Okuti Kuna ou Utehelela Omalikuambelo?

“Ame ankho hitavela okuti kuna Huku. Anthi pamwe ndyilikuambela vala. Ankho ndyitupu onthumbi yokuti kuna umwe unthehelela, mahi ankho ndyina ekevelelo liokuti omalikuambelo ange atehelelwa. Ankho ndyitupu ehambu iya omuenyo wange ankho utupu esilivilo. Ankho ndyina owoma wokutavela okuti kuna Huku, mokonda kuame vana vetavela okuti kuna Huku vatopa.”—PATRICIA,a ko IRLANDA.

OKUTI noove usoka nga Patricia? Okuti ulikuambela namphila uhetavela okuti kuna Huku? Inkha ongotyo usoka, have vala. Tala:

◼ Ovanthu 2.200 vapulwa ko Grã-Bretanha, kavehi vetavela okuti kuna Huku walinga ouye nokutehelela omalikuambelo. Mahi ovanyingi puvo pamwe velikuambela.

◼ Ovanthu 10.000 vapulwa movilongo ovinyingi, namphila vapopia okuti kutupu Huku, mahi vamwe puvo velikuambela.

Omokonda Yatyi Vehetavelela?

Omulume umwe utiwa Allan ko Inglaterra, wati: “Ame ankho hitavela okuti kuna Huku mokonda ankho ndyisoka okuti onongeleya mbahindwa vala pala okuyunga ovanthu, nokuovola onombongo. Tupu ankho ndyisoka okuti inkha kuali Huku ñgeno kutupu ovivi. Mahi pamwe ankho ndyipumphama nokuahiliya, andyilikuambela ‘kutyimwe.’ Tupu ankho ndyilipula okuti, ‘oñgeni neyako?’”

Kese munthu usoka ngotyo, una omahunga okuhakala nonthumbi inkha omalikuambelo maakumbululwa. Pamwe ovanthu kavetavela okuti kuna Huku mokonda kavenevase omakumbululo omapulo ngaa:

◼ Okuti kuna Omutungi?

◼ Omokonda yatyi onongeleya pamwe mbulingila ovivi?

◼ Omokonda yatyi Huku ayekelelako ononkhumbi?

Okuti inkha unoñgonoka omakumbululo omapulo oo, molikuambela vali nonthumbi?

[Onondaka Poutoi]