otyikutu tyae mohonde yotyinkhombo, avetyitwala ku tate yavo, avemupopila okuti: ‘Etyi ha tyikutu tyomona wove?’ Sakoo asoko okuti Susee waliwa notyinyama. Sakoo walilile unene. Petupu ou wetyivilile okumukengelela.

Mo Isitu, Susee alandeswa akala omupika womutumini umwe wankhimana utiwa o Potifale. Mahi Siovaa ankho ukwatesako Susee. Potifale etyimono okuti Susee omuundapi uyumbwa onthumbi. Apakala vala katutu, Susee apewa otyilinga na Potifale tyokuyunga ovipuka viae.

Omukai wa Potifale amono okuti Susee omuwa unene. Ononthiki ambuho umukengelela alale nae. Oityi Susee alingile? Aanye ati: ‘Au! Otyo tyapenga. Omuhona wange undyumba onthumbi, ove umukai wae. Inkha ndyilala noove, mandyilingi onkhali ku Huku!’

Onthiki imwe omukai wa Potifale ahande okukwata Susee kononkhono opo alale nae. Akwata movikutu viae, mahi Susee akahateka. Etyi Potifale eya meumbo, omukai wae ati Susee ankho uhanda okunkhwata. Ahapopi otyili. Potifale anumana unene, apake Susee mokaleya. Mahi Siovaa kalimbilwe Susee.

Pweetyi Susee ekahi mokaleya, Falaoo ohamba yo Isitu, aloto onondyoi, nawike wetyivilile okumbuhangununa. Umwe povaundapi va Falaoo emupopila okuti, Susee utyivila okuhangununa onondyoi mbae. Falaoo atumu okwiihana Susee.

Falaoo emupulu okuti: ‘Utyivila okuhangununa onondyoi nata?’ Susee apopila Falaoo okuti: ‘Mo Isitu mamukala okulia okunyingi momanima 7, tupu akulandula omanima 7 ondyala onene. Holovona omunthu omunongo metyivili okupaka nawa okulia opo ovanthu vahankhie nondyala.’ Falaoo emuti: ‘Ove naholovona! Ove mokala omunthu wavali omunene vali mo Isitu!’ Oñgeni Susee etyivilile okuhangununa onondyoi mba Falaoo? O Siovaa wemukwatesileko.

Mokweenda kwomanima 7, Susee aongiya okulia okunyingi. Pahe akuya omanima ondyala, mouye auho, ngeetyi Susee apopile. Ovanthu vokovilongo ovikwavo aveya okulanda okulia ku Susee. Tate yae, Sakoo, eivi okuti ko Isitu kuna okulia, atumu ovana vae 10 opo vakalande.

Ovana va Sakoo avaende ku Susee, Susee wati vala vemonee eveimbuka. Mahi ovakulu vae kavemwimbukile. Avaikila konongolo komutwe wae, ngeetyi alotele mondyoi yae. Mahi Susee ankho uhanda okutala ovakulu vae inkha nkhele oko tyili tyokulinga omapita ovanthu. Evepopila okuti: ‘Onwe muvalavi. Mweya okutala etyi otyilongo tyikahi.’ Avapopi okuti: ‘Au! Onthwe apa tulilandulila tuna 12, twatunda ko Kanaa. Umwe wankhia-le, onkhelo yetu wesala na tate.’ Susee evepopila okuti: ‘Etelelei onkhelo yenyi, opo ndyityitavele.’ Avakondoka keumbo liavo.

Etyi okulia kwapwa, Sakoo atumu vali ovana vae vakondoke ko Isitu. Pahe avaende nonkhelo yavo Mbesamii. Opo alole ovakulu vae, Susee aholeka okopo yopalata mosaku ya Mbesamii, evetendeleya okuti mweivaka. Etyi ovaundapi va Susee vavasa okopo mosaku ya Mbesamii, ovakulu vae avatili unene owoma. Avapopila Susee okuti, wehemulinge omapita tatekulu, etyi mohande okumulinga hahe utulinge-tyo.

Susee etyimono umwe okuti ovakulu vae ankho vapiluluka. Susee eheliholeka vali. Ahimbika okulila, apopi okuti: ‘Ame Susee, ondenge yenyi. Tate nkhele una omwenyo?’ Ovakulu vae avahuvu unene. Evepopila okuti: ‘Mwehelivelei onombei mokonda yetyi mwandingile. O Huku wanthuma opo ndyihupise omienyo vienyi. Pahe endei kawanei tate.’

Avakondoka keumbo liavo, aveketyipopila tate yavo, avemutwala ko Isitu ku Susee. Apa oo Susee velihula na tate yae, pakala-le omanima omanyingi.