1 Ova Kolindu
1 Ame Paulu, una Kilisitu Sesusi aihana opo akale o apositolu kehando lya Huku, kumwe nomukuatate wetu Sositene, 2 tutuma omukanda ou ku onwe mukahi mewaneno lya Huku ko Kolindu, onwe vokuasukukiswa kumwe na Kilisitu Sesusi, amuihanwa opo mukale ovasukuki, kumwe novo konomphangu ambuho vekahi nokunoñgonoka Tatekulu Sesusi Kilisitu, Tatekulu yetu atuho:
3 Kalei nokankhenda okanene ka Huku, nombembwa itunda ku Huku Tate yetu, tupu Tate ya Tatekulu Sesusi Kilisitu.
4 Ame apeho ndyimupandulila-ko ku Huku yange, mokonda yokankhenda okanene ka Huku muapewa menyina lya Kilisitu Sesusi; 5 mokonda movipuka aviho onwe muakaleswa ovahona mwe, mounongo omunene wokupopia, no menoñgonoko enene, 6 mokonda oumbangi konthele ya Kilisitu wapamekua pokati kenyi. 7 Moluotyo, onwe muna ovipuka aviho viesukisa putyina mukevela Tatekulu yetu Sesusi Kilisitu aholololwe. 8 Tupu memukalesa tyapama alo konthyulilo opo muhahungwe otyipuka natyike monthiki ya Tatekulu yetu Sesusi Kilisitu. 9 Huku omukuatyili, una wemuihana opo mukale kumwe* Nomona wae, Sesusi Kilisitu Tatekulu yetu.
10 Pahe ndyimulondola vakuatate, okuti menyina lya Tatekulu yetu Sesusi Kilisitu, onwe amuho muna okupopia otyipuka tyike, pokati kenyi pahakale omaliyapauko, mahi kalei tyelikuata okapandi nomutima wike, nokusoka monkhalelo ike. 11 Mokonda vamwe vomeumbo lya Koloe vamphopila okuti pokati kenyi vakuatate vange, pena onondyaya. 12 Etyi nahanda okupopia okuti, kese umwe pu onwe, tyiti ou uti: “Ame ndyiwa Paulu,” “ou uti ame ndyiwa Apolu,” “ou uti ame ndyiwa Sefa,”* “omukuavo uti ame ndyiwa Kilisitu.” 13 Okuti Kilisitu weliyapuka? Okuti Paulu wapapelelue momuti pala onwe? Ine onwe muambatisalwa menyina lya Paulu? 14 Ame ndyipandula Huku mokonda pu onwe hambatisalele-po vali nawike, o Kilisipu vala na Gaiu, 15 ngotyo nawike mapopi okuti onwe muambatisalwa menyina liange. 16 Tupu nambatisala vomeumbo lya Sitefana. Mahi po vakuavo hityii inkha ndyina vali ou nambatisala. 17 Mokonda Kilisitu kanthumine opo ndyimbatisale, mahi wanthuma opo ndyiivise onondaka onongwa; kanthumine opo ndyipopie onondaka mbovanthu vokualongeswa unene, opo omuti* wemone wa Kilisitu uhakale tyihena esilivilo.
18 Mokondoka okulongesa konthele yomuti* wemone owova ku vana vekahi nokuenda kehanyauno, mahi ku onthue vokukahi nokuyovolwa, otyo epondolo lya Huku. 19 Mokonda tyahonekwa okuti: “Mandyikamana-ko enoñgonoko liovanongo iya andyikaanya* ounongo wo vokuatanga unene.” 20 Omunthu omunongo ulipi? Omuhoneki wovitumino ulipi? Wokupopia konthele yovipuka viouye uno ulipi? Huku kalekesile okuti ounongo wouye ou owova? 21 Ovanthu vouye uno kavanoñgonokele Huku tyetyi vayumba onthumbi mounongo wavo. Etyi tuivisa, ku vamwe katyisilivila mahi nonondaka ombo Huku watokola okuyovola vana vetavela. Ngotyo ounongo wa Huku walekesua nawa.
22 Mokonda ova Sundeu vaita omanyingilikilo iya ova Geleku vaovola ounongo; 23 mahi onthue tuivisa Kilisitu waipaelua momuti, iya kova Sundeu otyo emanya lipundukisa, mahi ku vana veheva Sundeu owova. 24 Mahi ku vana vaihanwa, ova Sundeu nova Geleku, Kilisitu epondolo lya Huku nounongo wa Huku. 25 Tyetyi ovipuka vya Huku ovanthu vasoka okuti ovioulai, vina vali ounongo tyipona ovanthu, iya ovipuka vya Huku vasoka okuti kaviapamene, viapama vali tyipona ovanthu.
26 Vakuatate, onwe mueete onkhalelo Huku emuihana, pokati kenyi petupu ovanongo ovanyingi mokusoka kuovanthu, vokuna epondolo havanyingi-ko, vokuatunda monombunga mbomunkhima havanyingi-ko. 27 Mahi Huku waholovona ovipuka vioulai viouye opo akundise ovanongo; iya Huku waholovona ovipuka vihapamene viouye opo akundise ovipuka viapama; 28 iya Huku waholovona ovipuka vihasilivila viouye, novipuka viatombwa, novipuka vihe-vio, opo apake pombuelo ovipuka ovanthu vatala okuti viakolela, 29 opo pahamoneke omunthu* ulipaka kounene komaiho a Huku. 30 Mokonda ya Huku mukahi kumwe na Kilisitu Sesusi, una wakala ounongo watunda ku Huku, nouviuki, nousukuki, neyovo pala onthue mokonda yofeto yeyovo. 31 Opo tyikale ngetyi tyahonekwa okuti: “Una ulipanda, elipandele mu Siovaa.”