Enshonga Ahabw’Enki Nitwetenga Ruhanga

Abahangu aha ndwara z’emitwe nibagira ngu abantu nibeetenga eby’omwoyo kubaasa kutunga okushemererwa okwabuzima. Eki nitukireeba ahabw’okuba abantu nibaba nibenda kukora ekintu ekirikubagasira nari kuheereza omuntu orikubakira. Kubaasa kwigutsya ekyetengo ekyo, bamwe nibamara obwire bwabo barikureeba ebyahangirwe, barikuhuuga ebishushani, barikuhurikiza ebyeshongoro, n’ebindi. Kwonka, nabwo baingi tibarikutunga kushemererwa okwabuzima omu bintu ebyo.

Ahabw’okugira ngu abantu nibeetenga Ruhanga, ekyo tikirikutangaaza abashomi ba Baibuli. Eshuura z’okubanza ez’ekitabo kya Okutandika nizooreka ngu Ruhanga ku yaahangire abantu b’okubanza, akaba agamba nabo butoosha, ekyabareeteire kugira omukago murungi nabo. (Okutandika 3:8-10) Ruhanga akahanga abantu batari b’okubaho ahabwabo kureka baine ekyetengo ky’okuhurizana nawe. Eki Baibuli neekigambaho emirundi mingi.

Nk’eky’okureeberaho, Yesu akagira ati: “Baine omugisha abooro omu mutima.” (Matayo 5:3) Kurugiirira aha bigambo ebyo, kubaasa kugira okushemererwa n’okumarwa twine kwigutsya ekyetengo kyaitu ky’okumanya Ruhanga. Eki nitubaasa kukikora tuta? Yesu akaha eky’okugarukamu arikugira ati: “Omuntu tatungwa by’okurya byonka, kureka n’ekigambo kyona ekiruga omu kanwa ka Ruhanga.” (Matayo 4:4) Ni miringo ki ei ebiteekateeko n’obuhabuzi bwa Ruhanga ebiri omu Baibuli, birikutubaasisa kugira ekigyendererwa n’okushemererwa? Ka twetegyereze emiringo eshatu mikuru.

Nitwetenga Obuhabuzi Burungi

Obunaku obu, hariho abahangu baingi abarikuba beteekateekire kuha obuhabuzi oburikukwata aha mukago, rukundo, amaka, okugarukana, okushemererwa, n’okugira ekigyendererwa. Yehova Ruhanga niwe ahikire kutuha obuhabuzi oburikukirayo, atarikugwera rubaju.

Nk’eky’okureeberaho: Ku orikugura ekintu, nka kamera nari kompyuta, neija n’ekihandiiko ekirikworeka oku oine kugikoresa. Baibuli nayo neegyeragyeranisibwa n’ekihandiiko nk’ekyo. Ruhanga akagihandiikisa kuhwera itwe abarikugikoresa. Ekihandiiko ekirikwija n’ekintu eki waagura nikiba nikishoboorora eki ekintu kikoreirwe n’oku kiine kukoresibwa.

Nk’oku ekihandiiko kirikworeka oku ekintu kiine kukoresibwa, na Baibuli neerabura aha bikorwa ebirikubaasa kuba eby’akabi aha bantu. Abantu nibabaasa kutuha obuhabuzi oburikureebeka nk’obworobi kukuratira, kwonka nikiba kiri eky’obwengye kukimanya ngu twakuratira obuhabuzi bwa Ruhanga nitwetantara oburemeezi.

N’obu Yehova araabe naatuha obuhabuzi, tarikutugyema kubukuratira. Kwonka ahabw’okugira ngu naatukunda, nikyo arikugirira ati: “Niinye MUKAMA Ruhanga waawe orikukwegyesa eby’okukugasira, nkakwebembera omu muhanda ogu oshemereire kutoora. Nangwa kuri waayorobeire ebiragiro byangye! Obwo obusingye bwawe bukaabaire nk’omugyera, n’okuhikiirira kwawe kuba nk’ebingonzi by’enyanja.” (Isaaya 48:17, 18) Eki nikimanyisa ngu twayorobera obuhabuzi bwa Ruhanga, nitwija kuba gye. Buzima, kubaasa kuba gye kandi tukashemererwa nitwetenga Ruhanga.

Nitwetenga Kumanya Oku Oburemeezi Buraahweho

Bamwe nibateekateeka ngu tibarikwetenga Ruhanga ahabw’okugira ngu hariho okubonabona kandi obwo kirikworekwa ngu Ruhanga aine rukundo. Nk’eky’okureeberaho, nibabaasa kwebuuza bati: ‘Ahabw’enki abantu abarungi nibabonabona?’ ‘Ahabw’enki abaana bato nibazaarwa baine obumogo?’ ‘Ahabw’enki tihariho buringaaniza?’ Ebyo n’ebibuuzo bikuru buzima, kandi okutunga eby’okugarukamu byabyo nikiija kutugasira. Omu mwanya gw’okurahuka kucwera Ruhanga orubanja ahabw’oburemeezi nk’obwo, ka tureebe oku Ekigambo kya Ruhanga Baibuli kirikushoboorora aha nshonga ezo.

Ebiri omu shuura ya kashatu omu kitabo kya Okutandika, nibyoreka ngu Sitaane, arikurabira omu njoka, akabeihabeiha abantu b’okubanza kugomera Yehova barikurya aha muti gw’okumanya oburungi n’obubi. Sitaane akagambira Haawa ati: “Okufa kwo, buzima timurifa. Ahabw’okuba Ruhanga naamanya ngu eizooba rimuriguryaho, amaisho gaanyu garyaiguka, naimwe mube nka Ruhanga, mumanye oburungi n’obubi.”​—Okutandika 2:16, 17; 3:4, 5.

Omu bigambo ebyo Sitaane akooreka ngu Ruhanga n’omubeihi kandi omwebembezi mubi. Omuregi akooreka ngu abantu baamuhurikiza nibaija kuba gye. Enshonga ezo zikaba niziija kushoboororwa zita? Yehova akareka obwire kuhinguraho kubaasa kworeka boona yaaba ebi omuregi yaagambire byabaire bihikire nari bigwire. Omu muringo ogwo Ruhanga akaba naaha Sitaane n’abaamwegaitsireho omugisha gw’okworeeka yaaba nibabaasa kuba gye bataine Ruhanga.

Nitumanya tuta ngu ebi Sitaane yaagambire n’ebishuba? Mbwenu shi abantu nibabaasa kwetegyeka kandi babe gye bataine Ruhanga? Okubonabona, obutari buringaaniza, endwara, okufa, okuhenda ebiragiro, emicwe mibi, entaro, obwinazi, n’obundi buremeezi obuteganiise abantu okumara emyaka mingi, n’obuhame oburikworeka ngu abantu tibarikubaasa kuba gye bataine Ruhanga. Baibuli terikworeka ngu Ruhanga niwe arikureetaho oburemeezi, kwonka neeyoreka obukomooko bwabwo erikugira eti: “Omuntu naayekuriza ahari mugyenzi we kumukora kubi.”​—Omubuurizi 8:9.

N’ahabw’ekyo, nikireebeka butunu ngu nitwetenga Ruhanga kutuhwera twaba twine oburemeezi. Ruhanga naija kukora ki?

Nitwetenga Obuhwezi bwa Ruhanga

Abantu batwire nibateeraho kumaraho okurwara, okukaikura, n’okufa. Bakoreise obwire bwingi, amaani, n’ebintu byabo kuhika ahari ekyo kwonka tibyabahwera. Bamwe nibateekateeka ngu okukoresa emibazi, okwejumba omu mizaano erikutendeka emibiri yaabo, n’eby’obufumu, nibibahwera kutakaikura. Kwonka ebyo byona tibirikubahwera.

Ruhanga naayenda ngu abantu batuure omu busingye n’okushemererwa. Ekyo nikyo kyabaire kiri ekigyendererwa kye obu yaahanga abantu kandi takakyebirwe. (Okutandika 1:27, 28; Isaaya 45:18) Yehova naatuhamiza ngu kyona eki arikuba agyendereire kukora nikiija kuhikiirira. (Isaaya 55:10, 11) Baibuli netugambira aha kiraganiso kya Ruhanga eky’okugaruraho Paradiso ei abantu babiri ab’okubanza baatufeerereize. Omu kitabo kya Baibuli ekirikuhererukayo, nitushangamu ebigambo ebi: “Aryaragaza amarira goona aha maisho gaabo; tiharibaho kufa bundi n’obu kwakuba okucura nari okurira nari obusaasi, ahakuba ebya ira biryaba bihweireho.” (Okushuuruurwa 21:4) Ruhanga naija kureetaho ata embeera nungi ezi, kandi nitubaasa kugasirwa tuta omu kuraganisa okwo?

Omwana wa Ruhanga Yesu Kristo, akegyesa abakuratsi be kushaba ngu ebi Ruhanga akunda bikorwe. Abantu baingi nibamanya ebigambo ebyo nari nibabigarukagarukamu baaba nibashaba. Akagira ati: “Tataitwe ow’omu iguru, eiziina ryawe ryezibwe, Obukama bwawe bwije; eby’okunda bikorwe omu nsi nk’oku bikorwa omu iguru.” (Matayo 6:9, 10) Buzima, Obukama bwa Ruhanga nibwo Yehova araakorese kwihaho oburemeezi oburetsirweho obwebembezi bw’abantu reero areete ensi ensya ei yaaraganiise.a (Danieli 2:44; 2 Petero 3:13) Twine kukora ki kubaasa kugasirwa omu kiraganiso kya Ruhanga?

Yesu Kristo akooreka eki twine kukora arikugira ati: “Aga nigo magara agatahwaho, okumanya Iwe Ruhanga omwe ow’amazima, n’Ogwo ou waatumire Yesu Kristo.” (Yohaana 17:3) Buzima, okutunga amagara agatahwaho omu nsi ensya eyaraganisiibwe nikibaasika. Amatsiko ago nigabaasa kukureetera kugarukamu ngu eego omu kibuuzo eki, Nitwetenga Ruhanga?

Obu Nibwo Bwire bw’Okuteekateeka Ahari Ruhanga

Emyaka enkumi ibiri ehingwire, entumwa Paulo ari Areopaago, omuri Aseene, akagamba ahari Ruhanga arikugambira aba Aseene ati: “Niwe wenka aha abantu boona amagara n’omwitsyo na buri kintu kyona; ahakuba omuriwe, tuba abahuriire, tugyenda kandi tugumaho; nk’abamwe aha bahimbi baanyu b’ebyeshongoro oku baagambire nibagira bati: Ahakuba naitwe turi oruzaaro rwe.”​—Ebyakozirwe 17:25, 28.

Ebi Paulo yaagambiire aba Aseene nibikikora na hati. Omuhangi waitu naatuha omwoya ogu turikwitsya, eby’okurya ebi turikurya, n’amaizi agu turikunywa. Tukaabaire tutarikubaasa kubaho tutaine bintu birungi ebi Yehova arikutuha. Kwonka shi, ahabw’enki Ruhanga naaguma n’aha abantu ebirungi n’obu baraabe batarikufayo kumuteekateekaho? Paulo akashoboorora “ngu babone kusherura Ruhanga, nibabandagira baine amatsiko g’okumugwaho, n’obu araabe atari hare n’omuntu weena omuriitwe.”​—Ebyakozirwe 17:27.

Nooyenda kumanya gye Ruhanga orikwega aha bigyendererwa bye, n’obuhabuzi oburikukwata aha kutunga amagara marungi hati n’ebiro byona? Kyaba nikwo kiri, noobaasa kugamba n’omuntu owaakuhaire magaziini egi nari abaagiteire. Nibaija kushemererwa kukuhwera.