“Lingei Vokulinga Etyi Tyapopia Ondaka”

1-2. Oityi ovanthu va Huku vahambukilwa? (Tiaku 1:​22-25)

SIOVAA Nomona wae ehole Sesusi, vahanda tukale nehambu. Omuhoneki w’Oviimbo 119:2 wati: “Vahambukwa ovovana alondola avahalimbwa-ko, vana vemutaindya nomutima auho.” Sesusi nae wati: “Vahambukwa ovava vatehelela ondaka ya Huku avalingi etyi veiva!” — Luka 11:28.

² Onthwe vanthu va Siovaa tuna ehambu. Omokonda yatyi? Ovinyingi-ale vitukalesa nehambu, mahi otyinene-po vali, omokonda tutanga apeho Ondaka ya Huku, ya tulikwatehila umwe tulinge etyi ipopia. — Tanga Tiaku 1:​22-25.

3. Ouwa patyi tupola-ko tyina tulandula etyi tutanga Mondaka ya Huku?

³ Tyina “tulinga ovanthu vokulinga etyi tyipopia ondaka,” tupola-ko oviwa ovinyingi. Tyimwe twii okuti, otyo vala matyitutwala kokuhambukiswa Siovaa, noonthwe mwene atuhambukwa. (Omup. 12:13) Tyina tulinga etyi tutanga Mondaka ya Huku, tukala nawa na vakwetu meumbo, tukala noupanga omuwa na vakwetu tufenda navo. Tyili otyo umwe tulwete. Tupu tuti umwe nokuyovoka kovitateka ovinyingi vikondya naava vahalandula etyi Siovaa apopia. Tyapopile Ohamba Ndaviti otyili umwe. Etyi motyiimbo aimba apopia-mo ovitumino vya Siovaa nonomphela mbae, pokuvitula ati: “Una weendela-mo upewa elao enene.” — Ovii. 19:​7-11.

4. Omokonda yatyi ha apeho tyipepuka okulinga etyi tutanga Mondaka ya Huku?

⁴ Ha apeho tyapepuka okulinga etyi tutanga Mondaka ya Huku. Namphila tuna ovilinga ovinyingi, mahi no ngootyo tuna okwovola omuvo wokutanga nokulilongesa Ombimbiliya, atunoñgonoka etyi Siovaa ahanda tulinge. Matutale ovipuka mavitukwatesako tutyivile okutanga apeho Ondaka ya Huku, atutale etyi tuna okulinga tutyivile okusoka kweetyi tutanga, pahe atutale otyityi matyitukwatesako tulinge etyi tutanga.

OVOLA OMUVO WOKUTANGA ONDAKA YA HUKU

5. Ovilinga patyi vitumana omuvo?

⁵ Ovanyingi povanthu va Siovaa, vena ovilinga ovinyingi. Ovanyingi omuvo wavo veumanena umwe movipuka Ombimbiliya ipopia okuti ovio viesukisa vali. Vamwe vena okuundapa unene opo velitekule, nokutekula eumbo. (1 Tim. 5:8) Ovakwavo vatekula vavo vavela, naava vakulupa. Atuho tuna evi tuna okulinga opo tukale nekongoko likahi nawa, ya otyo tyisukisa omuvo. Tupu tuna ovilinga ovikwavo mewaneno. Otyilinga otyinene vali tuna okulinga, okwivisa oviwa ovipe. Namphila tuna ovilinga ovinyingi, mahi no ngootyo tuna okutanga Ombimbiliya ononthiki mbatyo ambuho, atusoko kweetyi tutanga, atulingi etyi ipopia.

6. Oityi molingi tyokutanga Ombimbiliya tyilinge otyipuka upaka komutwe? (Tala olutalatu.)

⁶ Okutanga Ombimbiliya otyo otyipuka “tyesukisa vali.” Onthwe vanthu va Huku otyo umwe otyipuka tuna okusuka vali natyo. (Fili. 1:10) Omukanda Oviimbo, pokwapopia omunthu una ehambu wati: “Uhambukwa omunthu uhambukilwa ovitumino vya Siovaa, utanga ovitumino Viae nondaka yavova na tyitenya na tyinthiki.” (Ovii. 1:​1, 2) Naina, tuna umwe okusuka natyo tyokutanga Ombimbiliya. Oola patyi ove motange Ombimbiliya? Otyo tyitei ku munthu na munthu. Mahi oola ikahi nawa oyei maitavela umwe okutanga-tanga apeho. Umwe utiwa o Victor wati: “Namphila nehetyityiliyile-ale tyokupinduka-po komuhuka, mahi ndyityihole tyokutanga Ombimbiliya komuhuka mokonda opo petupu ovipuka ovinyingi vinthalula. Momutwe nkhele mutupu ovinyingi, ndyityivila umwe vala okwiika omutwe mweevi ndyikahi nokutanga.” Okuti no kwoove oola oyo ikahi nawa? Lipula okuti: ‘Mwene kwaame oola patyi ikahi nawa pala okutanga Ombimbiliya?’

SOKA KWEETYI UTANGA

7-8. Oityi tyipondola okutulingisisa atuhapolo nawa ouwa kweetyi tutanga? Tutyeeleka natyi?

⁷ Tyakaka unene movanthu tyokutanga umwe unene, mahi otyo wehena-le etyi ukopa-mo mweetyi uli nokutanga. Okuti nthiki imwe ove una-le etyi watangele, apakala vala kapii tyina ukati ñgaa kuhinangela-le vali etyi ankho uli nokutanga? Atuho vala otyo twetyilinga-linga-le. Ine katulunguka, no pokuntanga Ombimbiliya otyo umwe tyipondola okutweenda ngootyo. Pamwe tupondola okupanga atuti, monthiki mandyitanga-tanga ovikapitulu vilifwe apa. Otyo tyikahi nawa. Nga twapanga ngootyo, pahe tuna umwe okulikwatehila tulinge etyi twapanga. (1 Kol. 9:26) Mahi etyi tyokutanga Ombimbiliya onthyimbi vala, onthyimbi imwe ongwa, mahi onthyimbi vala. Opo tukope umwe nawa-nawa oviwa Mondaka ya Huku, pena vali otyipuka otyikwavo twesukisa okulinga.

⁸ Otyo tupondola okutyieleka ñgaa: Ombila okuloka otyiwa mokonda tyikulisa ovikuna. Mahi ine ombila iloka vala unene momapia amutalama omeva, opo pahe ovikuna kavikulu vali. Naina, tyina ombila yamalingi onyingi kaikulisa ovikuna. Mwene eheke liahanda okuti alilokwa nkhele alitokotelwa kapii opo ovikuna vikule. Nokutanga Ombimbiliya haityo ñgoo, ine tuhateka vala unene, kamatutyivili okukopa-mo onondunge, nii kamatuhinangela etyi twatanga. — Tia. 1:24.

9. Oityi tuna okulinga ine tuhole okutanga vala okukuluminya pokutanga Ombimbiliya?

⁹ Nthiki imwe watalele-ale ñgaa tyina uli nokutanga Ombimbiliya ngoti una vala nokukuluminya? Oityi una okulinga? Pokutanga lipulukwa. Likwatehila umwe utie otyo utanga otyo usoka, nokusoka kweetyi watanga-le. Tyimwe una okulinga, okukala umwe omuvo utiwa oyou, utyivile okuti ove utanga, ove usoka kweetyi uli nokutanga. Otyikwavo okutanga onovelesikulu mbehehi, omuvo wahupa-po aulingi wokusoka kweetyi watanga. Victor twapopia-le wati: “Ame tyina namati pokutanga Ombimbiliya hitange unene, pamwe ndyitanga vala okapitulu keke. Mokonda ndyitanga komuhuka-huka, komutenya oku ndyihimama nokusoka kweetyi natanga.” Atyiho vala wamakoyo pokutanga Ombimbiliya, otyipuka tyesukisa una okulinga, okulipulukwa na utyivile okukopa-mo onondunge mweetyi uli nokutanga. — Ovii. 119:97; tala okakasa kati: “Evi Una Okulipula Pokutanga.”

10. Popia-po tyimwe tyilekesa oityi una okulinga upole ouwa kweetyi watanga. (1 Ova Tesalonika 5:​17, 18)

¹⁰ Otyipuka tyesukisa unene una okutala nawa, okutala ine ukahi umwe nokulinga etyi ukahi nokutanga m’Ombimbiliya, haola-ko utanga tupu hapapa-ko pelifwe omuvo utanga. Tyina watanga Ondaka ya Huku, lipula ñgaa: ‘Oityi ndyina okulinga ndyilandule etyi tyapopiwa apa, pehepano no komutwe oku?’ Opo utyitale oñgeni una okutyilinga, soka ñgeno uli nokutanga Ombimbiliya mu 1 Ova Tesalonika pahe oya mokapitulu 5:​17, 18. (Itanga.) Nga watanga onovelesikulu ombo onombali, ñgeno nkhele utalama-po kapii osoko komalikwambelo ove. Ulikwambela tuñgapi? Etyi ulikwambela tyitunda umwe komutima? Upondola okusoka kovipuka una okupandula momalikwambelo ulinga. Pahe upondola osoko oti, apeho tyina mandyilikwambela, nkhele ndyina okusoka kovipuka vitatu nahanda okupandula ku Siovaa. Ine uti tyina wamatange Ombimbiliya okala-po katutu nokusoka, moti umwe ove wiiva etyi Ondaka ya Huku yapopia, ove ulinga etyi yapopia. Pahe soka ñgeno ononthiki mbatyo ambuho utanga, uti otange osoko-po katutu. Tyotyili, mopolo-ko ouwa omunene. Mokulu mokulinga evi vipopia Ondaka ya Huku. Mahi pahe molingi ñgeni ine ulitala ñgaa ovinyingi vala ñgeno una okutala nawa?

PANGA UMWE ETYI MOVILI

11. Oityi pamwe tyipondola okutulemena? Popia-po tyimwe.

¹¹ Tyina utanga Ombimbiliya otale etyi una okulinga weendele mweetyi ipopia, pamwe tyipondola okukulemena. Soka ñgeno una nokutanga omukanda wa Tiaku, otange Tiaku 2:​1-8 ipopia okuti onthwe vanthu va Huku tuna okuliyunga kokapungulula. Pahe otyimono okuti noove una okulitala nawa omu utekulila vakwenyi, una ovipuka vimwe una okuyeka-po. Tyikahi nawa etyi welimona. Muhuka tye, otange Tiaku 3:​1-12 ipopia okuti otyiwa okutala nawa evi tupopia. Pahe ove pokulitala otyimono okuti pamwe uhole okupopia vakwenyi evi viehekahi nawa. Pahe olingi omphango oti, ndyina okupopia nawa vakwetu nokupopia evi vipameka. Tyina tyiti onthiki onkhwavo pokutanga, otange Tiaku 4:​4-12 itulondola kokulinga epanga liouye. Pokulitala apa otyimono okuti una okutala nawa ovipuka utalukwa navio. Tyina kutya onthiki onkhwavo pahe osoko umwe nawa kovipuka ovio aviho una okuviukisa, tyipondola okukulemena.

12. Ine utala ñgaa pokutanga Ombimbiliya pena ovipuka ovinyingi usukisa okuyeka-po tyehekusoyese. Omokonda yatyi? (Tala okatoi.)

¹² Ine utala ñgaa una ovipuka ovinyingi una okuviukisa, hamwe una okuyeka-po, wahasoye. Otyo tyilekesa vala okuti una omutima omuwa, ulikondola koututu, ya wahanda okulinga etyi tyaviuka. Ine tulinga ovanthu vokulikondola koututu, atulitale nawa matumono ovipuka tuna okuviukisa.a Tupu wahalimbwe-ko okuti, okulivaleka “omunthu omupe” katyipu. (Kolo. 3:10) Oityi una okulinga ulinge omunthu wokulinga etyi tyipopia Ondaka ya Huku?

13. Oityi una okulinga utyivile okulandula evi wapanga? (Tala olutalatu.)

¹³ Tyina wamatale una ovipuka ovinyingi wesukisa okulandula, wahatutumbe nokuvilinga vala like, panga omphango yokuti olingi-ko etyi, olingi-ko etyi, opo utyivile. (Omih. 11:2) Upondola okulinga ñgaa: Honeka ovipuka aviho wesukisa okulinga, pahe pwoovio okoyo-po tyike, okuti hatyo vivali, motetekela okulinga. Evi ovikwavo nkhele ovisi-po haa uvilinge nawa. Opi mohimbikila?

14. Povipuka upanga okutyi-pi una okuhimbikila?

¹⁴ Upondola okuhimbikila kweetyi tyekupepukila vali weete okuti motyivili okutyilinga. Okuti hatyo, upondola okuhimbikila kweetyi weete okuti wesukisa umwe unene okutyitala nawa. Tyina wametyimono etyi una okulinga, pahe ovolola momikanda vietu. Upondola okwovola mo Índice de Publicações da Torre de Vigia no m’Omukanda Wokuovolola wo Nombangi mba Jeova. Etyi wahanda okulinga tyipopia melikwambelo, oiti ku Siovaa ‘ekupake-tyo komutima, ekupe ononkhono mbokutyilinga.’ (Fili. 2:13) Pahe etyi welilongesa ngatyo umwe ulinga. Ine utala ñgaa etyi wapanga wetyivila, matyikupe vali ononkhono mbokulinga ovikwavo. Ngwe tyili ine ukati ñgaa ku tyimwe Huku ahanda onthwe tulinge ove ankho wehekahi nawa, pahe wetyivila ukahi nawa, opo no kovikwavo vali nkhele wehekahi nawa, motyivili.

YEKA ONDAKA YA HUKU “YUUNDAPE MWOOVE”

15. Oityi tutila ovanthu va Siovaa velikakela novanthu ovanyingi vatanga Ombimbiliya? (1 Ova Tesalonika 2:13)

¹⁵ Ovanthu vamwe vapopia okuti vatanga-tanga-le ehimbwe Ombimbiliya. Mahi okuti ngwe vetavela umwe etyi ipopia? Okuti veiyeka umwe yuundape muvo, ilulike evi valinga? Nii vala hatyoko-ale valinga! Mahi onthwe vanthu va Siovaa, ha ngootyo-ko tukahi. Onthwe tukahi umwe ngovalongwa votete va Kilisitu, twetavela Ombimbiliya, ‘okwitavelela umwe omu ngwe yakalela, tyokuti Ondaka ya Huku.’ Tupu tulikwatehila umwe tyimoneke okuti ili nokuundapa mwoonthwe, ilulika evi tulinga. — Tanga 1 Ova Tesalonika 2:13.

16. Oityi matyitukwatesako tulinge ovanthu vokulinga etyi tyapopia Ondaka?

¹⁶ Pamwe katyipepuka okutanga Ondaka ya Huku nokulinga etyi yapopia. Tyipondola okutupwiya okupanga umwe oola yatyo matutanga-tanga. Tupu pamwe tupondola okukuluminya vala pokutanga, atwehetyivili-ale okukopa-mo oviwa mweetyi tuli nokutanga. Pamwe tupu atusoyo tyina twamatale okuti pena ovipuka ovinyingi tuna okuviukisa. Siovaa mekukwatesako movipuka aviho vipondola okukulemena, otyivili. Naina, tutavelei tyina Siovaa etukwatesako opo twahalinge ovanthu vokutehelela vala valimbwa-ko, mahi tulinge ovanthu vokulinga etyi tyapopia Ondaka. Ngwe ine tutanga umwe apeho Ondaka ya Huku otyo tulinga etyi ipopia, matukala vali nehambu. — Tia. 1:25.