Ahabw’Enki Twine Kushaba?

Noobaasa kwebuuza oti: ‘Ruhanga ku araabe naamanya byona, otwariiremu ebiteekateeko byangye n’ebi ndikwetenga, ahabw’enki nikinyetengyesa kushaba?’ Nooba ohikire kubuuza otyo. Yesu akagira ngu Ruhanga “amanya ebi mukyenire mutakamushabire.” (Matayo 6:8) Omugabe Daudi owa Israeli eya ira eki akakyetegyereza, kandi yaahandiika ati: “Orurimi rwangye ku ruba rutakashohoize kigambo, reeba MUKAMA iwe oba waakimanyiire kimwe.” (Zaaburi 139:4) Mbwenu shi ahabw’enki nitwetenga kushaba? Kugarukamu ekibuuzo ekyo, ka tushwijume eki Baibuli erikugamba aha kushaba kw’abaheereza ba Ruhanga.a

OKUSHABA NIKUTWIRIZA HAIHI NA RUHANGA

Baibuli neeyoreka ngu Yehovab Ruhanga naamanya byona ebirikukwata aha baheereza be. (Zaaburi 139:6; Abarooma 11:33) Yehova tari nka kompyuta erikubiika ebi bagitairemu byonka, ahabw’okuba okumanya kwe tikwine bugarukiro. Ruhanga naafayo aha biteekateeko byaitu ahabw’okuba naayenda ngu tumwirire haihi. (Zaaburi 139:23, 24; Yakobo 4:8) Egi niyo nshonga ahabw’enki Yesu yaahigire abakuratsi be kushaba, n’obu Ishe araabe naamanya ebi barikwetenga. (Matayo 6:6-8) Oku turaagume nitugambira omuhangi waitu ebi turikuteekateeka, nikwo turaayeyongyere kumwirira haihi.

Obumwe nikibaasa kutugumira kumanya kyenyine eki twine kushaba. Omu mbeera nk’ezo, Ruhanga naabaasa kureeba enyehurira zaitu ezi tutarikubaasa kworeka kandi akorese okumanya kwe kutuhwera kurugiirira aha bi turikwetenga. (Abarooma 8:26, 27; Abaefeso 3:20) Twaheza kukimanya ngu Ruhanga naatuhwera n’omu miringo ei tutarikurahuka kureeba, nitumwirira haihi.

MBWENU SHI RUHANGA NAAGARUKAMU OKUSHABA KWONA?

Baibuli neetuhamiza ngu Ruhanga naagarukamu okushaba kw’abaheereza be abeesigwa, kandi neeyoreka ahabw’enki atarikugarukamu okushaba okumwe. Nk’eky’okureeberaho, omu bunaku obu obushaarizi bwabaire buri bwingi omu Israeli eya ira, Ruhanga akaragiira nabi Isaaya kugambira abantu ati: “Nangwa n’obu muriguma nimushaba hakye-hakye, tindibahurira; ahabw’okuba engaro zaanyu ziijwire eshagama.” (Isaaya 1:15) Hatariho kubanganisa, abo abatarikworobera biragiro bya Ruhanga kandi abarikushaba baine ebigyendererwa bibi Ruhanga tarikubaasa kugarukamu okushaba kwabo.​—Enfumu 28:9; Yakobo 4:3.

Kandi Baibuli neegumizamu egira eti: “Ku tushaba ekintu kyona nk’oku akunda, atuhurira.” (1 Yohaana 5:14) Mbwenu shi ekyo nikimanyisa ngu Ruhanga naaha abaheereza be kyona eki barikumushaba? Ngaaha buzima. Teekateeka aha mbeera y’entumwa Paulo owaashabire Ruhanga emirundi eshatu kumwiha “eihwa omu mubiri”. (2 Abakorinso 12:7, 8) Paulo naabaasa kuba yaabaire arwaire endwara y’amaisho. Ekyo ka nikibaasa kuba kyabaire kimugumiire! Paulo akaba yaahairwe amaani g’okukiza kandi akaba yaazoire n’omuntu, kwonka kandi akaba aine kwemera endwara ye. (Ebyakozirwe 19:11, 12; 20:9, 10) N’obu okushaba kwa Paulo kuraabe kutaragarukirwemu nk’oku yaabaire naayenda, akaikiriza obuhwezi bwa Ruhanga.​—2 Abakorinso 12:9, 10.

Bamwe aha baheereza ba Ruhanga, okushaba kwabo kukagarukwamu omu muringo gw’eky’okutangaaza. (2 Abagabe 20:1-7) Ruhanga akaba atarikukira kugarukamu atyo okushaba nangwa n’omu bunaku bw’okuhandiikwa kwa Baibuli. Bamwe aha baheereza ba Ruhanga bakaba bashoberwa ku baabaire bateetegyereza omuringo ogu Ruhanga yaagarukamu okushaba kwabo. Omugabe Daudi akabuuza Yehova ati: “Oryahitsya hi okuunyebwa obutwire bwona?” (Zaaburi 13:1) Kwonka Daudi ku yaaherize kumanya emirundi mingi ei Yehova yaamucungwire, akagaruka yaamwesiga. Daudi akagumizamu yaagira ati: “Nyesigire embabazi zaawe.” (Zaaburi 13:5) Abaheereza ba Ruhanga obunaku obu nikibaasa kubetengyesa kuguma nibashaba kuhitsya baakimanya ngu Ruhanga yaagarukamu okushaba kwabo nk’oku Daudi yaakozire.​—Abarooma 12:12.

OKU RUHANGA ARIKUGARUKAMU OKUSHABA

Ruhanga naagarukamu okushaba okushemeire.

Obumwe, abazaire abarikufayo aha baana baabo tibarikubaha buri kimwe eki barikubashaba ahonaaho baaheza kukishaba. Omu muringo nigwo gumwe, Ruhanga naabaasa kutagarukamu kushaba kwaitu omu muringo ogu turikuteekateeka nari obu turikuteekateeka ngu naija kutugarukamu. Kwonka nitubaasa kugira obuhame ngu omuhangi waitu ari nk’omuzaire oine rukundo, kandi naija kugarukamu okushaba kwaitu okushemeire, omu bwire obuhikire n’omu muringo oguhikire.​—Luka 11:11-13.

Obumwe naagarukamu omu miringo etarikurahuka kureebwa.

Mbwenu shi twashaba ngu tutungye okuhuumurizibwa aha buremeezi obu turikuba twine, Yehova yaaba atabwihireho twine kuteekateeka ngu tagarukiremu kushaba kwaitu? Twine kuteeraho kureeba yaaba Ruhanga atuhwereire omu muringo ogu tutarikurahuka kureeba. Nk’eky’okureeberaho, noobaasa kushanga ngu munywani waawe akuhwereire omu bwire obuhikire. (Enfumu 17:17) Yehova naabaasa kuba niwe ahigire omuntu ogwo kukuhwera. Okwongyera ahari ekyo, Ruhanga naabaasa kugarukamu okushaba kwaitu kurabira omu Baibuli. Nitubaasa kushangamu obwengye oburikwetengyesa kubaasa kwemera embeera egumire.​—2 Timoseo 3:16, 17.

Omu mwanya gw’okwihaho oburemeezi, Ruhanga naakira kuha abaheereza be amaani kubaasa kubwemera. (2 Abakorinso 4:7) Nk’eky’okureeberaho, Yesu ku yaashabire Ishe kwihaho embeera egumire, arikuteekateeka ngu Ishe yaaba atakikozire nikibaasa kujumisa eiziina rye, Ishe akoohereza maraika kumugumya. (Luka 22:42, 43) Nikyo kimwe, Yehova naabaasa kukoresa munywani waitu ow’ahamara kutugaruramu amaani omu bwire obuhikire. (Enfumu 12:25) Ahabw’okugira ngu omuringo nk’ogu tigurikurahuka kureebwa, nikibaasa kwetengyesa ngu tugume nitwetegyereza omuringo ogu Ruhanga arikugarukamu okushaba kwaitu.

Obumwe Ruhanga naagarukamu omu bunaku bwe obuhikire.

Baibuli neegira ngu Ruhanga naagirira abacureezi embabazi omu ‘bunaku obuhikire.’ (1 Petero 5:6) N’ahabw’ekyo, titushemereire kuteekateeka ngu Yehova yaatuuraho kugarukamu okushaba kwaitu naaba atarikutufaho. Ahabw’okugira ngu Ruhanga waitu naamanya bingi kutukira, naagarukamu okushaba kwaitu kurugiirira aha bi arikureeba ngu nibyo birungi aha bwaitu.

Teekateeka aha ky’okureeberaho eki: Ku waakuba oine mutabani waawe muto akakushaba egaari. Mbwenu shi ahonaaho noija kugimuha? Waateekateeka ngu takabaasize kuvuga gaari n’obwegyendesereza noobaasa kucwamu kutagigura ahonaaho. Kwonka obwire bwahinguraho okareeba ngu naabaasa kugikoresa gye, noobaasa kucwamu kugimugurira. Omu muringo nigwo gumwe, Ruhanga naabaasa kutuha ‘ebi omutima gwaitu gurikwetenga’ omu bunaku obuhikire twagumizamu nitumushaba.​—Zaaburi 37:4.

YESIGE YEHOVA NGU NAAGARUKAMU OKUSHABA

Baibuli neehiga Abakristaayo kuguma nibamanya ngu okushaba ni kikuru. Abamwe nibabaasa kugira ngu ‘ekyo kyorobi kugamba kwonka kigumire eikora.’ N’amazima ngu twaba tutwire twine oburemeezi obutarikurugaho nikibaasa kutugumira kutegyereza Ruhanga kuhitsya obu araatugarukemu. Kwonka nikiba kiri kirungi kwijuka eki Yesu yaayegyeise aha kushaba tutarikuruha.

Yesu akaha eky’okureeberaho eky’omufaakazi owaabaire aza ow’omuramuzi otarikutiina Ruhanga ngu ashoboorore orubanja rwe. (Luka 18:1-3) N’obu omuramuzi ogwo yaayangire kuhwera omufaakazi omu kubanza, akarugaho yaagira ati: “Naaza kumushoboorora, arekye kuguma naija obutoosha kundusya.” (Luka 18:4, 5) Kurugiirira aha rurimi oru ebigambo ebi byabandize kuhandiikwamu, omuramuzi akahwera omufaakazi ahabw’okutenda ngu agume naamuzeereera omu maisho,” nari omu muringo gw’akamanyiso kutenda ngu “ashiishe eiziina rye.”c Omucwi w’emanja nk’ogwo ku araabe yaahweraire omufaakazi ogwo ahabw’okutenda ngu eiziina rye risiisikare mbwenu shi Ruhanga tarikiraho kuhwera abo ‘abamutakira nyomushana na nyekiro?’ Nk’oku Yesu yaagambire, Ruhanga “aryarahuka kubashoboorora.”​—Luka 18:6-8.

Titushemereire kuruha aha bikwatiraine n’okushaba obuhwezi. Twagumizamu nitushaba obutoosha, nikiija kworeka ngu buzima twine ekihika ky’okwenda kureeba Ruhanga arikutuhwera. Nikituhwera n’okumanya emiringo ei Yehova arikutuhweramu kandi nikitwiriza haihi nawe. Ka tugume twine obumanzi ngu Yehova naija kugarukamu okushaba kwaitu okuhikire twaguma nitumushaba twine okwikiriza.​—Luka 11:9.