Eulo 6. Ovilinga Viokuivisa Ouye Auho
“Onondaka ombu onongwa mbouhamba wa Huku, mambukaiviswa kombanda yoohi aiho.”—MATEUS 24:14.
● Vaiatea ukala pokalongo kekahi pokati kelunga poulongo utiwa Tuamotu. Namphila Tuamotu ina oulongo 80 weliyandyana pohika ilamba po 802.900 kilometu okuliseta nao, mukala vala ovanthu 16.000. Vaiatea novomunthele yae vataleluapo no Nombangi mba Jeova. Omokonda yatyi? Omokonda Onombangi mba Jeova vahanda okupopia onondaka onongwa konthele Youhamba wa Huku novanthu aveho—kese apa vakala.
OITYI TYIKAHI NOKUMONEKA? Onondaka Mbouhamba mbukahi nokuiviswa ouye auho. Menima lio 2010, Onombangi mba Jeova vaundapa onoola 1,6 yo nombiliau movilinga viokuivisa onondaka onongwa movilongo 236. Tyilekesa okuti kese Mbangi walinga ono minutu 30 movilinga viokuivisa kese nthiki. Momanima ekwi okualamba, valinga omikanda viokulongesa ovanthu Ombimbiliya vilamba po 20 yo nombiliau nokuviyandyanesa.
OITYI OVANTHU VAPOPIA? Onondaka mbo Mbimbiliya mbukahi nokuiviswa omanima omanyingi.
OKUTI ETYI OVANTHU VAPOPIA OTYILI? Tyotyili, ovanthu ovanyingi vehole okuivisa ovipuka vimwe konthele yonondaka mbo Mbimbiliya. Otyinyingi vetyilinga vala momuvo uhehi movilongo vimwe vala. Mahi, Onombangi mba Jeova vekahi nokuivisa monkhalelo yaongana ouye auho, iya vekahi nokupopia novanthu ovanyingi. Onombangi vekahi nokutualako novilinga viavo viokuivisa namphila vamoneswa ononkhumbi nomaongano amwe eveyele.a (Marcos 13:13) Onombangi mba Jeova kavafetwa mokonda yokulongesa. Anthi, vaava omuvo wavo, iya omikanda viavo kavilandeswa. Ovilinga viavo vikuatesuako nonombongo vaava.
OITYI OVE USOKA? Okuti “onondaka onongwa mbouhamba” mbukahi nokuiviswa ouye auho? Okuti eulo eli likahi nokufuiswapo lihangununa okuti makukamoneka otyipuka tyimwe otyiwa komutwe wandyila?
[Onondaka Poutoi]
a Opo unoñgonoke vali konthele oyo, tala ovideo “Fiéis sob Provas,” “Triângulos Roxos,” no “As Testemunhas de Jeová Resistem ao Ataque Nazista” vilingwa no Nombangi mba Jeova.
[Onondaka Mbavilapo pefo 9]
“Putyina Jeova ekahi nokuyekelela, matutualako okuivisa onondaka onongwa Mbouhamba wae nombili, okuundapesa ononkhalelo ambuho opo tupopie novanthu aveho.”—O ANUÁRIO YONOMBANGI MBA JEOVA YO 2010.