Mwisesi wakalele ko Mindiyaa omanima 40. Ngako anepela, akala novana. Nthiki imwe etyi akalisa onongi mbae Komphunda Sinai, amono otyipuka tyimwe tyihuvisa. Otyinkhondo tyikahi nokutema mahi omafo otyo aahapi! Mwisesi ati mandyifwene-po ndyitale nawa otyipuka etyi, eivi ondaka imwe itundilila motyinkhondo otyo, yati: ‘Mwisesi! Wahafwene-ko. Lula ononkhaku mokonda ove ukahi pomphangu ikola.’ O Siovaa watumine oandyu ipopie nae.

Mwisesi atili unene owoma, elihiki motyipala. Ondaka eivile yatile: ‘Ame namona ononkhumbi ovanthu vange ova Isilayeli vekahi nokumona. Mandyiveyovola ko Isitu andyivetwala kotyilongo tyikahi nawa. Ame naholovona ove opo ukapole ovanthu ko Isitu.’ Okuti Mwisesi wahuvile?

Mwisesi apopi okuti: ‘Ine vamphula olie wekutuma mandyitiwi?’ Huku emuti: ‘Vepopila okuti Siovaa, Huku ya Ambalayau, Huku ya Isake, Huku ya Sakoo oe wanthuma.’ Mwisesi apopi okuti: ‘Inkha kaventhavela mandyilingi ñgeni?’ Siovaa apopila Mwisesi okuti memukwatesako. Apopila Mwisesi okuti yumba otyimuti tyove pohi. Etyi etyiyumba pohi, atyityituka onyoka! Etyi Mwisesi eikwata momutyila, aikala vali otyimuti. Siovaa emupopila okuti: ‘Tyina vamatale ovipuka mokalinga mavetavela okuti ame nekutuma.’

Mwisesi apopi vali okuti: ‘Ame hityivili okupopia nawa.’ Siovaa emupopila okuti: ‘Ame mandyikupopila etyi mokapopia, mandyitumu Alau opo ekukwateseko.’ Etyi Mwisesi etyimona okuti Siovaa memukwatesako apolo omukai wae novana vae avaende noko Isitu.

Ova Isilayeli ovapika, vakuluminywa okuundapa unene. Siovaa atumu Mwisesi na Alau ku Falaoo opo vakapopie okuti: ‘Yeka ovanthu vange vaye, opo vakafende ame moluhandya.’ Falaoo apopi nomutomba ati: ‘Ame himalingi etyi Siovaa apopia, tupu himayeke ova Isilayeli vaye.’ Pahe Falaoo eveundapesa vali unene. Siovaa alingi Falaoo otyipuka tyemwihamene. Ove utyii oityi alingile? Waetele Ovihuna 10 mo Isitu. Siovaa apopila Mwisesi okuti: ‘Falaoo kamanthehelela. Komuhuka maende kondongi Nilu. Enda, kemupopile okuti mokonda kayekele ovanthu vange vaye, omaande aeho o mo Nilu maatyituka ohonde.’ Mwisesi etavela aende ku Falaoo. Falaoo wamwene etyi Alau avetele notyimuti komaande mondongi Nilu, aatyituka ohonde. Omaande mondongi aaniki omapita, onombisi ambunkhi, tupu ankho kaetavela okunwa. Mahi Falaoo ahayeke ova Isilayeli vaye.

Etyi pakala vali ononthiki 7, Siovaa atumu Mwisesi akondoke ku Falaoo emupopile okuti: ‘Inkha kuyeke ovanthu vange vaye, mo Isitu mamuyula omamboto.’ Alau atandaveka otyimuti tyae, omamboto aeya, aeyula motyilongo tyo Isitu. Ovanthu avavasi omamboto monondywo mbavo, no komaula, no povilindo viavo. Omamboto ankho ekahi ponomphangu ambuho! Falaoo apopila Mwisesi opo eveitile-ko ku Siovaa ovihuna ovio vitalame. Falaoo apopi okuti mayeke ova Isilayeli vaye. Siovaa atalameka ovihuna ovio, ova Isitu avaongiya omamboto ankhia. Mo Isitu amuniki omapita. Mahi, no ngootyo Falaoo ahayeke ova Isilayeli vaye.

Siovaa apopila Mwisesi okuti: ‘Alau avete notyimuti tyae pohi, ombuma yatyo maityituka onome.’ Onome ombo ambuliyandyana. Vamwe pova Isitu avapopila ovanthu okuti: ‘Ovihuna evi viatunda ku Huku.’ Mahi, no ngootyo, Falaoo ahayeke ova Isilayeli vaye.