Otaryetomboitera Yehova

1, 2. Ahabw’enki tutashemereire kuta orubanja ahari Yehova ahabw’oburemeezi oburi omu nsi? Shoboorora.

KA TUGIRE ngu iwe n’omukazi waawe mumazire emyaka mingi omu bushwere mwine okushemererwa. Kwonka eizooba rimwe okigaruka omu ka oshanga ebintu byona omu nju binaganagire. Entebe n’emeeza bihenzirwe, ebikopo esohaani byatagwirwe bitarikubaasa kugarurwaho. Eka yaawe ei orikukunda munonga hati yaahinduka mbi. Mbwenu shi noija kwebuuza oti: “Ahabw’enki omukazi wangye yaakora eki?” Nari noija kwebuuza oti: “N’oha owaakora eki?” Hatariho kubangaanisa noija kwebuuza ekibuuzo ekya kabiri. Ahabw’enki? Ahabw’okuba noomanya ngu omukazi waawe tarikubaasa kushiisha atyo ebintu by’omu nju.

² Obunaku obu, ensi esiisirwe emyika mibi, obushaarizi, n’emitwarize mibi. Kwonka Baibuli etuhwereire kumanya ngu Yehova tiwe bukomooko bw’oburemeezi obu bwona. Akahanga ensi egi kuba omusiri murungi munonga. (Kut. 2:8, 15) Yehova ni Ruhanga oine rukundo. (1 Yoh. 4:8) Okuguma nitushwijuma Ebyahandiikirwe kutuhwereire kumanya obukomooko bwenyine obw’oburemeezi oburi omu nsi. Sitaane Omuregi, “omutegyeki w’ensi egi” niwe bukomooko bw’oburemeezi.​—Yoh. 14:30; 2 Kor. 4:4.

3. Nitubaasa kugira tuta emiteekateekyere egwire?

³ Kwonka, Sitaane tiwe arikureetaho oburemeezi bwona oburi omu nsi. Ahabw’enki? Ahabw’okuba oburemeezi bwaitu obumwe nibubaho ahabw’okugira ngu tituhikiriire. (Shoma Eky’Ebiragiro 32:4-6.) Nitubaasa kugira ngu nitwikiriza eki. Kwonka ahabw’okugira ngu tituhikiriire, nitubaasa kugira emiteekateekyere egwire aha buremeezi bwaitu kandi eki nikibaasa kuturugiramu akabi. (Enf. 14:12) Mu muringo ki? Omu mwanya gw’okwetaho orubanja nari tukaruta ahari Sitaane, nitubaasa kutandika ‘kwetomboitera’ Yehova.​—Enf. 19:3.

4, 5. Niki ekirikubaasa kureetera Omukristaayo kwetomboitera Yehova?

⁴ Mbwenu shi n’eky’oburyo itwe ‘kwetomboitera’ Yehova? Okukora ekyo buzima ni busha. (Isa. 41:11) Omuhandiiki omwe akagira ati: “Omukono gwawe ni mugufu kubaasa kurwana na Ruhanga.” Nitubaasa kugira ngu titurikubaasa kwetomboitera Yehova. Kwonka Enfumu 19:3 nihagira ngu “obushema bw’omuntu ku bumuhabya omuhanda, omutima gwe gwetomboitera MUKAMA.” Buzima, omuntu naabaasa kwetomboitera Ruhanga omu mutima gwe. Emiteekateekyere egi neebaasa kweyorekyera omu bi omuntu arikukora. Omuntu naabaasa kugirira Yehova enziika. Ekirikurugamu, omuntu ogwo naabaasa kuruga omu kibiina nari kutashagika entebeekanisa eziine akakwate n’okuramya Yehova.

⁵ Niki ekirikubaasa kutureetera ‘kwetomboitera Yehova’? Nitubaasa kwetantara tuta omutego ogwo? Ni kikuru ngu tumanye eby’okugarukamu by’ebibuuzo ebyo. Ahabw’okuba ekyo nikikwata aha mukago gwaitu na Yehova Ruhanga!

NIKI EKIRIKUBAASA KUTUREETERA KWETOMBOITERA YEHOVA?

6, 7. Ahabw’enki Abaisraeli omu bunaku bwa Musa baayetomboiteire Yehova?

⁶ Niki ekirikubaasa kureetera omuheereza wa Yehova omwesigwa kutandika kumwetomboitera omu mutima gwe? Ka tureebe enshonga itaano n’eby’okureeberaho kuruga omu Baibuli, ebirikworeka oku bamwe ira baagwire omu mutego ogu.​—1 Kor. 10:11, 12.

⁷ Abandi okugamba ebitahikire nikubaasa kutureetera kwetomboita. (Shoma Eky’Ebiragiro 1:26-28.) Teekateeka aha ki Yehova yaakoreire Abaisraeli. Yehova akaba arugire kureeta ebibonaboneso ikumi ahari Misri, kandi bwanyima yaacwekyereza Faraho n’amahe ge omu Nyanja Erikutukura. (Kur. 12:29-32, 51; 14:29-31; Zab. 136:15) Abaisraeli bakaba bari haihi kutaaha omu Nsi Eyaraganisiibwe. Kwonka, omu bwire obwo Abaisraeli bakatandika kwetomboitera Yehova. Niki ekyabareetaire kutagira okwikiriza? Bakagira obwoba ahabw’ebitahikire ebi abamwe abaabaire bagiire kutata ensi baagambire. (Kub. 14:1-4) Hakarugamu ki? Abaisraeli boona ab’obusingye obwo tibaraikiriziibwe kutaaha omu “nsi nungi.” (Bir. 1:34, 35) Ekyo nitukyegaho ki? Ebitahikire ebi abamwe barikugamba nibibaasa kutuubya okwikiriza kwaitu, kitureetere kwetomboitera Yehova ahabw’omuringo ogu arikutwebemberamu.

8. Niki ekyareetaire Abayuda omu bunaku bwa Isaaya kwetomboitera Yehova ahabw’embeera ei baabaire barimu?

⁸ Oburemeezi nibubaasa kutumaramu amaani. (Shoma Isaaya 8:21, 22.) Omu bunaku bwa Isaaya, Abayuda bakaba nibabonabona. Bakaba betooroirwe abazigu. Eby’okurya bikaba biri bikye. Abaingi bakaba baine enjara. Kwonka okukira munonga, bakaba barekyeire aho kuhurikiza Yehova kandi omukago gwabo nawe gukaba gutandikire kusiisikara. (Amo. 8:11) Kwonka omu mwanya gw’okushaba Yehova obuhwezi omu buremeezi obwo, bakatandika ‘kukyeena’ omugabe waabo na Ruhanga waabo. Buzima, baketomboitera Yehova ahabw’oburemeezi bwabo. Naitwe twahikwaho oburemeezi, nitubaasa kwetomboitera Yehova kandi tuteekateekye ngu tarikutufaho.

9. Ahabw’enki Abaisraeli omu bunaku bwa Ezekieli baagizire emiteekateekyere egwire?

⁹ Nituba tutarikumanya amazima goona. Ahabw’okutamanya amazima goona, Abaisraeli omu bunaku bwa Ezekieli bakateekateeka ngu emitwarize ya Yehova “tehikire.” (Ezk. 18:29) Bakeetwara nk’abaine obushoboorozi bw’okucwera Ruhanga orubanja, baateekateeka ngu emitindo yaabo neekira eye n’obu baraabe baabaire batarikumanya amazima goona. Obumwe twaba tutetegyereize ekyahandiikirwe, nari ahabw’enki ebintu ebimwe nibituhikaho, mbwenu shi tushemereire kuteekateeka omu mutima gwaitu ngu emitwarize ya Yehova tehikire?​—Yob. 35:2.

10. Niki ekirikubaasa kureetera omuntu kutooreza eky’okureeberaho kibi kya Adamu?

¹⁰ Nitwanga kwikiriza ebibi byaitu n’enshobe zaitu. Omuntu w’okubanza Adamu ku yaasiisire, orubanja akaruta ahari Ruhanga. (Kut. 3:12) N’obu Adamu araabe yaabaire naamanya ebiraarugye omu kugoma, bwanyima y’okugoma kwe akacwera Ruhanga orubanja. Akaba ari nk’orikugira ngu Yehova akamuha omukazi mubi. Kuruga obwo, abantu batwire nibacwera Ruhanga orubanja ahabw’enshobe zaabo. Twine kwebuuza tuti: ‘Enshobe zangye nizibaasa kundeetera kuteekateeka ngu emitindo ya Yehova neendemesa kukora ebi ndikwenda?’

11. Nitubaasa kwega ki ahari Yona?

¹¹ Nitutandika kweteekateekaho twenka. Yehova ku yaasaasiire abantu ba Nineevi, Yona akagira ekiniga. (Yon. 4:1-3) Ahabw’enki? Naabaasa kuba yaatiinire ngu nibaija kumweta nabi w’ebishuba ahabw’okugira ngu orurembo tiruracwekyereziibwe nk’oku yaabaire agambire. Nikireebeka Yona ebiteekateeko akabita munonga aha ku abantu baakumureebire, omu mwanya gw’okubita aha bantu ba Nineevi abaayeteisize. Naitwe nitubaasa kutandika kweteekateekaho twetomboitere Yehova ahabw’okutareeta mperu ahonaaho? Nk’eky’okureeberaho, nitubaasa kuba tutwire nitubuurira kumara emyaka mingi ngu ekiro kya Yehova kiri haihi kuhika. Kwonka shi abantu baatandika kutugambuura ahabw’okugira ngu tikikahikire nitwija kwetomboitera Yehova?​—2 Pet. 3:3, 4, 9.

NITUBAASA KWETANTARA TUTA KWETOMBOITERA YEHOVA

12, 13. Twatandika kubangaanisa aha bi Yehova arikukora, tushemereire kukora ki?

¹² Nitubaasa kukora ki twatandika kubangaanisa aha bi Yehova arikukora? Ijuka ngu ekyo tiky’obwengye. Enfumu 19:3 neetwijutsya ngu ahabw’obushema, nitubaasa kwetomboitera Yehova ahabw’oburemeezi obu turikuba twereetaire. Twine ekyo omu biteekateeko, ka tureebe enshonga itaano eziraatuhwere kwetantara kwetomboitera Yehova twahikwaho oburemeezi.

¹³ Yeyongyere kuhamya omukago gwawe na Yehova. Nitubaasa kwetantara kwetomboitera Ruhanga twahamya omukago gwaitu nawe. (Shoma Enfumu 3:5, 6.) Twine kuba nitwesiga Yehova. Titwine kuteekateeka ngu nitumanya bingi kumukira nari ngu ebyetengo byaitu nibyo bikuru. (Enf. 3:7; Mub. 7:16) Eki nikiija kutuhwera kutetomboitera Yehova twahikwaho ebintu bibi.

14, 15. Niki ekiraatuhwere kutahwamu amaani ahabw’ebi abandi barikugamba ebitahikire?

¹⁴ Ebitahikire ebi abandi barikugamba bitakureetera kwetomboitera Yehova. Abaisraeli omu bunaku bwa Musa bakaba baine enshonga nyingi ezaakubareeteire kwesiga Yehova ngu naija kubahitsya omu Nsi Eyaraganisiibwe. (Zab. 78:43-53) Kwonka entatsi ikumi ku baagambire ebitahikire aha nsi egyo, Abaisraeli ‘tibaraijukire bushoboorozi bwe.’ (Zab. 78:42) Twateekateeka munonga aha bi Yehova arikukora, turikwijuka ebirungi ebi atukoreire, nikituhwera kuhamya omukago gwaitu nawe. Ekiraarugyemu, titurikwija kwikiriza ebitahikire ebi abandi barikugamba kutwiha ahari Yehova.​—Zab. 77:11, 12.

¹⁵ Kwonka twaba twine emiteekateekyere egwire aha baheereza ba Yehova bagyenzi baitu, omukago gwaitu na Yehova nigwija kufa. (1 Yoh. 4:20) Nk’eky’okureeberaho obu Arooni yaatooranwa nk’omunyamurwa omukuru, Abaisraeli baketomboita. Kwonka bakaba bari nk’abayetomboitera Yehova. (Kub. 17:10) Nikyo kimwe, twatandika kwetomboitera abu Yehova arikukoresa kwebembera ekicweka eky’omu nsi eky’ekibiina kye, nituba turi nk’abarikwetomboitera Yehova.​—Heb. 13:7, 17.

16, 17. Twine kuguma nitwijuka ki twaba twine oburemeezi?

¹⁶ Ijuka ngu Yehova tiwe arikutureetera oburemeezi. N’obu Abaisraeli omu bunaku bwa Isaaya baraabe baarugire ahari Yehova, akaba naakyenda kubahwera. (Isa. 1:16-19) N’obu twakuhikwaho buremeezi ki, nituhuumurizibwa kumanya ngu Yehova naatufaho kandi ngu naayenda kutuhwera. (1 Pet. 5:7) Naturaganisa kutuha amaani agu turikwetenga kubaasa kugumisiriza.​—1 Kor. 10:13.

¹⁷ Twabonabonesibwa nk’oku Yobu yaabonabonesiibwe, twine kwijuka ngu Yehova tiwe bukomooko bw’obutariburingaaniza. Yehova naayangira kimwe obutariburingaaniza. (Zab. 33:5) Ka tuteereho kuba nka Elihu munywani wa Yobu owaagizire ati: “Nikikabure Ruhanga okukora ebitahikire, ow’obushoboorozi bwona okukora kubi!” (Yob. 34:10) Omu mwanya gw’okutureetera oburemeezi, Yehova naatuha “engabirano yoona enungi n’ekiconco kyona ekihikire.”​—Yak. 1:13, 17.

18, 19. Ahabw’enki tutashemereire kubangaanisa aha bi Yehova arikukora? Shoboorora.

¹⁸ Otaribangaanisa ebi Yehova arikukora. Ruhanga ahikiriire, kandi ebiteekateeko bye nibikira ebyaitu. (Isa. 55:8, 9) N’ahabw’ekyo, obucureezi bushemereire kutuhwera kumanya ngu twine obugarukiro aha bi turikumanya. (Rom. 9:20) Obwire obwingi nituba tutarikumanya byona ebirikureetera ebintu ebimwe kubaho. Noobaasa kuba oreebire ebiri omu nfumu egi birikuhikiirira: “Omu rubanja, obanza kutongana oshusha oti, ebye nibyo bihikire; kwonka kitabaarizibwa ku aija amwomesereza.”​—Enf. 18:17.

¹⁹ Twaba twine munywani waitu akakora ekintu eki tutarikwetegyereza nari oku yaakikora butoosha tikwo kirikukorwa, nitwija kurahuka kumucwera orubanja ngu yaakora ekigwire? Ngaaha. Omu mwanya gw’ekyo tushemereire kwijuka ngu titurikumanya amazima goona. Ku turaabe nitubaasa kutwariza banywani baitu omu muringo murungi nk’ogwo, tushemereire kwesigira kimwe Tataitwe ow’omu iguru ou emitwarize ye n’ebiteekateeko bye birikukirira kimwe ebyaitu!

20, 21. Ahabw’enki tutashemereire kucwera Yehova orubanja ahabw’oburemeezi bwaitu?

²⁰ Manya obukomooko bw’oburemeezi. Ahabw’enki tushemereire kukora ekyo? Oburemeezi obumwe nitubaasa kuba niitwe turikubwereetera. (Gal. 6:7) Otateeraho kwetomboitera Yehova ahabw’oburemeezi obwo. Ahabw’enki ekyo kitari ky’obwengye? Teekateeka aha ky’okureeberaho eki: Emotoka neeba ekozirwe erikubaasa kwiruka munonga. Kwonka omuvugi naabaasa kugiirukanzya munonga arenge ahu ashemereire kugarukira, atungye butandu. Mbwenu shi owaagikozire niwe ashemereire kujunaanwa ahabwa butandu egyo? Ngaaha! Nikyo kimwe, Yehova akatuhanga twine obugabe bw’okwecweramu. Kwonka naatuha obuhabuzi aha ku turikubaasa kucwamu. Mbwenu shi ahabw’enki tushemereire kucwera Omuhangi waitu orubanja ahabw’enshobe zaitu?

²¹ N’eky’amazima, oburemeezi bwona obu turikutunga tiburikureetwaho enshobe zaitu n’okucwamu kubi kwaitu. Ebintu ebimwe nibibaho ‘ahabw’obunaku n’ebihikiirizi.’ (Mub. 9:11) Titushemereire kwebwa ngu Sitaane Omuregi niwe bukomooko bukuru bw’obubi. (1 Yoh. 5:19; Kush. 12:9) Yehova ti muzigu beitu omuzigu ni Sitaane!​—1 Pet. 5:8.

TWARA OMUKAGO GWAWE NA YEHOVA NK’OGW’OMUHENDO

22, 23. Tushemereire kwijuka ki twaba tuhweiremu amaani ahabw’oburemeezi obu twine?

²² Waaba oine oburemeezi, ijuka eky’okureeberaho kya Yoshua na Kalebu. Entatsi ikumi bakagamba ebitahikire aha Nsi Eyaraganisiibwe, kwonka Yoshua na Kalebu bakagamba ebihikire. (Kub. 14:6-9) Bakooreka ngu nibaikiririza omuri Yehova. Kwonka nabwo, bakamara emyaka 40 omu ihamba hamwe n’Abaisraeli abandi. Mbwenu shi Yoshua na Kalebu baketomboitera Yehova ngu ekyo tiky’oburingaaniza? Ngaaha. Bakaba nibeesiga Yehova. Mbwenu shi bakatunga emigisha? Eego buzima! N’obu ab’obusingye obwo boona baraabe bafeereire omu ihamba, Yoshua na Kalebu bakataaha omu Nsi Eyaraganisiibwe. (Kub. 14:30) Naitwe nitwija kutunga emigisha ya Yehova twaba “tutarikuhwa amatsiko” omu kukora ebi akunda.​—Gal. 6:9; Heb. 6:10.

²³ Ku oraabe ohweiremu amaani ahabw’oburemeezi, obweremwa bw’abandi, nari ahabw’okutahikiirira kwawe, oine kukora ki? Ta omutima aha mitwarize mirungi ya Yehova. Teekateeka aha matsiko agu Yehova akuhaire. Yebuuze oti: ‘Nkabaire ndi nkahi ku ntaine mukago murungi na Yehova?’ Butoosha mugume haihi kandi otaikiriza omutima gwawe kumwetomboitera!