EKIBUUZO 5

Ku Naakuba Nindahurwa aha Ishomero?

AHABW’ENKI NI KIKURU?

Oku orikugarukamu nikubaasa kureetera embeera kuba nungi nari mbi.

NOIJA KUKORA KI?

Teekateeka aha mbeera egi: Thomas naahurira atarikwenda kuza aha ishomero hati, nyenkyakare, n’ebiro byona. Ekirikumureetera ekyo n’okugira ngu ameezi makye enyima abu arikushoma nabo babaire nibamugambuura, kandi barikumukubya amaziina. Obumwe omwegi naija ateera ebitabo bwe bigwa ahansi reero atwaza nk’owaaba atakigyendereire, nari obundi omwe omuri baingi naamureetwa enyima amutsindika, reero Thomas akihinduka abura kumanya owaamutsindika. Nyomwabazyo Thomas atungire okutiinatiinisibwa kw’amaani kurabira aha mukura ngu . . .

Ku ogire ngu niiwe Thomas, okaatwarize ota?

TEEKATEEKA AHARI EKI!

Tikirikumanyisa ngu toine bushoboorozi! Buzima, noobaasa kusingura okurahurwa otarwanire. Mu muringo ki?

GUMA OYIKAIKAINE. Baibuli neegira eti: “Omushema ayoreka butunu ekiniga kye kyona, kwonka omunyabwengye ayezibira, akiikaikanisa.” (Enfumu 29:11) Waaguma oyikaikaine, abo abarikukurahura nibabaasa kutamwa.
OTAHOORA ENZIGU. Baibuli neegira eti: “Mutaihura omuntu weena ekibi ahabw’ekibi.” (Abarooma 12:17) Waahoora enzigu noija kureetera embeera kweyongyera kuba mbi.
YETANTARE AKABI. Baibuli neegira eti: “Omwerinzi ku areeba akabi kaija, ayeshereka.” (Enfumu 22:3) Kyaba nikibaasika, yetantare abantu abarikureetaho oburemeezi, n’embeera ezirikubaasa kukurugiraho okurahurwa.
GARUKAMU OMU MURINGO OGU BATARIKUTEEKATEEKA. Baibuli neegira eti: “Okugarukamu gye kwikaikanisa ekiniga.” (Enfumu 15:1) Nk’eky’okureeberaho, ogwo orikukurahura yaakugira ngu ori muhango munonga, noobaasa kumugira oti: “Waagamba amazima, nikireebeka nyine kutuubya aha buhango!”
RUGAHO OGYENDE. Nora ow’emyaka 19 akagira ati: “Okuhunama nikyoreka ngu okuzire omu biteekateeko kandi oine amaani okukira ogwo oriyo naakurahura. Nikyoreka ngu ori omwerinzi, kandi eki n’ekintu eki orikukurahura arikuba ataine.”—2 Timoseo 2:24.
TEERAHO KWEYESIGA. Abarahuzi nibakira kurahura abo abarikwetiina kandi abarikureebeka nk’abatarikubaasa kwerwanaho. Okutaana n’ekyo, abarahuzi nibabaasa kukurugaho baareeba otarikwetiina.
GAMBIRA OMUNTU ONDIIJO. Omushomesa omwe akagira ati: “Nimpiga buri omwe orikurahurwa kugira ou yaagambira. Ekyo nikyo kihikire kukora, kandi nikibaasa kuhwera omuntu ondiijo kutarahurwa.”

Omutsigazi n’obumanzi ayemereire omu maisho g’omurahuzi — Okweyikiririzamu nikiija kukuha obumanzi obu omurahuzi ataine

**EKI OINE KUMANYA AHA KURAHURA**
KIHIKIRE NARI KIGWIRE	EBY’OKUGARUKAMU
1 Okurahura kutwire kuriho kumara emyaka enkumi n’enkumi.	1 Kihikire. Nk’eky’okureeberaho, Baibuli neegamba aha Baanefili abu eiziina ryabo ririkumanyisa “Abo Abarikureetera Abandi Kugwa Ahansi.”—Okutandika 6:4.
2 Okurahura ti kibi n’okuzaanisa omuntu kyonka. Tikwine kabi koona.	2 Kigwire. Okurahurwa ni kimwe aha bintu ebireeteire eminyeeto baingi kweita.
3 Omuringo murungi gw’okuremesa omurahuzi n’okumurwanisa.	3 Kigwire. Abarikurahura abandi nibakira kuba baine amaani okukira abu barikurahura, n’ahabw’ekyo okubarwanisa tikiine mugasho.
4 Waashanga nibarahura omuntu, okyehuzye.	4 Kigwire. Omu nshonga egi, tihariho muroreezi. Waareeba omurahuzi naarahura ondiijo okabura kugira eki waagamba, nooba rwongyerera maganya omu mwanya gw’okuhwera.
5 N’obu abarahuzi baraabe nibeetunguura, nibakira kuba bataine bwesigye.	5 Kihikire. N’obu abarahuzi baraabe nibetunguura, baingi nibaba bataine bwesigye nibagarura abandi ahansi kwehurira gye.
6 Abo abarikurahura abandi nibabaasa kuhindura aha mitwarize yaabo.	6 Kihikire. Abarikurahura baahwerwa, nibabaasa kuhindura aha ku barikuteekateeka n’oku barikutwaza.