Hariho Ediini Ei Orikubaasa Kwesiga aha by’Esente?

ESTELLEa owaabaire aine abaana mushanju, akaba naakira kuza omu kanisa. Naagira ati: “Nkagambira omwebembezi wangye w’ediini ngu niinyenda kwega Baibuli.” Kwonka taraikiriize kumwegyesa. Ekyarugiremu, Estelle akarekyera aho kuza omu kanisa. Naagumizamu agira ati: “Abeebembezi b’ekanisa egyo bakampandiikira ebaruha ngu naaba ntarikubaasa kuzayo, ngume nyohereze sente. Nkamanya ngu okuzayo n’okutazayo tibirikubakwataho, kureka nibenda sente zangye zonka.”

Angelina, otwire ari omunyadiini, akagira ati: “Omu kanisa ei naabaire ndimu, ku haabaire haba hariyo okushaba, bakaba barabyamu akaibo emirundi eshatu, kandi buri murundi tukaba twine kutamu sente. Butoosha bakaba bashaba abantu esente. Eki kikandeetera kuteekateeka ngu tibarikuheereza Ruhanga omu muringo oguhikire.”

Amadiini agari omu kicweka kyanyu nigakoresa emiringo etari emwe n’emwe kugyema abantu kuhayo sente? Mbwenu shi ekyo nikihikaana n’ebiri omu Baibuli?

NIKI EKI BAIBULI ERIKWEGYESA?

Yesu owaatandikireho Obukristaayo akagira ati: “Mukaheerwa busha, naimwe muheere busha.” (Matayo 10:8) Amakuru g’omuhendo agari omu Baibuli tigarikubaasa kugurwa sente kandi buri omwe orikugenda ashemereire kugatunga.

Abakristaayo ab’omu kyasha ky’okubanza bakaba batunga bata esente z’okukora emirimo y’ekibiina?

Buri omwe akaba ahayo ‘nk’oku amaririire omu mutima gwe, atarikunyoomwa nari arikugyemwa; ahakuba Ruhanga akunda efura.’ (2 Abakorinso 9:7) Entumwa Paulo akagira ati: ‘Tukaba tukora nyomushana na nyekiro, ngu tutagira ou twarusya omuriimwe, nitubabuurira amakuru marungi.’ (1 Abatesalonika 2:9) Paulo akaba naabaziira amahema kutunga esente z’okumuhwera omu kubuurira.​—Ebyakozirwe 18:2, 3.

ABAJURIZI BA YEHOVA BO NIBATWAZA BATA?

Abajurizi ba Yehova nibagira enteerane zaabo omu byombeko biringaniire ebirikwetwa Ebyombeko by’Obukama. Nibatunga bata esente z’okukora emirimo y’ekibiina? Tibarikurabyamu bwibo, nari kwoherereza abantu amabahasa ngu batemu sente. Kureka, buri omwe orikusiima entebeekanisa y’okuriisibwa omu by’omwoyo naata esente omu kabokisi akarikuba kari omu Kyombeko ky’Obukama.

Okuteera n’okwohereza magaziini egi nikutwara sente. Kwonka, Abajurizi ba Yehova tibarikutaho ebirango by’okurundaana sente nari kushabiiriza. Nibata omutima aha kuhwera abantu kumanya amazima ga Baibuli.

Nooteekateeka ngu omuringo ogu ogw’okutungamu esente z’okukora emirimo y’ekibiina, niguhikaana n’ebigambo bya Yesu n’oku Abakristaayo omu kyasha ky’okubanza baabaire batwaza?