Omulao womphangu yombembwa pano pohi wapilulula omuenyo wange!

OMUENYO WANGE KOHALE:

Natyitilwa ko Riga, epundaumbo enene lioko Letônia. Ame nomphange yange tuekulila pu me. Namphila Me owo Katolika, onthue ankho tuenda vala kokapela tyina kuna otyipito. Apeho ankho ndyitavela okuti kuna omunthu omunene vali kuonthue, mahi pouna ankho natalukwa vala novipuka ovikuavo.

Pouna, me etyimono okuti ndyina ounongo wokupanguyula ovipuka andyivipangiya vali. Iya ankho tyina me atundapo, anthyi meumbo andyike, ankho ukala notyiho, mokonda ankho muna ovipuka ovinyingi ndyipondola okupanguyula. Moluotyo, amphe ovipuka viokupangiya, iya ankho ndyityihole okupanguyula ovipuka andyivipangiya vali. Andyihimbika okutyipanda vali unene, iya otyo atyimphe vali ondundo yokutaha omota. Me anthyonekesa moseketa yo vokulilolela no nomota ankho itiwa Zelta Mopēds (Onomota Mboolu). Natetekela okueenda nokamota okatutu, iya konyima andyihimbika okueenda nonomota ononene.

Hasetele okutyivila, apakala vala katutu andyityivili umwe nawa okuhateka nonomota, mahi ankho tyipondola okundyipaa. Etyi tuelilolela novo mo Letônia andyifindi ovikando vitatu, iya ko Estados Bálticos andyifindi ovikando vivali.

OÑGENI OMBIMBILIYA YAPILULULA OMUENYO WANGE:

Etyi nahimbika okunkhimana, omuhikuena ankho tulihanda nae utiwa o Evija (konyima atulinepe), elivasi no Nombangi mba Jeova. Avasi omukanda umwe wo Nombangi, ankho una apa omunthu apondola okuhoneka opo aite okulongeswa Ombimbiliya. Ahonekapo eutumu. Pakala vala katutu, Onombangi vevali aveya okumutalelapo, avahimbika okumulongesa Ombimbiliya. Ankho netyipanda, mahi ankho nkhele hesukile nokulilongesa konthele ya Huku.

Konyima, Onombangi avankhongo opo ndyitehelele tyina valongesa Evija Ombimbiliya. Andyitavela, iya andyipande unene etyi neiva. Otyipuka tyimwe tyenthyikile unene komutima, omulao Wombimbiliya womphangu yombembwa pano pohi. Vandekesile o testu ya Salmo 37:10, 11, yati: “Apa katutu ondingavivi kamaikakalako vali. Mokatala pana ankho ikala, mahi kukeivasapo vali. Mahi, onondalawa mavakapiñgana ohi, iya avakakala nombembwa onene.” Omulao oo tyotyili wanthyambukisilue unene.

Ehando liange liokulilongesa konthele ya Huku alihimbika okuliyawisa. Andyihimbika okuiimbuka okuti onongeleya ononyingi kambupopi otyili. Mahi, etyi nelilongesa Mombimbiliya tyanthyambukisilwe mokonda otyili, iya tyayandyuluka nawa.

Etyi natualako okulilongesa Ombimbiliya, nanoñgonoka okuti ku Jeova omuenyo wakolela unene. (Salmo 36:9) Otyo tyankhuatesileko okusoka nawa konthele yetyi ankho ndyilinga, moluotyo, ankho hihande vali okupaka omuenyo wange motyiponga. Ankho pahe nahanda okuundapesa omuenyo wange pala okuhivilika Jeova. Ngotyo, omunkhima, nokulilolela nonomota ankho pahe kuame kavisilivila vali.

Menima 1996, andyiende kotyonge tyovilongo ovinyingi tyo Nombangi mba Jeova ko Tallinn, mo Estônia, popepi naapa ankho tukelilolela nonomota. Motyonge, namona ovanthu vatunda kovilongo ovinyingi vielikalaila veliongiya kumwe nehambu nombembwa. Mongeleka, etyi omuhikuena umwe Ombangi avombesa otyipapo tyae, andyisoko okuti kametyivasi vali. Pakala vala katutu, etyivasi, iya ovipuka aviho ankho omovikahi, natyike tyakambamo. Tyanthyuvisile unene! Andyinoñgonoka umwe nawa okuti Onombangi tyilityili vaendela movitumino Viombimbiliya. Ame na Evija atutualako okulongeswa Ombimbiliya, iya mo 1997 atumbatisalwa atukala Onombangi mba Jeova.

OUWA PATYI NAPOLAKO:

Omapanga ange vamwe vankhia pokulilolela no nomota. Etyi nelilongesa Ombimbiliya, nanoñgonoka nawa okuti Jeova Omuavi womuenyo, wampha otyilinga tyokuyunga nawa omuenyo wange. Enoñgonoko olio liayovola omuenyo wange.

Momanima ekuana, ame na Evija tuakala nelao liokuundapa mo mbetele Yonombangi mba Jeova ko Riga. Pahe tuna ehambu liokutekula omona wetu Alise, nokumukuatesako okukala vali nohole na Jeova. Tupu ndyina elao liokupola onthiki ike mosimano pala okukapangiya omatukutuku novipuka ovikuavo viateka kondyuo yovapitiyi. Otyo tyinthyambukiswa unene mokonda ndyikahi nokuundapesa nawa ounongo wange nelilongesa pouna! Tyotyili, nkhele ndyityivila okupanguyula ovipuka andyivipangiya vali.

Ndyipandula unene etyi nanoñgonoka Ombimbiliya, nelao enene liokuivisa nombunga yange konthele ya Huku wike vala yotyotyili. Omulao womphangu yombembwa pano pohi, tyotyili wapilulula omuenyo wange!