Pweetyi ovalavi ova Isilayeli vapita mepunda-umbo lyo Selikoo, vehikilile mondywo yomukai umwe utiwa o Laambe. Etyi ohamba yo mo Selikoo yetyiiva, aitumu ovakwa-vita mondywo ya Laambe. Laambe aholeka ovalavi ovo vevali mondywo yae, ahapopila ovakwa-vita ovo oku veli. Etyi vapita, Laambe apopila ovalavi okuti: ‘Mandyimukwatesako mokonda ndyityii okuti onwe muna Siovaa, onwe mamutambula otyilongo tyetu. Mphopilei-vo okuti mamuhupisa ame nombunga yange.’

Ovalavi avapopila Laambe okuti: ‘Ovanthu aveho mavakala mokati kondywo yove mavahupu.’ Tupu avapopi okuti: ‘Kuta epanda likuhuka pondyanena yove opo ombunga yove ihupe.’

Laambe apopila ovalavi vatulukile kepanda akuta pondyanena yondywo yae. Ovalavi avakaholama monomphunda ononthiki ononthatu, etyi vatunda oko avaende noku Susuwee. Etyi ova Isilayeli vayauka Ondongi yo Solondau, avamaneka vakalwise otyilongo tyo Kanaa. Epunda-umbo lyo tete valwisile o Selikoo. Siovaa evepopila opo velisete like monthiki nepunda-umbo mokweenda kwononthiki epandu. Monthiki ya pandu-vali avelisete nalio ovikando epandu-vali. Pahe ovanakwa avahiki ononkhwino, ovakwa-vita aveliyavela peulu. Ovimato vyo Selikoo avitoko-po! Mahi ondywo ya Laambe ayahatoko-po. Laambe nombunga yae avahupu mokonda Laambe wayumbile onthumbi mu Siovaa.

Ovanthu aveho mo Kanaa avetyiivi etyi tyalingwa o Selikoo. Onohamba mbo Kanaa ambuliwaneka opo mbulwise ova Isilayeli. Mahi ova Simbeau avalingi otyipuka otyikwavo. Avavale ovikutu viatandauka viapwa, avaende ku Susuwee avemuti: ‘Twatunda kotyilongo tyimwe tyokokule. Tweiva okuti Siovaa wemukwatesako amulwisa ova Isitu nova Moambe. Tupopile okuti kamamutulwisa, onthwe matukala ovapika venyi.’

Susuwee etavela, atolela ova Simbeau okuti kamatumulwisa. Mahi etyi palamba ononthiki ononthatu, Susuwee anoñgonoka okuti ovalume vana kavakala-le kokule. Vakala umwe motyilongo tyo Kanaa. Susuwee evepulu okuti: ‘Omokonda yatyi mwetukembela?’ Avakumbulula okuti: ‘Ankho twatila owoma! Tutyii okuti Siovaa, Huku yenyi, ukahi nokumukwatesako opo mutambule otyilongo tyo Kanaa. Mbambavo mwehetwipaei!’ Susuwee alingi umwe ngeetyi apopile ahalwisa ova Simbeau.

Etyi pakala katutu, onohamba ononthano mboko Kanaa avakalwisa ova Simbeau. Mahi Susuwee novakwa-vita vae avakwatesako ova Simbeau. Ova Isilayeli avaende otyinthiki atyiho, etyi kwatya avahimbika okulwisa ova Kanaa. Ova Kanaa avakahateka aveliyandyana. Siovaa alokesa ombila yongandavila, aiveloko. Susuwee aiti ku Siovaa atalameke ekumbi. Oityi Susuwee aitililile otyipuka otyo tyehenelingwe? Omokonda Susuwee ankho uyumba onthumbi mu Siovaa. Siovaa alingi umwe etyi Susuwee emwiita, ekumbi alitalama onthiki aiho atee ova Isilayeli valwisa onohamba mbo Kanaa novakwa-vita vatyo.