Okuti Ankho Utyii-ale?
Okuti ova Loma ankho vapondola okutavela omunthu vapapela momuti, ngetyi valingile Sesusi, akapakwe umwe tyipakwa ovanthu?
OVANYINGI vetyii okuti Sesusi pokuayendyelesilwe momuti ankho uli pokati kovanthu vevali onondingavivi navo vapapelwa momiti. (Mat. 27:35-38) Namphila etyi Ombimbiliya yapopia tyiiwe umwe nawa, mahi ovanyingi kavetavela okuti tyili Sesusi waviukaisilwe umwe nawa, akapakwa meendo. — Malu. 15:42-46.
Ovanthu vatyo ovo vati omunthu ngo oo wapapelelwe, kapakwa ngeetyi mwene tyipakwa ovanthu. Umwe utiwa o Ariel Sabar una momukanda ahoneka oityi vasokela ngotyo. Wati: “Omunthu upapelwa mekulusu, oyou umwe walinga otyivi otyinene motyilongo. Vamwe vokuatanga unene, vati kova Loma ankho no momutwe watyo vala katyiya-mo-ale okuti ovanthu ngovo vakapakwa umwe nawa ngeetyi mwene tyipakwa ovanthu.” Muene ova Loma, ovanthu vatyo ngo ovo ankho vahanda valingwe umwe etyi tyiveundula motyilongo, omalutu atyo ayendyelela vala momuti, atalwa vala ngatyina otyinyama tyohika. Tyina amakala omo ngotyo, pahe evi haa viamesala-sala-mo vikayumbwa vala metoto limwe muyumbwa vala ovivimbi.
Menima 1968 vavasa omankhipa omunthu wapapelelwe momuti pononthiki mbono apositolu. Veevasa meendo limwe lili konthele ko Selusalei. Eendo umwe likahi vala ngomaendo omakwavo ova Sundeu ankho vapakwa. Pomankhipa atyo oo pena omankhipa otyikomeko. Apapelwa nopeleko motyivai tyina ono sendimetulu 11,5. Sabar wapopia wati: “Omankhipa atyo oo otyikomeko o omulume umwe ankho utiwa o Yehochanan. Otyo tyiteta umwe ondaka yakala-po omanima nomanima. Naina etyi tyapopia ono Evandyeliu otyili umwe tyokuti Sesusi wapakelwe. Okuavasa omankhipa a Yehochanan otyikomeko meendo, tyalekesa umwe okuti pononthiki mba Sesusi, ova Loma vayekaile ova Sundeu vakapake omunthu ngo oo ankho wapapelwa mekulusu.”
Pahe okuatalela komankhipa oo, nkhele ovanyingi velipula-ñgo okuti: Sesusi pokuapapelwa momuti wakalele-mo ñgeni? Mahi etyi tyayandyuluka umwe nawa okuti, vamwe ankho vatiwa umwe tyili valinga ovivi, mahi avakapakwa umwe nawa, kavakayumbwahi vala. Tyimoneka umwe nawa okuti etyi Ombimbiliya yati olutu lwa Sesusi luapakelwe umwe meendo, naina otyili umwe. Otyo tya Yehochanan tyiyaka-mo umwe nawa muetyi Ombimbiliya yapopia-le.
Siovaa wapopile okuti tyina Sesusi amaipawa, makapakwa peendo liovahona, iya nawike ankho upondola okutyika otyipuka otyo opo tyahalingwe. — Isa. 53:9; 55:11.