Oñgeni Mokala Nonthumbi​—Yokuti Vokuankhia Mavakala Vali Nomuenyo?

Okuti okusoka okuti vokuankhia mavakakala vali nomuenyo owova? Apostulu Paulu ankho kasoko ngotyo. Wahoneka kononkhono mba Huku okuti: “Inkha momuenyo uno ankho tukevelela vala mu Kristu, opo tuetesa vali onkhenda tyipona ovanthu aveho. Mahi Pahe Kristu watutilisua po vokuankhia. Oe tete kuaveho velele mononkhia.” (1 Coríntios 15:19, 20) Paulu ankho utyii okuti etutilo otyipuka tyo tyotyili. Ekevelelo olio liapamekwa, netutilo lia Jesus.a (Atos 17:31) Otyo Paulu aihanena Jesus okuti “oe tete”—tete okututiliswa pala omwenyo uhankhi. Inkha Jesus oe tete, tyilekesa okuti kuna vali vakuavo, mavatutiliswa ngotyo.

Pena vali ehunga ekuavo malikulekesa nawa okuti vokuankhia mavakapidulwa-po. Jeova o Huku yotyili. “Huku . . . kapondola okukemba.” (Tito 1:2) Jeova kenekembe nalumwe, tupu nalumwe makakemba. Okuti upondola okuava ekevelelo lietutilo, nokulekesa okuti upondola okututilisa ovanthu, iya ahalingi etyi alaa? Jeova kapondola okulinga ngotyo.

Omokonda yatyi Jeova aavela ekevelelo lietutilo? Omokonda una oluembia. Jobe wapulile okuti: “Inkha omunthu unkhia, okuti upondola okukala vali nomuenyo? Ove moihana, iya ame andyikutavela. Moivaluka ovilinga waundapa nomavoko ove.” (Jó 14:14, 15) Jobe ankho utyii nawa okuti Tate yae keulu woluembia, una ehando enene liokumututilisa. Okuti Huku wapiluluka? Muene wati: “Ame, ame Jeova, hapilulukile.” (Malaquias 3:6) Huku nkhele uhanda vokuankhia vakale vali nomuenyo, nekongoko nehambu. Otyo tyikahi ngetyi he wokuna oluembia ahandela omona wae, tyina amanyimi. Tyelikalela vala, mokonda Huku una epondolo liokulinga etyi ahanda.—Salmo 135:6.

Jeova maavela Omona wae epondolo liokuetela ehambu enene, vana valila vavo vehole, vanyima. Iya oñgeni Jesus elitehelela konthele yetutilo? Etyi ehenetutilise Lazalu, Jesus tyemuihamene unene okutala onomphange mba Lazalu nomapanga ae, valila. Iya na Jesus “ahimbika okulila.” (João 11:35) Onthiki imwe vali, Jesus avasi omuhepe wo ko Nain, ulila omona wae ongunga wanyima. Iya Jesus “akala nokankhenda nae, emupopila okuti: ‘Muta uhalile vali.’” Iya liwa-liwa atutilisa omona wae. (Lucas 7:13) Ngotyo, Jesus ononkhia nokulila vimuihama unene. Jesus makahambukwa unene, tyina amapolo ovanthu aveho okulila, eveetela ehambu!

Okuti ove utyii-ale oñgeni tyiihama tyina wenyi amanyimi? Upondola okusoka okuti ononkhia otyitateka tyihevilwa okutetululwa. Mahi tyipondola okutetululwa—netutilo Huku makalinga menyina lio Mona wae. Hinangela okuti Huku uhanda ove utale etyi otyitateka otyo matyitetululwa. Huku uhanda ove ukakale-po, opo ukayakule venyi uhole. Nkhele soka okupanga etyi mamukalinga apeho kumwe navo, tyihakevelela vali onthiki yokuti laleipo!

Lionel, wapopiua konthyimbi, wati: “Konyima andyilongeswa konthele yetutilo. Po tete, tyepuiyile unene okutyitavela, mokonda hayumbile onthumbi momunthu ankho umphopila konthele yotyo. Mahi, andyityovolola nawa mo Mbimbiliya, iya andyiimbuka okuti otyili umwe! Ndyikevelala omuvo wokulivasa vali na tate mbuale.”

Uhanda okunoñgonoka vali konthele yotyo? Onombangi mba Jeova mavakala nehambu liokukulekesa mo Mbimbiliya yove, etyi tyevepa ekevelelo liokuti vokuankhia mavakatutiliswa.b