Hulda Wamona Etyi Esuka Natyo

INE nthiki imwe komanima okonyima oku waile-ale pokalongo kamwe katiwa Sangir Besar, mo Indonésia, oende kelunga liatyo, tyipondola wamwene-ko ovakai vetatu Onombangi. Veiwe unene mokalongo omo mokonda yotyilinga valinga — okulongesa ovanthu Ombimbiliya. Mahi pomuvo opo, otyilinga ankho veli nokulinga hatyotyo-ko.

Otyipuka tyo tete ankho valinga, okunyingila momaande otyo vapola-mo omamanya, aveeta no koluhimba. Pahe avapumphama komapundi eli koluhimba, otyo vatyopa omamanya oo, aalingi umwe omatutu elifwe peyiyi liotyifufwa (o brita). Pahe haa avapolo oumanya oo aveupake monosaku avatyindi, avaende no keumbo. Tyina vamehiki avapake monosaku ononene, avalandesa ko vomatuku-tuku okutyinda omamanya okukatunga.

Umwe povakai ovo Onombangi, o Hulda. Ngwe wali umwe nomuvo omunyingi wokuundapa motyilinga otyo tyipona vakwavo. Onombongo ombo, ankho ombo umwe alanda nambo okulia kwo vomeumbo liavo. Mahi pahe apa ankho una etyi esuka natyo tyelikalela, hakulia vala. Ankho wahanda okulanda otelefone onene (o tablet) etyivile okunyingila mo JW Library. Hulda wetyimona okuti onovindiu, novipuka ovikwavo vili mo JW Library, mavimukwatesako movilinga viokwivisa, no pokulilongesa Ombimbiliya.

Hulda wakalele ohanyi aiho nokuundapa onoola onombali nomeya komuhuka, ononthiki mbatyo ambuho otyo avambula omamanya eyula okatuku-tuku okatutu kokutyinda omamanya. Amono umwe onombongo ankho esuka nambo mbokulanda otelefone onene.

Hulda wati: “Namphila nepwilile unene pokutyopa omamanya, etyi netyivila okuundapa nawa notelefone ei nalanda, no kolwihamo nali nalo andyilimbwa-ko umwe. Ina nokunkhwatesako unene movilinga viokwivisa, tupu tyimphepukila vali okulilongesa etyi matukalongeswa momaliongiyo.” Tupu otelefone oyo yemukwatesako unene momukihi omu wokolona, mokonda pahe ankho ovilinga viokwivisa, nomaliongiyo omotelefone vala. Twahambukwa unene Hulda wetyimona etyi ahandele.