Fuena Ku Huku

Oe Wovola Movanthu Etyi Tyaviuka

1 REIS 14:13

“JEOVA utala momitima aviho, nokunoñgonoka kese eyembelo liomalusoke.” (1 Crônicas 28:9) Onondaka ombo Huku atuma mbuhonekwe, pala okutuavela ondundo yokupandula esuko enene Jeova ena nonthue. Jeova wovola momitima vietu etyi tyaviuka, namphila tuvakuankhali. Otyo tyimonekela nawa monondaka mbae konthele ya Abiya, mbuvasiwa mu 1 Reis 14:13.

Abiya, ankho ukala meumbo mulingwa ovivi. Tate yae, Jeroboau, wali onkhalamutwe yo nohamba mbayapuka ku Huku.a Jeova alae okuti mahanyeko eumbo lia Jeroboau, “ngetyi tyikombwa ombumbi alo ipwapo.” (1 Reis 14:10) Mahi Huku watumine okuti omunthu wike vala Abiya, ankho wavela unene, mombunga ya Jeroboau, mahumbwa mokupakwa nawa melangalo.b Omokonda yatyi? Huku wahangununa okuti: “Tyetyi mwe muavasiwa etyi tyaviuka komaiho a Jeova, Huku yo Isilayeli, meumbo lia Jeroboau.” (1 Reis 14:1, 12, 13) Oityi onondaka ombo mbutulekesa konthele ya Abiya?

Ombimbiliya kayapopile okuti Abiya ankho wali omufendi wekolelo wa Huku. Mahi, mwe ankho muna otyipuka otyiwa. Otyipuka otyo otyiwa, ankho o “konthele ya Jeova,” tyafuile ankho o tyakutikinya efendelo Liae. Ovahoneki vamwe ova Judeu vapopia okuti, tyafuile Abiya walingaile oungendi wokuenda kondyuo ya Huku ko Jelusalei. Ine hamwe wapoleleko ovalavi he atumine okutyilika ovanthu okuenda ko Jelusalei.

Namphila katwii oityi otyiwa Abiya ankho ena, mahi tyapandelwe unene. Tete, oe ankho omukuatyili. Otyipuka otyo otyiwa ankho ena tyikahi “mwe,” momutima wae. Vali, ankho vetyilinga kavehi. Abiya walingile otyipuka otyo otyiwa, namphila ankho “ekahi meumbo lia Jeroboau.” Omunongo umwe wati: “Ovanthu vatualako notyituwa tyavo otyiwa namphila vakala ponofika onombi no nombunga, vesukisa okupandwa unene.” Mukuavo wati, otyipuka otyiwa Abiya ali natyo, ankho “tyimoneka nawa . . . , ngetyi ononthungululu mbuliaima tyina eulu lianthikovela, ngetyi omiti vitiwa cedro oviwa unene tyina vieliseta nomiti vihena omafo.”

Tyakolela vali unene onondaka mba 1 Reis 14:13, mbutulongesa otyipuka otyiwa unene konthele ya Jeova, netyi oe aovola muonthue. Hinangela okuti “mu” Abiya “muavasiwa” otyipuka otyiwa. Otyo tyilekesa okuti Jeova waovola momutima wa Abiya, alo Oe avasamo okapuka okawa. Omunongo umwe wati, okumueleka Abiya nombunga yae ankho ukahi ngokamanya kakolela unene “pokati konthumbo yomakuavo ahasilivila.” Jeova wapandele otyipuka otyo otyiwa iya emuyambe, mokulingila okankhenda omunthu oo wike vala mombunga yonondingavivi.

Tyipameka unene okunoñgonoka okuti Jeova wovola oviwa muonthue nokuvipanda, namphila tuvakuankhali. (Salmo 130:3) Okunoñgonoka otyo, tyiavela ondundo yokufuena ku Jeova, Huku una utala nawa momutima wetu okuovola alo umwe okapuka okatutu-tutu okawa.

[Onondaka Poutoi]