Koleleleya Tyina Una Muelinepa Nae Ekuyekapo

MARGARITA nomulume wae Raúl, vaumbila Jeova kumwe movilinga viokuivisa omuvo auho, omanima omanyingi.a Mahi, etyi omona wavo wotete akutulwa, palamba vala katutu, Raúl ahimbika okuyekapo okufenda Jeova. Okuhulililako, Raúl wahimbika okulinga omaumbalehi iya atundiswa mewaneno lio Vakristau. Margarita wati, “Etyi, ovipuka ovio aviho viahimbika, andyilitehelela ngoti mandyinkhi. Andyivele omutima, nokuhei oityi mandyilingi.”

Etyi palamba vala katutu tunde puetyi Jane anepwa, omulume wae emulavisa monkhalelo yelikalela. Oe wahimbika okumuveta. Jane wati, “Otyikando tyotete ambeta, nakala nomaluinge, nokulimbililwa, nokulitehelela okuti napenyenyekwa. Atyikala otyityiliyo tyokumbeta andyiti na ndyimuevele. Iya andyisoko okuti mokonda ame Mukristau, ndyimuevele apeho nokulimbuako. Tupu, ankho ndyisoka okuti katyaviukile okupopia kovanthu ovitateka vietu, alo umwe kovakulu vetu mewaneno. Iya ontheto oyo yokumbeta nokumuevela yatualako omanima. Omuvo oo auho, ankho ndyisoka okuti kuna otyipuka ndyipondola okulinga opo omulume wange akale nohole naame. Konyima etyi anthyapo nomona wetu, andyilitehelela okuti napengesa, ñgeno ndyina etyi nalingile ine okupopia pala okupameka otyinepo tyetu.”

Nga Margarita na Jane, pamwe nove waihamenua, nokuhena onombongo, ine ekolelo liove kalikahi nawa, mokonda yomulume wove wekusapo. Ine hamwe ove mulume waihamenua nokuna omasuka-suka, mokonda omukai wove wekusapo. Tyimoneka nawa, okuti tukahi ‘momuvo wokuepuiya,’ ngetyi Ombimbiliya yetyipopia. Eulo olio, lilekesa okuti ‘mononthiki mbahulililako,’ oupanga mombunga maukanyonwa, mokonda kamakukakala oluembia mononkhalelo ononyingi. Vamwe vokuliti vaumbila Huku mavakalekesa okuti ononkhembi. (2 Timóteo 3:1-5) Iya Ovakristau vo tyotyili navo vatumbukilwa novitateka ngovio. Moluotyo, oityi tyipondola okukuvatela okufinda ovitateka, inkha una muelinepa nae wekusapo?

Litala Ngetyi Jeova Ekutala

Tete, tyipuiya unene okutavela, tyina una ove uhole ekulinga otyipuka otyivi unene. Upondola alo umwe okuhimbika okulivela onombei ove muene, mokonda yonkhali yae.

Hinangela okuti alo umwe Jesus omunthu ankho uhena nkhali, wayondyelue na una ankho ehole nokuayumba onthumbi. Jesus watetekelele okulikuambela unene nokusoka nawa, opo aholovonene omapanga ae ono apostolu. Aveho 12 ankho ovaumbili va Jeova vayumbwa onthumbi. Otyili, Jesus wanumanene unene etyi Juda ‘emuyondya.’ (Lucas 6:12-16) Mahi, Jeova kavelele onombei Jesus mokonda yetyi tyalinga Juda.

Tyotyili, aveho vokuelinepa ovakuankhali. Aveho mavalingi oviponyo. Omuhoneki umwe wono salmu wati: “Inkha wayungile oviponyo vietu, ñgeno olie ukahi lutai ove Jah, Jeova?” (Salmo 130:3) Ngotyo, vokuelinepa vesukisa okulievela pokati, okuhetekela Jeova.—1 Pedro 4:8.

Anthi, “kese umwe puonthue makapulwa na Huku konthele yae muene.” (Romanos 14:12) Inkha umwe povalinepi ukala notyituwa tyokupopia omapita nokulinga ovivi mukuavo, oe makakoyeswa na Jeova. Jeova uyele ovilwa nokupopia omapita. Moluotyo, kutupu ehunga na like liokutekula omapita una muelinepa nae, tyihena ohole nehumbilo. (Salmo 11:5; Efésios 5:33; Colossenses 3:6-8) Ngotyo, inkha Omukristau upalaika tyihelivele okukala no nonyengo, nokuhapilulula onkhalelo yae, una okupolwa mewaneno lio Vakristau. (Gálatas 5:19-21; 2 João 9, 10) Una velinepa nae kapondola okusoka okuti malingi onkhali inkha apopila ovakulu vewaneno otyituwa otyivi tya mukuavo. Anthi, Jeova una okankhenda na vana vamoneswa ononkhumbi.

Tyina umwe povalinepi walinga oumbalehi, kalingile vala onkhali ku mukuavo, mahi tupu no ku Jeova. (Mateus 19:4-9; Hebreus 13:4) Inkha una wahalingile onkhali ukahi nokulinga ononkhono mbokuendela movitumino Viombimbiliya, kesukisa okulivela onombei mokonda ya mukuavo walinga oumbalehi.

Hinangela okuti Jeova utyii oñgeni ove ulitehelela. Jeova ulipopia oe muene ngatyina anepa elongo lio Isilayeli. Iya Ondaka yae ina onotestu ononyingi mbulekesa ononkhumbi amuene, mokonda yelongo olio lialinga oumbalehi mopamphepo. (Isaías 54:5, 6; Jeremias 3:1, 6-10) Kala nonthumbi yokuti Jeova wii nawa ononkhuka mbove, inkha una muelinepa nae wekusapo. (Malaquias 2:13, 14) Oe utyii okuti ove wesukisa okuungumaneswa nokupamekwa.

Oñgeni Jeova Aungumanesa

Onkhelo imwe Jeova aungumanesa ovanthu vae, ewaneno lio Vakristau. Jane wapelue ombatelo oyo. Oe uhinangela okuti: “Omutalelipo womawaneno weile pomuwo ame ankho naihamenwa unene. Oe ankho utyii okuti nasoya mokonda yokuahengwa nomulume wange. Ataindya omuwo opo ambatele netyi tyapopia 1 Coríntios 7:15 no notestu ononkhuavo. Onoversikulu mbo Mbimbiliya netyi apopia nohole, tyankhuatesako okuimbuka okuti hapengesile, iya otyo, atyindyetela ombembwa momutima.”b

Margarita, wapopiwa pombanda, tupu wanoñgonoka okuti Jeova wava ombatelo newaneno lio Vakristau. Margarita wati: “Etyi natala okuti omulume wange kelivelele, andyityindi ovana vange andyiilukila kepundaumbo ekuavo. Etyi nehika oko, ankho ndyina vala onombongo mbutuuka okufeta onokuartu onombali. Monthiki onkhwavo, etyi ndyikutulula omapunda ange ankho nanumana unene, andyiivi omunthu utotola pepito. Andyisoko okuti omuene wondyuo ukala mondyuo onkhuavo. Mahi andyihuvu, mokonda naina ankho omphange umwe walongesile me yange Ombimbiliya, nokuvatela ombunga yetu okunoñgonoka otyili. Omphange oo, ankho hameko aovola, anthi weya mokonda ankho ulilongesa Ombimbiliya na muene wondyuo. Iya otyo, tyaokeya omuihamo wange—andyihambukwa unene. Andyimupopila etyi tyapita naame iya atuhimbika okulila. Oe etukuatesako okuenda keliongiyo onthiki oyo. Ovakuatate vetuyakula nawa, iya ovakulu vewaneno avelipakelamo opo vetukuateseko okupameka ekolelo lietu.”

Oñgeni Vakuavo Vapondola Okuvatela

Aveho mewaneno lio Vakristau, vapondola okuava ombatelo mononkhalelo ononyingi. Mongeleka, Margarita ankho uhanda okuvasa ovilinga. Iya ombunga imwe mewaneno ailiave pala okumukuatesako okuyunga ovana vae tyina vamatundu kosikola.

Margarita wati: “Etyi napanda vali unene, otyetyi ovakuatate no nomphange veliava pala okuundapa naame, novana vange movilinga viokuivisa.” Nombatelo oyo ongwa, aveho mewaneno velikuatesako ‘okutyinda omilemo viavo,’ iya mokulinga ngotyo vekahi nokufuisapo “otyitumino tya Kristu.”—Gálatas 6:2.

Vana vekahi nokumona ononkhumbi mokonda yononkhali mba vakuavo, tyotyili vapanda unene ombatelo yatyo oyo. Monique, wokuahengua nomulume wae, nokuesala nongele yo 110.000 Rand, novana vekuana, wati: “Ovakuatate vange no nomphange mewaneno, ankho vena unene oluembia. Hityii oñgeni ñgeno nakala tyihena ombatelo yavo. Ndyilitehelela okuti Jeova wampha ovakuatate ovawa ovanyingi, veliava pala okuvatela ovana vange. Ndyina ehambu liokutala etyi ovana vange vekahi nokupameka oupanga wavo na Jeova nombatelo oyo. Tyina nesukisa elondolo, ovakulu vewaneno vambatela. Tyina nesukisa omunthu pala okupopia nae, vanthehelela.”—Marcos 10:29, 30.

Tyotyili, epanga liokuna ohole, wimbuka onalupi tyahaviukile okutomphola konthele yetyi tyanumanesa mukuavo. (Eclesiastes 3:7) Margarita wati, “Omuvo auho, ndyikala nehambu liokupopia no nomphange mewaneno liange epe konthele yovilinga viokuivisa, no yelilongeso lietu lio Mbimbiliya, no yovana vetu—tyihapopi konthele yovitateka viange. Ndyipanda etyi vambatela okulimbwa etyi napita natyo, nokuhimbika omuenyo omupe.”

Lityilika Ehando Liokukondolela Mukuenyi Otyivi

Ovikando vimwe, hamwe kulivele onombei mokonda yononkhali mba una muelinepa nae. Mahi upondola okukala nonkhongo, tyetyi ukahi nokumona unene emone, mokonda yononkhali mbae. Inkha uyeka onkhongo oyo iliyawise, mainyono etokolo liove liokutualako nekolelo mu Jeova. Upondola okuovola oñgeni mokondolela otyivi una muelinepa nae wekulavisa.

Inkha ulitehelela okuti una onkhongo, hinangela ongeleka ya Josue na Kalebe. Ovalume ovo vekolelo, vakalavele Otyilongo Valaelwe, okupaka omienyo viavo motyiponga. Ovalavi ovakuavo avayekepo okukala nekolelo, iya avahindila vakuavo okuhetavela ku Jeova. Ova Isilayeli vamwe vahandele alo umwe okuipaa Josue na Kalebe nomamanya, ankho vaovola okupameka elongo opo litualeko nekolelo. (Números 13:25–14:10) Mokonda yetyi tyalinga ova Isilayeli, Josue na Kalebe avamono ononkhumbi mbokukala mehoko omanima 40. Vamuene emone olio, mokonda yononkhali mba vakuavo, ha yononkhali mbavo ko.

Namphila Josue na Kalebe ankho kavahambukilwe, mahi kavayekele ononkhali mbo vakuatate vavo mbuvekalese nonkhongo. Vasukile vali unene nokutualako nekolelo liavo mu Jeova. Etyi omanima 40 okukala mehoko apwa, Josue na Kalebe, kumwe na va Levita avayambwa, mokuahupa kombuto oyo, nokuayekwa okunyingila Motyilongo Valaelwe.—Números 14:28-30; Josué 14:6-12.

Ove upondola okumona ononkhumbi omuvo omunyingi, mokonda yononkhali mba una muelinepa nae. Mupondola okulihenga, iya atyikuihamesa omutima nokukala tyihena onombongo, nononkhumbi ononkhuavo. Mahi, uhayeke omalusoke omavi ekusoyese. Hinangela okuti Jeova wii nawa etyi malingi vana vayekapo tyawina ovitumino viae, ngetyi tyapitile nova Isilayeli vana vatombele ovitumino viae mehoko.—Hebreus 10:30, 31; 13:4.

Ove Upondola Okukoleleya!

Wahayeke omalusoke omavi ekusoyese, anthi, yulisa omutima wove nomalusoke a Jeova. Jane wati: “Ame natala okuti okutehelela ovikasete vio Mutala Womulavi no vio Despertai! tyankhuatesako okukoleleya. Tupu, omaliongiyo amphameka unene. Okuava omakumbululo momaliongiyo, nokuundapa movilinga viokuivisa, tyankhuatesako okulimbwa ovitateka viange. Okukuatesako vakuetu okukala nekolelo mu Jeova, tupu tyapameka ekolelo liange. Iya okuvatela ovalongwa Vombimbiliya, tyankhuatesako okusoka unene kovipuka viakolela vali.”

Monique, wapopiua pombanda wati: “Okuenda apeho komaliongiyo, nokuundapa movilinga viokuivisa, tyambatela okukoleleya. Tuna oupanga ounene mombunga nomewaneno. Ovitateka viange, viankhuatesako okuimbuka apa nahapamene. Nalolwa novitateka, mahi, nombatelo ya Jeova netyivila okukoleleya.”

Nove upondola okukoleleya movitateka ngovio. Namphila okulaviswa tyekuihamesa unene omutima, linga ononkhono mbokulandula onondonga mba Paulu wati: “Tuhayekeipo okulinga oviwa, mokonda matukateya momuvo wanakua, inkha katuasoyele.”—Gálatas 6:9.

[Onondaka Poutoi]

[Olutalatu pefo 31]

Vokuahengwa vapanda unene vana vevekuatesako movilinga viokuivisa