Ruhanga Naareeba Ebirikukuhikaho

ENSHONGA AHABW’ENKI ABAMWE NIBABANGANISA: Kurugiirira aha kucondooza okuherize kubaho, ekizinga eki turimu kyonka kirimu ensi hamwe n’ebigyetoroire ebirikuhika nk’obuhumbi 100. Ahabw’okugira ngu ebi Ruhanga yaahangire ni bingi kandi nibihango, abantu baingi nibeebuuza bati: ‘Ahabw’enki Omuhangi ow’obushoboorozi bwona aine kureeba ebirikuhika aha bantu abatari b’omuhendo abari aha nsi nkye munonga?’

EKI EKIGAMBO KYA RUHANGA KIRIKWEGYESA: Ruhanga taratuhaire Baibuli reero akarekyera aho kutufaho. Kureka, naatuhamiza ati: “Ndyakuha obwengye, nkutaireho eriisho.”​—Zaaburi 32:8.

Teekateeka ahari Hagari, Omunyamisri ow’omu kyasha kya 20 Yesu atakazairwe. Hagari akaba atarikuha kitiinisa mukama we Sarai, n’ahabw’ekyo Sarai akatwariza kubi Hagari yaahunga yaaza omu ihamba. Mbwenu shi ahabw’okugira ngu Hagari akaba akozire enshobe, Ruhanga akaba atakimufaho? Baibuli neegira eti: “Maraika wa MUKAMA yaamushanga.” Maraika ogwo akahamiza Hagari arikugira ati: “MUKAMA ahuriire okwitwa kubi kwawe.” Bwanyima Hagari akagira Yehova ati: “Niiwe Ruhanga oreeba.”​—Okutandika 16:4-13.

“Ruhanga oreeba” naiwe naakureeba. Nk’eky’okureeberaho: Omukazi omuzaire oine rukundo naaguma naareeba ebi abaana be abato barikukora, ahakuba abaana baaba bakiri bato, abazaire nibaba nibabafaho munonga. Nikyo kimwe, Ruhanga naatufaho munonga twaba tutaine maani nari twine oburemeezi. Yehova naagira ati: “Ntuura omu mwanya gw’ahaiguru kandi ogurikwera hamwe n’ow’omutima gurikweteisa kandi omucureezi, ngu mbone kuhimbuura emyoyo y’abacureezi, n’emitima y’abarikweteisa.”​—Isaaya 57:15.

Kwonka, noobaasa kwebuuza oti: ‘Ruhanga naareeba ata ebirikumpikaho? Mbwenu shi naancwera orubanja kurugiirira aha ndeebeka yangye, nari naareeba ebi ndikukora kandi anyetegyereza?’