EBIBUUZO EBI BAIBULI ERIKUGARUKAMU

Ediini zoona nizihimbisa Ruhanga?

Ku orikuhurikiza amakuru kuruga omu nsi yoona, obumwe noohurira ngu ebintu bibi nibikorwa omu iziina ry’ediini. Ti diini zoona ngu nizishemeza Ruhanga ow’amazima. (Matayo 7:15) Buzima, abantu baingi babeihwabeihirwe.​—Shoma 1 Yohaana 5:19.

Kwonka n’obu kiraabe kiri kityo, Ruhanga naareeba abantu abacureezi abarikukunda amazima. (Yohaana 4:23) Ruhanga naahiga abantu nk’abo kwega amazima agari omu Kigambo kye Baibuli.​—Shoma 1 Timoseo 2:3-5.

Noobaasa kumanya ota ediini ey’amazima?

Yehova Ruhanga naarundaana abantu kuruga omu madiini gatari gamwe n’agamwe arikubeegyesa amazima hamwe n’okukundana. (Miika 4:2, 3) N’ahabw’ekyo, noobaasa kumanya abo abari omu diini ey’amazima kurugiirira aha muringo ogu barikutwarizanamu.​—Shoma Yohaana 13:35.

Baibuli niyo erikuhwera abari omu diini ey’amazima kumanya ebi baine kwikiriza n’oku bashemereire kutwaza. (2 Timoseo 3:16) Kandi nibaha ekitiinisa eiziina rya Ruhanga. (Zaaburi 83:18) Ekindi nibagambira abantu ngu Obukama bwa Ruhanga nibwo bwonka oburaiheho oburemeezi bwabo. (Danieli 2:44) Nibatooreza Yesu ‘bajwisa omushana’ gwabo barikukorera abataahi ebirungi. (Matayo 5:16) N’ahabw’ekyo, Abakristaayo ab’amazima nibamanywa ahabw’okutaayaayira abataahi omu maka gaabo baine ekigyendererwa ky’okubabuurira amakuru marungi g’Obukama bwa Ruhanga.​—Shoma Matayo 24:14; Ebyakozirwe 5:42; 20:20.