Shemererwa Ahabw’Obugyenyi bw’Omwana gw’Entaama!

1, 2. (a) N’obugyenyi bw’oha oburaareete okushemererwa omu iguru? (b) Kandi ekyo nikireetaho bibuuzo ki?

BUTOOSHA nikitwara obwire kutebeekanisa obugyenyi. Kwonka nituza kushwijuma obugyenyi bw’omutaano. Kiteekateekeho! Butwire nibutebeekanisibwa kumara emyaka nka 2,000. Obwire buri haihi kuhika kishwera akaba hamwe n’omugore we. Bwanyima, ebyeshongoro by’okushemererwa, nibiija kuhurirwa omu kikaari ky’Omugabe, kandi amaraka nigaija kuhurirwa omu iguru garikweshongora gati: “Haleluya! Ahakuba Ruhanga waitu ow’obushoboorozi bwona ari aha ngoma. Tushemererwe, tunanukye, tumuhe ekitiinisa; ahakuba obugyenyi bw’Omwana gw’entaama buhikire, kandi Omugore we ayeteekateekire.”​—Kush. 19:6, 7.

² “Omwana gw’entaama” ou okushwera kwe kuraareete okushemererwa omu iguru ni Yesu Kristo. (Yoh. 1:29) Mbwenu shi naija kuba ajwire ata aha bugyenyi? Omugore we n’oha? Omugore ogwo atebeekanisiibwe ata ahabw’obugyenyi? Obugyenyi nibwija kubaho ryari? Obugyenyi obu nibwija kureeta okushemererwa omu iguru, kwonka shi abo abaine amatsiko g’okutuura omu nsi nabo nibaija kushemererwa? N’ekihika, ka tushwijume ebibuuzo ebyo turikweyongyera kwetegyereza Zaaburi 45.

‘EBIJWARO BYAWE BYONA NIBITAAMIRANA OMUGAJU’

3, 4. (a) Ebijwaro bya Kishwera nibishoboororwaho bita, kandi niki ekirikwongyera aha kushemererwa kwe? (b) “Bahara b’abagabe” hamwe ‘n’omugabekazi,’ abarikushemererwa hamwe Kishwera ni baahi?

³ Shoma Zaaburi 45:8, 9. Kishwera Yesu Kristo, naija kujwara emyenda ye y’obugore ey’ekitiinisa. Ebijwaro bye birimu “eby’emigaju erikuhita endiijo yoona,” nka sumuruna na kasiya, ebyabaire biri bimwe aha majuta agarikwera agaabaire gakoresibwa omuri Israeli.​—Kur. 30:23-25.

⁴ Ebyeshongoro omu iguru ebiri omu kikaari ky’Omugabe nibyongyera aha kushemererwa oku Kishwera aine ahabw’okumanya ngu obugyenyi bwe bwiriire haihi. Naashemererwa hamwe ‘n’omugabekazi,’ nikyo kicweka eky’omu iguru eky’ekibiina kya Yehova ekirikutwariramu “bahara b’abagabe,” nibo baamaraika abarikwera. Ka nikishemeza kuhurira ebihangirwe eby’omu iguru nibigira biti: “Tushemererwe, tunanukye . . . ahakuba obugyenyi bw’Omwana gw’entaama buhikire”!

OMUGORE ATEBEEKANISIIBWE AHABW’OBUGYENYI

5. “Muka Omwana gw’entaama” n’oha?

⁵ Shoma Zaaburi 45:10, 11. Twaheza kwetegyereza kishwera, kwonka omugore we n’oha? Omugore ni bamwe aha bari omu kibiina Ekikristaayo ekirikwebemberwa Yesu Kristo. (Shoma Abaefeso 5:23, 24.) Kandi nibaija kutegyeka na Kristo omu butegyeki bwe. (Luk. 12:32) Abakristaayo abashukirweho amajuta 144,000 “nibo bakuratira Omwana gw’entaama ei aza yoona.” (Kush. 14:1-4) Nibaba “muka Omwana gw’entaama” kandi baza kutuura nawe omu iguru.​—Kush. 21:9; Yoh. 14:2, 3.

6. Ahabw’enki abashukirweho amajuta nibeetwa “Muhara w’omugabe,” kandi ahabw’enki nibaragiirwa ‘kwebwa eihanga ryabo’?

⁶ Omugore ogu naagambwaho nka “Muhara w’omugabe.” (Zab. 45:13) Mbwenu shi “Omugabe” n’oha? Abashukirweho amajuta nibatwarwa ‘nk’abaana’ ba Yehova. (Rom. 8:15-17) Ahabw’okugira ngu abashukirweho amajuta nibaija kuba abagore omu iguru, nibaragiirwa bati: “Oyebwe eihanga ryawe n’enju ya sho.” Kandi nibahigwa ‘kuta omutima aha by’omu iguru, bakareka eby’omu nsi.’​—Kol. 3:1-4.

7. (a) Kristo atwire naatebeekanisa ata ogwo oraabe omugore we omu biro by’omumaisho? (b) Mbwenu shi omugore naatwara ata orikuza kumushwera?

⁷ Kumara ebyasha bingi, Kristo atwire naatebeekanisa omugore we ahabw’obugyenyi bw’omu iguru. Entumwa Paulo akashoboorora ngu nk’oku Kristo yaakunzire ekibiina, akeehayo ahabwakyo, ngu akyeeze, aherize kukishemeza ahabw’okukyogyesa “amaizi n’Ekigambo kye,” ngu ekibiina ekyo kibone “kumurikwa omu maisho ge” kiri eky’ekitiinisa, kitaine “eibara n’obu gwakuba omufunya, nari ekintu kyona ekirikushusha kityo,” kureka ngu kibe ekirikwera ekitaine “kamogo.” (Efe. 5:25-27) Paulo akagambira Abakristaayo abashukirweho amajuta ab’omuri Korinso ati: “Nimbagirira eihato rya Ruhanga, ahabw’okuba nkabahingira Kristo, ngu mbareete omu maisho ge nk’omwishiki oshugaine oku ahingirwa omushaija omwe.” (2 Kor. 11:2) Kishwera Yesu Kristo, naasiima omugore we “ahabw’oburungi” bwe. N’omugore naamumanya nka “Mukama” we kandi amwinamira nk’orikwija kuba iba omu biro by’omumaisho.

OMUGORE ‘KUTWARIRWA OMUGABE’

8. Ahabw’enki kihikire kugamba aha mugore nk’oine ‘ekitiinisa kingi’?

⁸ Shoma Zaaburi 45:13, 14a. Omugore naagambwaho nk’oine ‘ekitiinisa kingi’ aha bugyenyi. Omu Okushuuruurwa 21:2, omugore naagyeragyeranisibwa n’orurembo Yerusaalemu orusya orutebeekanisiibwe “nk’omugore ocumiirwe iba.” Orurembo oru orw’omu iguru rwine “ekitiinisa kya Ruhanga” kandi nirumurinkana “nk’eibaare ry’obuguzi bwingi, eririkwetwa yasipi, eririkwengyengyeta nka kristalo.” (Kush. 21:10, 11) Oburungi bwa Yerusaalemu orusya nibugambwaho omu kitabo kya Okushuuruurwa. (Kush. 21:18-21) Niyo nshonga ahabw’enki omuhandiiki wa zaaburi naagamba aha mugore nk’oine ‘ekitiinisa kingi’! Kandi obugyenyi obwo buri omu iguru.

9. “Omugabe” orikureeterwa omugore n’oha, kandi ajwaire ata?

⁹ Ogwo orikutwarirwa omugore ni Kishwera kandi niwe Mugabe w’Obukama bwa Ruhanga. Atwire naatebeekanisa omugore, ‘arikumushemeza.’ Hati ‘n’orikwera taine kamogo.’ (Efe. 5:26, 27) Omugore ashemereire kujwekwa gye ahabw’omukoro. Buzima, “ajwaire eby’ekitiinisa kingi ebirukirwemu ezaabu,” kandi “baryamutwarira omugabe ajwaire emyenda etariize n’amabara maingi.” Aha bugyenyi bw’omwana gw’entaama, omugore naikirizibwa “kujwara emyenda mirungi eya kitaani erikwengyengyeta kandi erikwera; egyo myenda ya kitaani nibyo by’okuhikiirira by’abarikwera.”​—Kush. 19:8.

‘OBUGYENYI BUHIKIRE’

10. Nk’oku kiri omu Zaaburi 45, obugyenyi bw’Omwana gw’entaama nibworekwa burikubaho ryari?

¹⁰ Shoma Okushuuruurwa 19:7. Obugyenyi bw’Omwana gw’entaama bukaabaireho ryari? N’obu “omugore we ayeteekateekire” ahabw’obugyenyi, ebiri omu nyiriri ezirikukurataho tibirikugamba aha bugyenyi obwo. Kwonka, nibishoboorora aha kicweka eky’ahamuheru eky’okubonabona kwingi. (Kush. 19:11-21) Mbwenu shi eki nikimanyisa ngu obugyenyi nibwija kubaho Omugabe Kishwera atakasingwire? Ngaaha. Okworekwa okuri omu Okushuuruurwa tikurahandiikirwe kukurataine. Omu Zaaburi 45, obugyenyi nibworekwa burikubaho bwanyima y’Omugabe kuhagatira rurara ye ‘akagyenda kusingura’ abazigu be.​—Zab. 45:3, 4.

11. Okusingura kwa Kristo nikwija kukuratana kuta?

¹¹ N’ahabw’ekyo, nitubaasa kuhendera turikugira ngu ebiraabeho nibiija kukuratana biti: Eky’okubanza, Babulooni Orurembo Orukuru, nigo madiini goona ag’ebishuba kandi “maraaya omukuru,” nirwija kucwerwa orubanja. (Kush. 17:1, 5, 16, 17; 19:1, 2) Ekiraakurateho, Kristo naija kucwekyereza ensi egi embi ahari Haramagedoni, orugamba “orw’ekiro kikuru kya Ruhanga ow’obushoboorozi bwona.” (Kush. 16:14-16; 19:19-21) Bwanyima, Omugabe naija kusingurira kimwe arikuboha Sitaane na baadaimoni be, ekirikumanyisa okutagaruka kugira eki baakora.​—Kush. 20:1-3.

12, 13. (a) Obugyenyi bw’omwana gw’entaama nibwija kubaho ryari? (b) Omu iguru, ni baahi abaraashemererwe ahabw’obugyenyi bw’omwana gw’entaama?

¹² Abashukirweho amajuta ku barikufa omu bwire bw’okubaho kwa Kristo, nibazoorwa batwarwa omu iguru. Bwanyima y’okucwekyerezibwa kwa Babulooni Orurembo Orukuru, Yesu naija kurundaana boona abaraabe omugore. (1 Tes. 4:16, 17) N’ahabw’ekyo, orutaro rwa Haramagedoni rutakatandikire, abo boona abaraabe ‘omugore’ nibaija kuba bari omu iguru. Bwanyima y’orutaro orwo, obugyenyi bw’omwana gw’entaama nibwo buraabeho. Obugyenyi obwo ka nibwija kureeta okushemererwa! Okushuuruurwa 19:9 nihagira hati: “Baine omugisha abarikwetwa aha bugyenyi bw’Omwana gw’entaama.” Buzima 144,000 nibaija kushemererwa. Omugabe kishwera naija kushemererwa munonga ahabw’okuba hamwe n’abo abu araategyeke nabo, omu muringo gw’akamanyiso barikurya kandi bakanywa nawe aha meza ye omu bukama bwe. (Luk. 22:18, 28-30) Kwonka, Kishwera n’omugore we tibo bonka abaraashemererwe ahabw’obugyenyi obwo.

¹³ Nk’oku twaba twareebire, ebihangirwe eby’omu iguru nibyeshongora hamwe biti: “Tushemererwe, tunanukye, tumuhe [Yehova] ekitiinisa; ahakuba obugyenyi bw’Omwana gw’entaama buhikire, kandi Omugore we ayeteekateekire.” (Kush. 19:6, 7) Kandi shi abaheereza ba Yehova ab’omu nsi? Mbwenu shi nabo nibaija kwejumba omu kushemererwa okwo?

“BARYAREETWA BAINE OKUSHEMERERWA N’OKWESIIMA”

14. Nk’oku kirikugambwaho omu Zaaburi 45, “abaishiki bagyenzi” b’omugore ni baahi?

¹⁴ Shoma Zaaburi 45:12, 14b, 15. Nabi Zekaria akagira ngu omu bunaku bw’aha muheru, abantu b’amahanga goona bakaba nibaija kukwatanisa n’Omuyudaaya. Akahandiika ati: “Omuri ebyo biro abantu ikumi, abarikuruga omu mahanga aga buri rurimi, baryakwata omukugiro gw’ekanzu y’Omuyudaaya bamugire bati: Ka tugyende naimwe; ahabw’okuba tuhuriire ku Ruhanga ari naimwe.” (Zek. 8:23) Omu Zaaburi 45:12, “abantu ikumi” abakamanyiso nibagambwaho ‘nk’aba Tuuro’ hamwe “n’abarikukira obutungi omu bantu.” Nibaija aha bashukirweho amajuta abakiri omu nsi, barikwenda ngu babahwere omu by’omwoyo. Kuruga 1935, abantu nyamwingi baikiriize abashukirweho amajuta ‘kubareeta omu kuhikiirira.’ (Dan. 12:3) Abakristaayo abeesigwa abarikushagika abashukirweho amajuta beeshemeize baahinduka abashugaine omu by’omwoyo. “Abaishiki bagyenzi” b’omugore beehaireyo ahari Yehova kandi bagumire bari abeesigwa ahansi y’obutegyeki bw’Omugabe Kishwera.

15. “Abaishiki” batwire nibakwatanisa n’abashukirweho amajuta abakiri omu nsi mu muringo ki?

¹⁵ Abashukirweho amajuta nibasiima “abaishiki bagyenzi” baabo ahabw’okubahwera omu kubuurira “engiri egi ey’obukama” omu nsi yoona. (Mat. 24:14) “Omwoyo n’Omugore nibagira bati: Ija! Kwonka n’ogwo orikuhurira naagira ati: “Ija!” (Kush. 22:17) ‘Ab’entaama ezindi’ bakahurira abashukirweho amajuta barikugira ngu “Ija!” nabo baabegaitaho barikugira ngu “Ija!” barikweta abantu omu nsi yoona.​—Yoh. 10:16.

16. Yehova ahaire ab’entaama ezindi mugisha ki?

¹⁶ Abashukirweho amajuta abari omu nsi nibakunda bagyenzi baabo ab’entaama ezindi. Nibashemererwa kumanya ngu Yehova ahaire omugisha ab’entaama ezindi kwejumba nabo omu kushemererwa ahabw’obugyenyi bw’omwana gw’entaama oburaabe omu iguru. Kikagambwa ngu “abaishiki” abo “baryareetwa baine okushemererwa n’okwesiima. Ab’entaama ezindi abaine amatsiko g’okutuura omu nsi ebiro byona, nibaija kwejumba omu kushemererwa ahabw’obugyenyi bw’omwana gw’entaama. Ekitabo kya Okushuuruurwa kihikire ku kirikugira ngu “omutwe muhango gw’abantu” nibareebwa “beemereire omu maisho g’ekitebe ky’obukama n’omu maisho g’Omwana gw’entaama.” Nibaheereza Yehova omu kibuga kya hekalu ey’eby’omwoyo ey’omu nsi.​—Kush. 7:9, 15.

‘OMU MWANYA GWA BAISHENKURU HARYAGARUKAMU BATABANI BAAWE’

17, 18. Obugyenyi bw’omwana gw’entaama nibwija kureeta birungi ki, kandi ni baahi abu Kristo araabe ishebo omu Butegyeki bwe obw’Emyaka Rukumi?

¹⁷ Shoma Zaaburi 45:16. “Abaishiki bagyenzi” b’abashukirweho amajuta haine ekindi ekiraabareetere okushemererwa ku baraareebe ebirungi ebirugire omu bugyenyi obwo omu nsi ensya. Omugabe Kishwera naija kuta omutima aha nsi azoore ‘baishenkuru’ ab’omu nsi abaraabe “batabani” be ab’omu nsi. (Yoh. 5:25-29; Heb. 11:35) Kuruga omuri aba nimwo aratoorane abanyiginya “omu nsi yoona.” Tihariho kubanganisa ngu Kristo naija kutoorana omu bareeberezi abeesigwa abariho obunaku obu, kwebembera abaheereza be omu nsi ensya.​—Isa. 32:1.

¹⁸ Omu Butegyeki bwe obw’Emyaka Rukumi, Kristo naija kuba Ishe w’abandi bantu. Abantu abaraatuure omu nsi nibaija kutunga amagara agatahwaho ahabw’okwikiririza omu kitambo kya Yesu. (Yoh. 3:16) Omu muringo ogwo naija kuba “Tataitwe otahwaho.”​—Isa. 9:6, 7.

BAINE EKIHIKA KY’OKUMANYISA EIZIINA RYE

19, 20. Ebiri omu Zaaburi 45 nibikwata bita aha Bakristaayo ab’amazima obunaku obu?

¹⁹ Shoma Zaaburi 45:1, 17. Buzima, ebiri omu Zaaburi 45 nibikwata aha Bakristaayo boona. Abashukirweho amajuta abakiri omu nsi baine amatsiko g’okwegaita ahari bagyenzi baabo omu iguru. Ab’entaama ezindi nibakunda kuguma niboorobera Omugabe waabo ow’ekitiinisa kandi nibasiima omugisha gw’okukwatanisa n’abashukirweho amajuta abakiri omu nsi. Bwanyima y’obugyenyi, Kristo n’abu araategyeke nabo nibaija kureetera abaraatuure omu nsi emigisha mingi.​—Kush. 7:17; 21:1-4.

²⁰ Tukitegyereize okuhikiirizibwa ‘kw’ebigambo birungi’ ebirikukwata aha Mugabe w’Obukama bwa Ruhanga, ka tuteereho kumanyisa abandi eiziina rye. Ka tuteereho kuba hamwe n’abo abarikuhimbisa Omugabe ebiro n’ebiro.