ESHUURA 25
Nimbaasa kusingura nta omuze gw’okwemarisa?
“Nkatandika kwemarisa obu naabaire nyine emyaka munaana. Bwanyima nkeega emiteekateekyere ya Ruhanga aha nshonga egi. Nkaba nyehurira kubi buri kuheza kwemarisa. ‘Ruhanga naabaasa kukunda ata omuntu nkaanye?’ nikwo naabaire niinyebuuza.”—Luiz.
WAAHIKA omu myaka y’obushogoyo, ekyetengo ky’okwenda kuteerana nikibaasa kuba eky’amaani. Empereruka, noobaasa kugwa omu muze gw’okwemarisa.a Baingi nibabaasa kugira ngu ekyo ti kiine nshonga. Nibagira ngu kasita “tihaine ou turikukora kubi.” Kwonka, hariho enshonga nungi ahabw’enki omuntu aine kwetantara omuze ogu. Entumwa Paulo akahandiika ati: “Mwite eby’ensi ebiri omu ngingo zaanyu . . . okurigira okubi.” (Abakolosai 3:5) Okwemarisa tikurikwita okurigira okubi, kureka nikukwongyera amaani. Kandi, yetegyereze enshonga ezi:
● Okwemarisa nikureetera omuntu emiteekateekyere y’okwetaho omutima wenka. Nk’eky’okureeberaho, omu kwemarisa, omuntu naaba ataire omutima aha nyehurira z’omubiri gwe wenka.
● Okwemarisa nikureetera omuntu kureeba abu atarikushushanisa nabo obuhangwa nk’ebikoreso by’okuteerana kwemara ekyaka.
● Okweteekateekaho munonga ahabw’omuze gw’okwemarisa nikubaasa kureetera omuntu kugumirwa kumarwa omu nshonga z’okuteerana omu bushwere.
Omu mwanya gw’okucwamu kwemarisa ahabw’okwenda kwemara ekyetengo ky’okuteerana, teeraho munonga kugira okwezibira. (1 Abatesalonika 4:4, 5) Baibuli kubaasa kukuhwera kukora ekyo, neekuhiga kwetantara embeera ezirikubaasa kukutamu ekyetengo ky’okwenda kuteerana. (Enfumu 5:8, 9) Kwonka shi ku waakuba waabaire omuhuuku w’omuze gw’okwemarisa? Obundi otaireho kugucwa kwonka waaremwa. Kyorobi kuteekateeka ngu tokiine rugyendo, ngu tokibaasa kworobera emitindo ya Ruhanga. Oku nikwo omutsigazi orikwetwa Pedro yaabaire naahurira. “Ku naaremirwe kwezibira, nkehurira kubi munonga,” nikwo arikugira. “Nkaba ninteekateeka ngu tindibaasa kusaasirwa ahabw’eki naakozire. Nkaba ningumirwa kushaba.”
Ku oraabe nikwo orikwehurira otyo, huumura. Oteehwa amatsiko. Eminyeeto baingi n’abakuru babaasize kusingura omuze gw’okwemarisa. Naiwe noobaasa kusingura!
Okusingura Okweshinja
Nk’oku twareeba, abaine omuze gw’okwemarisa nibakira kweshinja. Hatariho kubangaanisa, ‘okwefuuza omu buryo bwa Ruhanga’ nikibaasa kukuha amaani g’okucwa omuze ogu. (2 Abakorinso 7:11) Kwonka okweshinja ekirenga nikubaasa kurugamu ekirikutaana n’ekyo. Nikubaasa kukureetera kwehurira kubi munonga oyende n’okurekyera aho kurwanisa omuze ogu.—Enfumu 24:10.
N’ahabw’ekyo teeraho kugira emiteekateekyere eringaniire. Okwemarisa n’ekikorwa ky’obuhwanshoni. Nikubaasa kukuhindura ‘omuhuuku w’okwetenga okubi n’okweshemeza okw’emiringo mingi,’ kandi nikwenegyeza emiteekateekyere mibi. (Tito 3:3) Kwonka nabwo, okwemarisa ti kihagaro ky’okuteerana nk’obushambani. (Yuda 7) Ku oraabe oine omuze gw’okwemarisa, toine kuteekateeka ngu okozire ekibi ekitarikubaasa kusaasirwa. Ekikuru n’okwangira ekyetengo ekyo, kandi okagumizamu noorwanisa omuze ogwo!
Kyorobi kwehurira kubi waaremwa kwezibira. Ekyo kyabaho, ijuka ebigambo ebiri omu Enfumu 24:16: “Ohikiriire agwa emirundi mushanju naimuka, kwonka ababi bagwisibwa ebihikiirizi.” Okuremwa emirundi mikye tikirikukuhindura omuntu mubi. N’ahabw’ekyo otahanika. Kureka, manya ekikureeteire kuremwa kwezibira, kandi teeraho kutagaruka kukora ekintu nikyo kimwe.
Twara obwire oteekateekye ahari rukundo ya Ruhanga n’embabazi ze. Omuhandiiki wa zaaburi Daudi owaabaire naamanya gye eki kirikumanyisa okugira obweremwa, akagira ati: ‘Nka ishe w’abaana oku arikusaasira abaana be, nikwo [Yehova] arikusaasira abarikumutiina. Ahakuba naamanya obuhangwa bwaitu, naijuka ku turi omucuucu.’ (Zaaburi 103:13, 14) Eego, Yehova naamanya obutahikiirira bwaitu, kandi naaba ayeteekateekire “kusaasira.” (Zaaburi 86:5) Kwonka, naayenda ngu tuteereho munonga kuhinduraho. Mbwenu shi noobaasa kukora ki kusingura omuze gwawe?
Shwijuma eby’okweshemeza byawe. Nooreeba ebirikwimutsya ekyetengo ky’okwenda kuteerana nka vidiyo nari entebeekanisa za tiivi nari emikura ya Intaneeti? Omuhandiiki wa zaaburi akashaba Ruhanga ati: “Ohindure amaisho gangye, garekye kureeba ebitaine mugasho.”b—Zaaburi 119:37.
Ta ebiteekateeko byawe aha bintu ebindi. Omukristaayo orikwetwa William naahabura ati: “Waaba otakagiire kubyama, shoma ekintu ekiine akakwate n’eby’omwoyo. Ni kikuru ngu ekiteekateeko ekirikuhererukirayo kimwe omu izooba kibe kiri eky’eby’omwoyo.”—Abafilipi 4:8.
Gira ou waagambiraho oburemeezi bwawe. Okuhemuka nikubaasa kukuremesa kugira ou waagambiraho oburemeezi bwawe. Kwonka, okukikora nikibaasa kukuhwera kusingura omuze gwawe! Eki nikyo Omukristaayo orikwetwa David yaayetegyereize. “Nkagambiraho tata omu mubonano,” nikwo arikugira. “Tindikwija kwebwa eki yaagambire. Arikumwenya kandi mu muringo gurikuruhuura, akagira ati: ‘Noondeetera kukwesiimisa.’ Akaba naamanya oku kyabaire nkingumiire kuhika aha kumugambira. Ebigambo ebi nibyo naabaire niinyenda kubaasa kwongyera kumariirira kucwa omuze ogu.
“Reero tata akanyoreka ebyahandiikirwe bimwe kumpwera ‘kuteehwa amatsiko ngu nsiisire ekirenga,’ kandi akanyoreka ebindi kuhamya ngu ninyetegyereza obuhango bw’ekibi kyangye. Akangira ngu ‘ngume ndi oshemeire’ kumara obwire, kuhitsya obu turaagarukye kugaaniira. Akangira ngu tinshemereire kwehurira kubi munonga naaremwa kwezibira, kureka nteereho kumara obwire buraingwa ntagarukire kukikora.” Davidi naahendera ata? Naagira ati: “Okumanyisa omuntu ondiijo oburemeezi bwangye n’obuhwezi bwe, bikangasira munonga.”c
Okweshungisa eby’okuteerana ti nshonga y’okuzaanisa. Manya ahabw’enki.
[Obugambo obw’Ahansi]
a Titushemereire kuteekateeka ngu okwemarisa nikyo kimwe n’okumara otakigyendereire. Nk’eky’okureeberaho, omwojo naabaasa kwimuka obushaija bwe bwemereire nari amaizi g’ekishaija nigabaasa kushohora gonka. Nikyo kimwe, abaishiki abamwe nibabaasa kuza omu mbeera y’okwenda kuteerana batakigyendereire na munonga baaba bari haihi kuza omu kwezi nari baaba barugiremu. Okutaana n’ekyo, okwemarisa nikitwariramu okugyenderera nkana kwemara ekyetengo ky’okwenda kuteerana.
b Kumanya ebirikukiraho, reeba akatabo 2, Eshuura 33.
c Okumanya ebirikukiraho, reeba akatabo 2, orupapura 239-241.
EKYAHANDIIKIRWE KIKURU
‘Oyetantare okwetenga okubi kw’obutsigazi, okuratire okuhikiirira, okwikiriza, okukunda, n’obusingye hamwe na boona abarikutakira Mukama n’omutima ogushemeire.’—2 Timoseo 2:22.
AKAKORYO
Shoma ebyetengo bitakabaire eby’amaani. Shaba Yehova Ruhanga kukuha “amaani agarikukirira kimwe” kusingura okwohibwa.—2 Abakorinso 4:7.
EKI WAABA NOOKIMANYA . . .
Buri muntu omweremwa naabaasa kusingurwa ekyetengo kye ky’okwenda kuteerana. Kwonka omushaija owaabuzima nari omukazi owaabuzima naayoreka okwerinda n’obu yaakuba ari wenka.
EKI NYETEEKATEEKIRE KUKORA!
Nimbaasa kuteekateeka aha bintu ebishemeire naaba ․․․․․
Omu mwanya gw’okukuratira ekyetengo kyangye, niinyija ․․․․․
Eki ndikwenda kubuuza abazaire bangye aha nshonga egi ni ․․․․․
NOOTEEKATEEKA KI?
● Ahabw’enki ni kikuru kwijuka ngu Yehova naaba ayeteekateekire “kusaasira”?—Zaaburi 86:5.
● Obu Ruhanga niwe yaahangire ekyetengo ky’okuteerana, kandi niwe arikugira ngu ogire okwezibira, mbwenu shi ashemereire kuba akwinemu bwesigye ki?
[Ekishushani]
Kuruga obu naasingura omuze ogu, ninguma ntarikweshinja omu maisho ga Yehova, kandi eki n’ekintu eki ntarikubaasa kuhaanisamu ekindi kyona!’’—Sarah
[Ekishushani]
Omu kwiruka waagwa ahansi tikirikumanyisa ngu oine kutandika busya, na waaremwa kwezibira okeemarisa, tikirikumanyisa ngu byona ebi waakozire kucwa omuze ogu bifiire busha