Ruhanga Naayenda Kugira Omukago Naiwe

ENSHONGA AHABW’ENKI ABAMWE NIBABANGANISA: Baingi nibaikiririza omuri Ruhanga kwonka nibahurira bari hare nawe. Christina ow’omuri Ireland owaabaire naakira kuza omu kanisa buri saabiiti naagira ati: “Nkaba nnimanya ngu Ruhanga niwe yaahangire ebintu byona. Kwonka nkaba ntarikumwetegyereza. Tihariho omurundi na gumwe obu naabaire ndahuriire ndi haihi nawe.”

EKI EKIGAMBO KYA RUHANGA KIRIKWEGYESA: Yehova tarikubaasa kurekyera aho kuteeraho kutuhwera, n’obu twakuhaba. Yesu arikworeka oku Ruhanga arikutufaho akagira ati: “Omuntu ku aba aine entaama igana, emwe aharizo yaarara, tatsiga ziri makumi mwenda na mwenda aha mugongo, akaza kusherura egyo erazire?” Eki nitukyegaho ki? “Nikwo na Tata ori omu iguru atarikwenda omwe ahari aba bato kuhwerekyerera.”​—Matayo 18:12-14.

Buri “omwe ahari aba ” abato n’ow’omuhendo ahari Ruhanga. Ruhanga naasherura ata abo abarikuba barazire? Kurugiirira aha kyahandiikirwe ekiri aha kutandika, Yehova naayeyiriza abantu haihi.

Teekateeka aha ki Ruhanga yaakozire kubaasa kweyiriza abantu abeesigwa haihi. Omu kyasha ky’okubanza Yesu aherize kuzaarwa, Ruhanga akoohereza Filipi omwegi wa Yesu kuza kubugana omukungu Omuesiopia kuhikaanisa nawe ebiteekateeko aha makuru g’obunabi bwa Baibuli obu Omuesiopia ogwo yaabaire naashoma. (Ebyakozirwe 8:26-39) Obundi, Ruhanga akaragiira entumwa Petero kuza kutaayaayira Koruneelio omukuru w’abaserukare Omurooma, owaabaire naashaba Ruhanga kandi arikuteeraho kumuramya. (Ebyakozirwe 10:1-48) Kandi Ruhanga akahwera n’entumwa Paulo n’abu yaabaire ari nabo kuza aha mugyera aheeru y’orurembo Filipi, ahu baashangire Ludia “owaabaire atiina Ruhanga.” Yehova akaigura “omutima gwe” kuhurikiza.​—Ebyakozirwe 16:9-15.

Aha mirundi egi yoona, Yehova akahamya ngu abo abaabaire nibamusherura baatunga omugisha gw’okumumanya. Ni baahi abarikuza omu maka g’abantu n’omu myanya erimu abantu baingi kubabuurira ebirikukwata ahari Ruhanga? Baingi nibagarukamu ekibuuzo ekyo ngu “n’Abajurizi ba Yehova.” Yebuuze oti: ‘Ruhanga takaaba ariyo naabakoresa kumpwera kugira omukago nawe?’ Nitukuhiga kushaba Ruhanga kukuhwera kwikiriza ngu akweyirize haihi.a