Omapulo Ombimbiliya Akumbululwa
Okuti nthiki imwe ouye maukakala tyihena oluhepo?
Oñgeni Huku Makaeta Ouye Uhena Oluhepo?—Mateus 6:9, 10.
Oluhepo olunene, nomauvela vikahi nokuipaa ovanthu ovanyingi kese nima. Namphila kononthele ononkhuavo mbouye kuna omalumono, mahi ovanthu ovanyingi nkhele vahepa unene. Ombimbiliya ilekesa okuti oluhepo, otyitateka tyitualako pokati kovanthu. —Tanga João 12:8.
Tyesukisa outumini wouye auho, opo oluhepo lupwe. Outumini watyo oo, una okukala nepondolo nokuvila okuavununa omalumono ouye monkhalelo yaviuka. Tupu una okumana-ko ovita, vieta vali unene oluhepo. Huku walaa okueta outumini watyo oo mautumina ouye auho.—Tanga Daniel 2:44.
Olie upondola okumana-ko oluhepo?
Huku waholovona Omona wae Jesus, opo atumine ovanthu aveho. (Salmo 2:4-8) Jesus makayovola ovahepi nokumana-ko ononkhumbi noungangala. —Tanga Salmo 72:8, 12-14.
Ngetyi Ombimbiliya yapopia, “Ohamba Yombembwa” Jesus, makaeta ombembwa netuliyo ouye auho. Konyima, aveho kombanda yohi, mavakakala nomaumbo avo muene, nokuna ovilinga vihambukiswa, nokulia okunyingi.—Tanga Isaías 9:6, 7; 65:21-23.