Omapulo Ovatangi

Etyi Sesusi atyitwa, oo Susee na Maliya nkhele vakalele vala ko Mbelei avahakondoka kotyilongo tyavo ko Nasalee, omokonda yatyi?

Ombimbiliya kayetyipopile, mahi ina ovipuka vimwe ipopia hamwe vievetwaile kokusoka okuti nkhele tukale vala ko Mbelei.

Maliya wapopililwe noandyu okuti makala omulemi haa akala nomona. Etyi oandyu yapopila Maliya otyipuka otyo, oo Maliya na Susee ankho vakala mo Nasalee, mepunda-umbo lyo Ngalileya omu mwatyitilwa Susee. (Luka 1:26-31; 2:4) Konyima oku pahe etyi vatunda ko Isitu, avaende no ko Nasalee. Sesusi ngako ekulila, atiwa umwe omu Nasalee. (Mat. 2:19-23) Otyo tutila vala tyina twamapopi ko Nasalee momutwe wetu muya ovanthu ovo vetatu, oo Sesusi na Susee na Maliya.

Ko Sundaa ankho kuna ou ukala-ko velii na Maliya utiwa o Elisabete. Elisabete yatyo oo mee ya Swau Mbatisita ankho wanepwa nomunakwa utiwa o Sakaliya. (Luka 1:5, 9, 13, 36) Maliya pena onthiki imwe akapilile ku Elisabete ko Sundaa, akalako onohanyi ononthatu. Etyi atunda oko, akondoka no ko Nasalee. (Luka 1:39, 40, 56) Opo, opo Maliya akanoñgonokela nawa o Sundaa.

Etyi pakala, Susee etavela otyitumino tyakaputu tyokuti munthu na munthu ‘ekelihonekese’ mepunda-umbo atyitwa. Susee atundu ko Nasalee aende no ko Mbelei, ngwe omu mwetyipopilile ovauli, ‘mepunda-umbo liatyo olio liatiwa o lya Ndaviti’, omo ankho mamutyitilwa Mesiya. (Luka 2:3, 4; 1 Sam. 17:15; 20:6; Miq. 5:2.) Etyi pahe Maliya apululukilwa oko Sesusi, tyipondola Susee ati nkhele hahe tukale vala kuno twahakondokei liwa ko Nasalee. Mokutala walingile ngootyo vahaende ondyila onde nolukembe. Okutunda oko okwenda no ko Selusalei, pena vala onokilometulu mbukehika petyive. Opo pahe ankho matyivepepukila vali okutwala olukembe mondywo ya Huku, pokukaava otyilikutila tyiitwa movitumino viapelwe Mwisesi. — Lev. 12:2, 6-8; Luka 2:22-24.

Oandyu yapopilile-ale Maliya okuti omona wae makapumphama ‘kotyipundi tya Ndaviti,’ ‘akalinga ohamba.’ Tyipondola oo Susee na Maliya navo tyevehuvisile umwe okutala Sesusi watyitilwa mepunda-umbo lya Ndaviti. (Luka 1:32, 33; 2:11, 17) Tyipondola hamwe vasokele avati hahe nkhele vakale vala oko avakevela hamwe Huku una etyi matolo vena okulinga.

Pomuvo oo Susee vaendelwa no vokutalela kononthungululu, katutyii onohanyi onoñgapi ankho vakala-le mo Mbelei. Mahi etyi twii okuti o Susee pahe ankho vena-le eumbo omu vakala, ya Sesusi pahe ankho ‘onkhupula-le, halukembe’ vali. (Mat. 2:11) Mokutala kavakondokele liwa ko Nasalee, nkhele vakalele umwe ononthiki mo Mbelei.

Helonde watumine “okuipaa ovana aveho ovakuendye mo Mbelei . . . okuhimbikila komalukembe alo vomanima evali.” (Mat. 2:16) Oandyu ya Siovaa ailondola oo Susee na Maliya aivepopila vataulile ko Isitu na Sesusi, ngako vakakala atee Helonde ankhia. Etyi pakala, Susee apolo-ko aveho veumbo liae, evetwala no ko Nasalee. Pokutunda ko Isitu oityi vahaviukilile ko Mbelei? Omokonda Susee walondolelwe na Huku, atiwa oko mwahayei-ko. Pomuvo opo ankho uli nokutumina o Sundeya, omona wa Helonde utiwa o Alukelau, ngwe ankho una onya. Ko Nasalee, Susee pahe ankho metyivili umwe okulongesa Sesusi alinge omunthu ufenda Huku, ankho kakulingisa vali otyiho, mokonda kutupu vali ava vayeva Sesusi. — Mat. 2:19-22; 13:55; Luka 2:39, 52.

Mokutala, Susee wanyima pweetyi nkhele Sesusi eheneikule ondyila yaava mavaende keulu. Naina, Susee makatutiliswa akakala pano pohi. Ovanyingi mavekelimona nae, mekevepopila umwe nawa omokonda yatyi vakalelele ko Mbelei ehimbwe etyi Sesusi atyitwa