Okulilongesa Ombimbiliya no Nombangi mba Siovaa tyekukwatesako okunoñgonoka otyili. Etyi welilongesa tyekukwatesako okukala epanga lya Huku. Wamona oñgeni Siovaa atekula nawa ovanthu vae hono. Pahe ukevelela okukakala nomwenyo wahapu mouye omupe pano pohi. Onthumbi una Mondaka ya Huku yapamekwa vali. Pahe wayambwa unene na Siovaa, una omapanga omawa mewaneno. — Sak. 8:23.

Mokonda wahanda okumbatisalwa, otyiwa mutomphole novakulu vewaneno omapulo eli pombwelo, opo uhinangele ovipuka viesukisa vali Ombimbiliya ipopia. (Hemb. 6:1-3) Ine ulikwatehila, Siovaa nae mekukwatesako, komutwe wandyila ekekupa oviwa. — Swau 17:3.

1. Oityi wahandela okumbatisalwa?

2. Siovaa olie?

• “Siovaa oe o Huku yotyotyili, oe keulu, keulu lieheke oe pohi, mombwelo yeulu. Kutupu vali Huku omukwavo.” — Epal. 4:39.

• “Ove wokutiwa o Siovaa, ove vala Omukulami kombanda yohi aiho.” — Ovii. 83:18.

3. Omokonda yatyi otyiwa utumbule enyina lya Huku?

• “Onwe likwambelei ñgaa: ‘Tate yetu keulu, enyina liove lisukukiswe.’” — Mat. 6:9.

• “Omunthu ukalavandya enyina lya Siovaa makayovoka.” — Loma 10:13.

4. Oñgeni Siovaa apopiwa vali m’Ombimbiliya?

• “Siovaa Omutungi wohi, okuhimbikila komwoyo wa nthele imwe atee komwoyo omukwavo, o Huku ya apeho.” — Isa. 40:28.

• “Tate yetu keulu.” — Mat. 6:9.

• “Huku olwembia.” — 1 Swau 4:8.

5. Oityi upondola okwaavela Siovaa Huku?

• “Humba Siovaa Huku yove, muhumba nomutima wove auho, nohande yove aiho, nonondunge mbove ambuho, nononkhono mbove ambuho.” — Malu. 12:30.

• “Fenda Siovaa Huku yove, oe vala una okulingila ovilinga vikola kwapwa.” — Luka 4:8.

6. Oityi ove wahandela okutavela ku Siovaa?

• “Kala omuna-ndunge mona wange, hambukiswa omutima wange, ame ndyityivile okukumbulula ou wokwahanda okulitalelapo naame.” — Omih. 27:11.

7. Okulie una okulikwambela? Una okulikwambela menyina lialie?

• “Ame [Sesusi], ndyimutolela otyili, otyipuka mwiita ku Tate, memwavela-tyo menyina liange.” — Swau 16:23.

8. Ovipuka patyi upondola okwiita pokulikwambela?

• “Onwe likwambelei ñgaa: ‘Tate yetu keulu, enyina liove lisukukiswe. Ouhamba wove uye. Etyi wahanda, tyilingwe-vo pohi ngeetyi tyilingwa keulu. Twaavele-vo okulia kwo hono; twevele onongele mbetu, ngeetyi noonthwe tweevela ava vetulevala. Wehetuyeke tuyondywe, tuhukulule kondingavivi.’” — Mat. 6:9-13.

• “Onthwe twayumba-ko onthumbi kwe, tutyii okuti etyi vala twamaiti tyiyemba kweetyi ahanda, una utwiiva.” — 1 Swau 5:14.

9. Siovaa pamwe katehelela omalikwambelo amwe mokonda yatyi?

• “Opo yatyo opo, mavakakalavandya Siovaa evekwateseko, mahi kamekevekumbulula . . . mokonda yovivi valinga.” — Mik. 3:4.

• “Omaiho a Siovaa eli konondingaviwa, aa omatwi ae eveiva tyina velivondela, mahi otyipala tya Siovaa tyitala omapita ava valinga ovivi.” — 1 Pet. 3:12.

10. Sesusi Kilisitu olie?

• “Simau Petulu akumbulula ati: ‘Ove, ove Kilisitu, ove Mona wa Huku una omwenyo.’” — Mat. 16:16.

11. Oityi Sesusi eililile pano pohi?

• “O Ngomona womulume, kaendelele okuundapelwa, waendela okuundapela vakwavo nokwaava omwenyo wae ayovole ovaunyingi.” — Mat. 20:28.

• “Ame [Sesusi] ndyina okukapopia oviwa ovipe Viouhamba wa Huku no komapunda-umbo omakwavo, mokonda otyo natumwa.” — Luka 4:43.

12. Oityi una okulinga upandule etyi Sesusi ekunkhila?

• “Wankhila umwe aveho opo ava vena omwenyo vahalinge vala tyavo mwene, mahi valingile ou wevenkhila apindulwa-po.” — 2 Kol. 5:15.

13. Oityi Siovaa aavela Sesusi?

• “Outumini auho neupewa, tyilinge keulu, tyilinge pohi.” — Mat. 28:18.

• “Otyo Huku emuvialekela emupake kounene, mokankhenda kae emupe enyina enene vali komanyina atyo aeho.” — Fili. 2:9.

14. Ove utavela okuti Ononkhalamutwe mbo Nombangi mba Siovaa ovo “omupika omukwatyili, walunguka?” Utavela okuti otyilinga otyo vetyipewa na Sesusi?

• “Olie nanyo omupika omukwatyili, walunguka, ou mwene weumbo aholovona ape vo meumbo liae okulia mononthiki mbatyo mbanakwa?” — Mat. 24:45.

15. Okuti omphepo ikola omunthu?

• “Oandyu aimukumbulula aiti: ‘Omphepo ikola oyo maiya mwoove, ononkhono Mbomukulami mambukulingila okahi. Otyo omona mokutula matilwa omukwa-ukola, Omona wa Huku.’” — Luka 1:35.

• “Naina, ine onwe ovana venyi muvepa oviwa, ngwe muvapengesi, ya pahe Tate keulu, oe wahamape omphepo ikola ava vemwiita!” — Luka 11:13.

16. Ovipuka patyi Siovaa alinga nomphepo yae ikola?

• “Eulu liatungwa nondaka ya Siovaa. Atyiho tyili-mo tyatungwa nomphepo yo momulungu wae.” — Ovii. 33:6.

• “Onwe mamupewa ononkhono tyina omphepo ikola yamemulaukila, mamukalinga onombangi mbange . . . atee konohika mbokokule-kule kombanda yohi.” — Ovil. 1:8.

• “Petupu onthiki eulo liahindilwe nomunthu, mahi ovalume pokwapopia vapopia tya Huku omu vatahelwa nomphepo ikola.” — 2 Pet. 1:20, 21.

17. Ouhamba wa Huku oityi?

• “Huku keulu, makapaka-ko ouhamba wahakahanywa-ko vali. Ouhamba oo, kaukalinga vali wovanthu ovakwavo. Ouhamba oo, oo maukatyopa-tyopa omauhamba oo aeho, maukeehanya-ko, ngao vala ukatumaina apeho.” — Ndan. 2:44.

18. Ovipuka patyi oviwa Ouhamba wa Huku maukekulingila?

• “Ngwe makasekuna ononkhuka momaiho avo, kakukankhiwa vali, kakukalilwa vali, kakukaululwa vali onkhwo, nii onongembia kambukakala-ko vali. Ovipuka vyo kohale vialamba-le.” — Ehol. 21:4.

19. Oityi tyikupa onthumbi yokuti apa katutu Ouhamba wa Huku maweeta oviwa?

• “Ovalongwa avafwene pwe aveke, avati: ‘Nkhele tupopile, ovipuka ovio mavimoneka nalupi? Oityi matyilingi otyilekesa tyokuti ove weya-le, ou ouye wehika konthyulilo?’ Sesusi evekumbulula okuti: ‘. . . Otyilongo matyikalwisa otyilongo otyikwavo, omauhamba maakalwisa omauhamba, okulia makukahepa, ponohika ononyingi mapakakwata ovinimawe. Oviwa ovipe Viouhamba, mavikapopiwa kombanda yohi aiho, ovanthu aveho vomihoko nomihoko mwene avekeliivilako, onthyulilo pahe aiya.’” — Mat. 24:3, 4, 7, 14.

• “Mahi kala tyityii okuti, ononthiki mbahulilila mambukalinga ononthiki mbalema, ononthiki mbepwiya okukala. Ovanthu mavakalinga vokulihole evo mwene, vokuhole onombongo, vokulimphanda, vokulipaka-ko, vokwatomba evi vikola, vehetavela ko vohe, vahapandula, vemphinia, vehena olwembia, vokwahatehela ku vakwavo, ovatendeleyi, vehelikondola mutima, ovinyama, vehehole otyiwa, vokweenda vakwavo konyima, vonkhango, vepwila melungavi, vehole vali evi vivehambukiswa avehesuku na Huku, veliuunda umwe otyivala tya ava vafenda, mahi pomuhipa watyo wefendelo avaheve-po.” — 2 Tim. 3:1-5.

20. Oityi una okulinga ulekese okuti Ouhamba wa Huku wesukisa unene?

• “Onwe apeho ovolei tete Ouhamba, ovolei ouviuki wa Huku.” — Mat. 6:33.

• “Pahe Sesusi apopila ovalongwa vae ati: ‘Ou wahanda okundandula, una okulilimbwa, elityindila omuti wae wemone, andandula.’” — Mat. 16:24.

21. Satanasi olie? Ovilulu ovalie?

• “Onwe mwatuka umwe mu tate yenyi Eliapu . . . Tate yenyi nkhele tya nthyimbi omwipai.” — Swau 8:44.

• “Enyoka enene aliyumbwa mombwelo, enyoka liokonthuko, litiwa Eliapu, litiwa o Satanasi, eli lili nokuyapula ovanthu kombanda yohi aiho; nalio nonoandyu mbalio vayumbwa mombwelo.” — Ehol. 12:9.

22. Oityi Satanasi atendeleya Siovaa novanthu vemufenda?

• “Omukai apopila onyoka ati: ‘Tupondola okulia ovinyango aviho vyo motyitaka. Mahi otyinyango tyomuti ukahi pokati kotyitaka, Huku wati: “Mwahaliei-ko nii mwahakwatei-ko; okukwata-ko vala mamunkhi.”’ Mahi onyoka aipopila omukai okuti: ‘Onwe mwene tyili kamamunkhi-ale. Huku wapopia vala mokonda utyii okuti monthiki mulia-ko, omaiho enyi maaikuka, amukala nga Huku, amunoñgonoka otyiwa notyivi.’” — Ehim. 3:2-5.

• “Satanasi akumbulula Siovaa ati: ‘Mahi pononkhia omunthu uyeka-po etyi ena-tyo opo ahupe. Omunthu mahande ayovole omwenyo wae.’” — Som. 2:4.

23. Oityi una okulinga ulekese okuti Satanasi wakemba?

• ‘Lingila [Huku] nomutima auho.’ — 1 Ehi. 28:9.

• “Ame onwe himuti muviukisa! Ame mo tyokwaviuka hitundu, ndyikankhila-mo!” — Som. 27:5.

24. Oityi ovanthu vankhila?

• “Ongeetyi kombanda yomunthu wike vala onkhali yanyingila mouye, ononkhia ambunyingilila monkhali, pahe ononkhia mbahahana movanthu aveho, mokonda aveho vena onkhali.” — Loma 5:12.

25. Okuti vokwankhia vena etyi vei?

• “Vokuna omwenyo vetyii okuti mavankhi, mahi ava vokwankhia kavei vali natyike.” — Omup. 9:5.

26. Vokwankhia mavakalingwa ñgeni?

• “Onondingaviwa mavakatutila naava vehenondingaviwa mavakatutila.” — Ovil. 24:15.

27. Ovanthu veñgapi mavaende keulu vakatumine na Sesusi?

• “Tala! andyimono Ondyona itai Komphunda Siyau, ili peke no vokuna 144.000, vahonekwa monombamba mbavo enyina liae no lya Tate yae.” — Ehol. 14:1.

Mokulilongesa Ombimbiliya, wanoñgonoka oityi Siovaa ahanda ulinge, tupu wanoñgonoka ovitumino viae. Hamwe wayekapo okulinga ovipuka vimwe viehekahi nawa opo weendele mweetyi welilongesa m’Ombimbiliya. Mokonda pahe ove weendela movitumino vya Siovaa, motyivili okumulingila.

Matulilongesa omapulo amwe maekukwatesako okunoñgonoka umwe nawa ovitumino vya Siovaa, otale etyi wesukisa okulinga opo Siovaa etavele ovilinga viove. Nga welilongesa ovipuka ovio, motale okuti ine ulinga ovipuka oviwa, mohambukiswa Siovaa, omutima wove aukala pomphangu. — 2 Kol. 1:12; 1 Tim. 1:19; 1 Pet. 3:16, 21.

Ove wanoñgonoka-le ovipuka ovinyingi, pahe wahanda okutavela ku Siovaa, nokukala meongano liae. Omapulo aa nonotesitu mbatyo maekukwatesako okutala etyi una okulinga utavele ku Siovaa, tyilinge mewaneno, tyilinge meumbo, na tyina umwe tyiya pokutavela kovatumini. Matyikuhambukiswa unene okutala etyi Siovaa alinga opo alongese ovanthu vae, neetyi alinga opo apameke onthumbi yavo. Tyimwe etwavela omaliongiyo. Likwatehila wende apeho komaliongiyo, oave omakumbululo.

Onthele ei tupu maipopi omokonda yatyi tyesukisila okwenda apeho movilinga viokwivisa, okwatesako ovanthu okunoñgonoka Siovaa, nokunoñgonoka etyi meketulingila. (Mat. 24:14; 28:19, 20) Pahe haa motale oityi wesukisila okulipakula ku Siovaa ombatisalwa. Mokonda Siovaa wekulinga okankhenda okanene, uhambukwa unene tyina atala ononkhono ulinga opo umuhambukiswe.

1. Ovalie vena okulinepa? Ombimbiliya ipopia okuti velihenga vala tyina mukwavo alinga-tyi?

• “Onwe kamwetyitangele okuti wokwevetunga, nkhele tya ponthyimbi wevetunga omulume nomukai. Alandulisa-ko okuti: ‘Otyo omulume masila-po he na ina, ekelikwata-po nomukai wae, poyavo vevali avakalinga ohitu ike’? Opo pahe, ovo kavalingi vali vevali, ohitu ike vala. Naina, etyi Huku apandeka kokanga ike, omunthu ehetyipandulule. . . . Ou uhenga omukai wae tyehena okuti walinga ouhayo wokulihanda, akanepa omukwavo walinga onkhali youmbalehi.” — Mat. 19:4-6, 9.

2. Tyina omulume nomukai vakala-le aveho, omokonda yatyi vesukisila okuhonekesa otyinepo tyavo ku kaputu? Ine ove wanepa aa wanepwa, mwelihonekesa-le ku kaputu?

• “Wahayekeko okuvehinangelesa, valinge ovanthu vetavela, valinga umwe tyatunda konohamba no kovatumini.” — Titu 3:1.

• “Otyinepo tyilingilwe onthilo pokati ka aveho, ou oula waava velinepa wahakale nonkhako, mokonda Huku makaongela omphela ovanthu ovihayo kokulihanda, no vo viomaumbalehi.” — Hemb. 13:4.

3. Otyipi otyilinga tyomulume, nomukai, no vohe, novana meumbo?

• “Mona wange, tavela ho tyina ekuviyula, wahalimbwe onondunge ulongwa na nyoko.” — Omih. 1:8.

• “Omulume, omutwe womukai wae ngeetyi Kilisitu omutwe wewaneno. . . . Valume, lingei vokuhole ovakai venyi ngeetyi Kilisitu ehole ewaneno, elipakulila-lio.” — Efe. 5:23, 25.

• “Onwe vokuna ovana, mwahanumanesei ovana venyi, mahi onwe apeho velongei onondunge, velongesei tya Siovaa.” — Efe. 6:4.

• “Onwe vana, tavelei ko voho movipuka aviho, otyo otyo tyihambukiswa Tatekulu.” — Kolo. 3:20.   

• “Vakai, tavelei kovalume venyi.” — 1 Pet. 3:1.

4. Oityi twesukisila okuhumba omwenyo?

• “[Huku] wapa ovanthu aveho omwenyo, nomphepo vafima, novipuka aviho. . . . Onthwe tuna tupu omwenyo oe, twenda-enda tupu oe, tuli tupu kouye oe.” — Ovil. 17:25, 28.

5. Katupondola okwiipaa omunthu, nolukembe vala luli meimo mokonda yatyi?

• “Ine ovalume valwa avapumu omukai umwe omulemi, . . . ine pakala ononkhia, wokwaipaa nae una okwipawa.” — Oku. 21:22, 23.

• “Omaiho ove amona-le pweetyi ndyiyiyi vala. Atyiho ankho tyahonekwa-le momukanda wove ononthiki atyiho tyalingwa, tyahonekwa-le pweetyi nkhele tyeheko-ale.” — Ovii. 139:16.

• “Siovaa [uyele] . . . omavoko amomesa ohonde yomunthu wehena etyi alinga.” — Omih. 6:16, 17.

6. Otyitumino patyi Siovaa etwavela tyayemba kohonde?

• “Liyungei apeho . . . kohonde, no ku evi viakamwa.” — Ovil. 15:29.

7. Tuna okuhumba vana tufenda navo mokonda yatyi?

• “Ame ndyimupa otyitumino otyipe, lilingei olwembia na vakwenyi, ngeetyi ame nemulinga olwembia, noonwe lilingei olwembia na vakwenyi. Ovanthu aveho mavetyimono vala okuti muvalongwa vange — tyina mulilinga olwembia na vakwenyi.” — Swau 13:34, 35.

8. Omunthu pamwe una ouvela umwe ulitambuliswa. (a) Omunthu wokuna ouvela oo kapondola okuhumbakana vakwavo nokuvepa onombesu mokonda yatyi? (b) Ine vakwavo kavemukongo vakalie nae kapondola okunumana mokonda yatyi? (c) Ine omunthu umwe walingaile ovipuka vipondola okumukalesa nouvela ulitambuliswa, omokonda yatyi otyiwa akatalwe kosipitali tyina nkhele ehenehimbike okulihanda nomunthu umwe? (d) Omokonda yatyi omunthu una ouvela ulitambuliswa esukisila okutyipopila ovakulu vewaneno tyina nkhele ehenembatisalwe?

• “Mwahakalei nongele ya munthu, ongele muna-yo vala o yokulilinga olwembia na vakwenyi. . . . ‘Humba mukwenyi ngeetyi ove ulihole.’ Uhole ovanthu kalingi mukwavo otyivi.” — Loma 13:8-10.

• “Amwahatale vala kweetyi onwe mwene musuka natyo, amutale no kweetyi vakwenyi vesuka-vo natyo.” — Fili. 2:4.

9. Oityi Siovaa ahandela tweevele vakwetu?

• “Liatelei-ko vala kovipuka vakwenyi vemulinga, amulieevela na vakwenyi tyahasimo, ine umwe, una etyi wayala mukwenyi alinga. Ngeetyi Siovaa emweevela umwe ahasimo, noonwe otyo mulinge.” — Kolo. 3:13.

10. Oityi una okulinga ine mukwenyi mewaneno ukutendeleya oo ukuvaka tyimwe?

• “Ine mukwenyi wekulinga etyi tyapenga, enda-ko, mulekesa etyi apengesa, tyilinge vala tyenyi vevali kwapwa. Ine wekutavela, opo wayovola mukwenyi. Mahi ine kekutavelele, opo endei-ko vevali, okuti hatyo, vetatu, mokonda tyina otyipuka tyina onombangi vevali hamwe vetatu, tyilinga otyili. Tyina navo ehevetavelele, kapopile ewaneno. Tyina ehetavela umwe no kewaneno, akale ngatyina omunthu wouye, alinge vala ngatyina omutanthi welilimu.” — Mat. 18:15-17.

11. Ovipuka evi viapopiwa pombwelo Siovaa uvitala ñgeni?

▪ Ouhayo wokulihanda

▪ Okufenda ovilolo

▪ Ovalume valala na valume vakwavo

▪ Okuvaka

▪ Okuyumba umonene-mo onombongo

▪ Okunwa unene

• “Mwahayondywei. Ava velipaka mouhayo wokulihanda, vokufenda ovilolo, vomaumbalehi, ovalume velipaka mokuhanda valume vakwavo, ovalume vakalela vala okulala na valume vakwavo, ovimphulu, velungavi, vokunwa unene, vokuleva, vokupunda vya vakwavo, aveho ovo kavakapiñgana Ouhamba wa Huku.” — 1 Kol. 6:9, 10.

12. Ouhayo wokulihanda oputyina omukai nomulume vehenelihonekese valala kumwe. Oñgeni ove utala otyipuka otyo?

• “Tilei ouhayo wokulihanda!” — 1 Kol. 6:18.

13. Katupondola okunwa ovihemba vikoleswa, vikalesa novipepe nokunyona onondunge mbomunthu, mokonda yatyi?

• “Omalutu enyi alinge otyilikutila tyina omwenyo, tyikola, tyitavelwa na Huku, mulinge ovilinga vikola nonondunge. Tyiyekei-po tyokukamangwa nouye uno, mahi pilulukei, omalusoko enyi alinge omape, noonwe mwene mutyimone umwe etyi Huku ahanda otyiwa, tyaviuka, tyaoya.” — Loma 12:1, 2.

14. Ovipi ovipuka vimwe vielikwata novilulu Siovaa ailika?

• “Pwoonwe . . . pahakale nawike utapesa, watambula, wonombale, onganga, una otyiteta, ukaovola omutali, otyitapi, pahakale nawike woovola okupopia no vokwankhia.” — Epal. 18:10, 11.

15. Ine omunthu walinga onkhali mahi uhanda okukala vali noupanga omuwa na Siovaa, oityi ena okulinga?

• “Ame nekupopila onkhali yange. Haholekele otyivi nalinga. Ame nati: ‘Mandyipopila Siovaa ononkhali mbange.’” — Ovii. 32:5.

• “Okuti pwoonwe pena omunthu uvela? Aihane ovakulu vewaneno, vemulingile omalikwambelo, avemuwaeka omulela menyina lya Siovaa. Ngwe elikwambelo lilingwa tyayumba-ko onthumbi malikalesa nawa ou wavela, Siovaa memukatula-po. Tupu ine walinga ononkhali, maevelwa.” — Tia. 5:14, 15.

16. Ine ove wiiva okuti mukwenyi mewaneno walinga onkhali, oityi una okulinga?

• “Ine omunthu umwe umona mukwavo ulinga onkhali, ine hamwe wetyiiva vala, pahe eivi ovanthu vaovola onombangi vapopie onkhali oyo, ngwe ahai-ko ekeipopie, nae walinga onkhali, mekeipulwa.” — Lev. 5:1.

17. Oñgeni tuna okukala nomunthu wapolwa mewaneno?

• “[Tyiyekeipo] tyokulihonyaika no ou utiwa tufenda nae mahi otyo oku otyihayo kokulihanda, ena elungavi, afenda ovika-huku, aleva vakwavo, anwa unene, apunda vya vakwavo, oo nokulia vala mwahaliei nae.” — 1 Kol. 5:11.

• “Ine umwe umweendela ahaeta ondongeso oyo, oo mwehemuyakulei momaumbo enyi, nokumukukunya mwehemukukunyei.” — 2 Swau 10.

18. Una okukala nomapanga ehole Siovaa mokonda yatyi?

• “Okweenda novana-ndunge noove ukala omuna-ndunge, mahi una ulipaka kumwe novahima, matyimweende omapita.” — Omih. 13:20.

• “Mwahayondywei. Omapanga omavi anyona ovituwa oviwa.” — 1 Kol. 15:33.

19. Omokonda yatyi Onombangi mba Siovaa vehelipakela mopulitika?

• “Kavelipake mouye, ngeetyi naame [Sesusi] nehelipake mouye.” — Swau 17:16.

20. Omokonda yatyi wesukisila okutavela kovatumini?

• “Ovanthu aveho vetavele kovatumini, mokonda etyi tyokutumina tyakala-ko tupu o Huku; ovatumini veli-ko, veli tupu kovipundi viavo okwapakwa-ko na Huku.” — Loma 13:1.

21. Ine ovatumini vekwiita ulinge otyipuka tyimwe tyiliatela kovitumino vya Huku, oityi una okulinga?

• “Onthwe tutavela Huku, oe omutumini tutavela vali wapona ovanthu.” — Ovil. 5:29.

22. Tyina uya pokukoya ovilinga, onotesitu patyi mambukukwatesako?

• “Otyilongo kamatyikakatukila vali otyilongo otyikwavo nomutunga, nii kamavakalongeswa vali okulwa.” — Mik. 4:3.

• “Tundei-mo omo [mo Mbambilonia Onene], vanthu vange ine kamuhande okukwata nae kononkhali mbae, ine kamuhande okutambulila kumwe nae ovihuna viae.” — Ehol. 18:4.

23. Tyina uya pokukoya ovipuka molimane navio ounye, ovipi mokoyo, ya ovipi una okwaanya?

• “Siovaa . . . uyele una uhole ovilwa.” — Ovii. 11:5.

• “Toyei otyivi; kakatelei motyiwa.” — Loma 12:9.

• “Pahe mahi vanthu vetu, aviho viotyili, aviho visukisa umwe okusuka navio, aviho viaviuka, aviho viasukuka, aviho viapandwa, aviho vipopiwa nawa, aviho oviwa, neevi vihiwa okuhilivikwa, ovipuka ovio ovio musuke-suke navio.” — Fili. 4:8.

24. Omokonda yatyi Onombangi mba Siovaa vahahonyena nonongeleya ononkhwavo pokufenda Huku?

• “Kamupondola okuti amuli ‘komesa ya Siovaa,’ amukalia komesa yovilulu.” — 1 Kol. 10:21.

• “‘Puvo hondovokei-po, muvo tundei-mo,’ o Siovaa wetyipopia, ‘yekei-po okuyama kovipuka viasila;’ ‘ame mandyimuyakula.’” — 2 Kol. 6:17.

25. Onotesitu patyi mambukukwatesako okutala ine molingi otyipito tyimwe ine kumetyilingi?

• “Soka avelihonyaika kumwe novanthu vovilongo, avelipake moviso viavo. Avalingila ono huku mbavo, otyo atyikala eliva.” — Ovii. 106:35, 36.

• “Vokwankhia kavei vali natyike.” — Omup. 9:5.

• “Ngwe kavelipake mouye, ngeetyi naame nehelipake mouye.” — Swau 17:16.

• “Pahe tyatuuka etyi mwakala nokulinga evi ovanthu vahanda, etyi mwakala movituhiwa viokwahakundu, movipepe viokulihanda, mokunwa unene, movipito viehangahahi, momaunkholwa, no momafendelo apenga ovilolo.” — 1 Pet. 4:3.

26. Ovalie vapopiwa m’Ombimbiliya valingile ovipito viomanima? Oityi welilongesila-ko?

• “Monthiki ya tatu ankho oyo Falaoo avetesa omanima, alingila otyipito ovaundapi vae aveho, apolo mokaleya onkhalamutwe yo vokwaava okunwa nonkhalamutwe yo vokuyoka onombolo, ovaundapi vae aveho otyo vatala. Onkhalamutwe yo vokwaava okunwa eipake vali potyilinga tyayo tyokwavela Falaoo olufo. . . . Mahi atumu okuyendya onkhalamutwe yo vokuyoka onombolo ngeetyi Susee apopile.” — Ehim. 40:20-22.

• “Helonde pokwehika ponthiki yotyipito tyomanima atyitwa, omona wa Helondiya anyane ahambukiswa unene Helonde ngwe aane, ati utei vala etyi amaiti, ndyimupa-tyo. Omuhikwena oo etyi ahindilwa na ina, ati: ‘Mphe pehepano omutwe wa Swau Mbatisita pongalo.’ Pahe atumu ekakunye mokaleya likatete Swau omutwe.” — Mat. 14:6-8, 10.

27. Oityi wesukisila okutavela etyi upopilwa novakulu vewaneno?

• “Tavelei kwaava muna-vo vemululika, tehelelei kuvo, mokonda onwe veli nokuyunga, mokonda mavakapulwa, opo vetyilinge tyahambukwa vehetyilinge tyisona, mphoko tyimunyona.” — Hemb. 13:17.

28. Omokonda yatyi otyiwa ove no vomeumbo liove mulilongese apeho Ombimbiliya?

• “Uhambukilwa ovitumino vya Siovaa, utanga ovitumino Viae nondaka yavova na tyitenya na tyinthiki. Omunthu oo makalinga ngomuti watwikwa pomeva, omuti wiima ovinyango pomuvo watyo, omafo ao kaakukuta. Atyiho alinga tyikemuviukila.” — Ovii. 1:2, 3.

29. Oityi ove uholele omaliongiyo, nokwaava omakumbululo?

• “Mandyipopi enyina liove konondenge mbange. Mandyikekuhivilikila pokati kovanthu ovanyingi-nyingi.” — Ovii. 22:22.

• “Onthwe tusukei na vakwetu opo tyituhohiye molwembia no movilinga oviwa, atwahayeke-po okuliongiya, ngeetyi vamwe vetyiliya, mahi tulipamekei na vakwetu, haunene umwe vali tyina mutala onthiki ili nokufwena-po.” — Hemb. 10:24, 25.

30. Otyipi otyilinga otyinene vali Sesusi etutuma tuna okulinga?

• “Onwe endei, kalongesei ovanthu vomihoko aviho valinge ovalongwa vange, amuvembatisala.  . . . Velongesei vetavele ovipuka aviho nemutuma.” — Mat. 28:19, 20.

31. Tyina twaava onombongo opo tukwateseko ovilinga vya Huku na vakwetu tufenda navo, tuna okutyilinga ñgeni?

• “Hivilika Siovaa neevi una-vio oviwa.” — Omih. 3:9.

• “Munthu na munthu alingile omu mwene omutima wae wetavelela, ahalinge ngo ou watiwa ngaliti-pano, ou wakuluminywa, una Huku uhole ou waava tyahambukwa.” — 2 Kol. 9:7.

32. Ovanthu va Huku vetyii okuti mavalingwa-tyi?

• “Vahambukwa ovava vamoneswa ononkhumbi mokonda yokuviukisa, Ouhamba wo keulu owavo. Onwe hambukwei, tyina ovanthu vemulinga onya, tyina vemumonesa ononkhumbi, tyina vemutendeleya vala ovipuka ovinyingi ovivi kombanda yange. Helei, hambukwei, ondyambi yenyi keulu onene, otyo-ale valingile ngootyo ovauli kohale, vevemonehile ononkhumbi.” — Mat. 5:10-12.

33. Okumbatisalwa okala Ombangi ya Siovaa otyipuka tyimwe otyiwa mokonda yatyi?

• “Onondaka mbove nembuvasa, nembulia-po. Ondaka yove yalinga ondolo yange, ehambu enene komutima wange, mokonda ndyitumbulwa enyina liove, ove Siovaa Huku yovita.” — Sele. 15:16.

Ovanthu vambatisalwa movionge vyo Nombangi mba Siovaa. Una walinga elongomona liombatisimu tyina ati pokumanuhula wiita vana mavambatisalwa vakatuke avakumbulula nondaka imwe yaya peulu omapulo aa evali:

1. Welivela-le ononkhali mbove, welipakula-le ku Siovaa, ya utavela okuti Siovaa watuma Sesusi Kilisitu opo etuyovole?

2. Utyii okuti nga wambatisalwa, ngootyo mokala Ombangi ya Siovaa, ovalulilwa meongano liae?

Tyina ovanthu mavambatisalwa vati “yoo,” ngootyo veli nokupopila ovanthu aveho okuti vayumba onthumbi mweetyi Sesusi etulingila, ya velipakula-le ku Siovaa. (Loma 10:9, 10) Tyina nkhele onthiki oyo yehenehike-po, vena okusoka umwe nawa komapulo oo, avelikwambela ku Siovaa, opo tyina vapulwa vakumbulule umwe etyi tyili momutima wavo.

Welipakula-le ku Siovaa, omupopila okuti oe vala mofende, ya molingi vala ovipuka ahanda?

Wahanda umwe okumbatisalwa, otyo umwe tyili momutima wove?

Ovikutu patyi omunthu ena okuvala tyina ambatisalwa? (1 Tim. 2:9, 10; Swau 15:19; Fili. 1:10)

Tuna okuvala nawa, “lwonthilo, lwonondunge,” tulekese okuti tuna ‘onthilo na Huku.’ Naina, omunthu mambatisalwa kapondola okuvala ovikutu ovisupi, neevi viatona unene, neevi vimonekela, neevi viahonaikwa. Una okuvala ovikutu viasukuka, vitavela umwe okwenda povanthu.

Oityi omunthu ahalingi tyina ambatisalwa? (Luka 3:21, 22)

Ovanthu va Siovaa tyina vambatisalwa vena okulinga ngeetyi tyalingile Sesusi. Sesusi ankho utyii okuti okumbatisalwa otyipuka tyimwe otyinene, tyahanyanwa natyo, wetyilekesa umwe movipuka apopile no mweevi alingile. Noove linga nga Sesusi, wahatie tyina umbatisalwa nkhele oende mokuyoa no mokunyana vala. Namphila okumbatisalwa tyihambukiswa umwe, mahi wahalinge ngatyina welipwako. Linga omunthu wonondunge, hambukwa umwe mahi wahalambese.

Oñgeni okwenda apeho komaliongiyo, nokukala na vakwenyi matyikukwatesako okulinga etyi wapopila Siovaa monthiki welipakula kwe?

Omokonda yatyi otyiwa okulilongesa Ombimbiliya nokwenda apeho movilinga viokwivisa, na tyina umwe wambatisalwa-le?