Nimwija Kuba “Obukama bw’Abanyamurwa”

1, 2. Ahabw’enki oruzaaro rw’omukazi rwabaire rwine kurindwa?

OBUNABI bw’okubanza omu Baibuli ni bukuru omu kuhikiiriza ekigyendererwa kya Yehova. Ruhanga arikugamba okuraganisa kw’omuri Edeni, akagira ati: “Ndyata obuzigu ahagati yaawe [Sitaane] n’ogu mukazi, n’ahagati y’oruzaaro rwawe n’orwe.” Obuzigu obu bukaba nibwija kwingana ki? “Orwe [oruzaaro rw’omukazi] ruryakuteera omutwe, [Sitaane] naiwe oryaruteera ekitsintsiino.” (Kut. 3:15) Obuzigu ahagati y’enjoka n’omukazi bukaba nibwija kuba obw’amaani, ahakuba Omuregi akaba naija kukoresa amaani ge goona kucwekyereza oruzaaro rw’omukazi.

² Tikirikutangaaza kureeba ngu omuhandiiki wa Zaaburi akashaba Ruhanga aha bikwatiraine n’abantu be abatoorainwe ati: “Abazigu baawe bajagaraire, n’abarikukwanga abaimukize emitwe nibeekunika. Bacumiire abantu baawe enaama mbi, nibahanuura hamwe kukora kubi abu waasherekire. Nibagira bati: Nimwije tubamareho, barekye kuba eihanga.” (Zab. 83:2-4) Obukomooko bw’oruzaaro rw’omukazi bukaba bwine kurindwa kugira ngu rutacwekyerezibwa kandi rukashiishwa. Kubaasa kuhikiiriza eki, Yehova akakora endagaano ezindi ezi: Endagaano y’ebiragiro, endagaano ensya, n’endagaano y’Obukama.

ENDAGAANO Y’OKURINDA ORUZAARO

3, 4. (a) Endagaano y’ebiragiro ekatandika kukora ryari, kandi eihanga rya Israeli rikaikiriza kukora ki? (b) Endagaano y’ebiragiro ekateebwaho kurinda ki?

³ Abo abaakomookire omuri Abrahamu, Isaaka, na Yakobo ku baakanyire, Yehova akabaihamu ihanga rya Israeli eya ira. Yehova akakora nabo endagaano kurabira omuri Musa arikubaha ebiragiro, kandi Abaisraeli baikiriza obushonshorekye bw’endagaano egyo. Baibuli neegira eti: “[Musa] yaakwata ekitabo ky’endagaano, yaakishomera abantu; nabo baagarukamu bati: Byona ebi MUKAMA yaagamba nitwija kuguma nitubikora, kandi tubyorobere. Musa yaatwara eshagama [y’ebitambo by’ente] yaagimiisiira abantu, naagira ati: Mureebe eshagama y’endagaano, ei MUKAMA yaaragaana naimwe, nk’ebigambo ebyo byona oku biri.”​—Kur. 24:3-8.

⁴ Endagaano y’Ebiragiro ekatandika kukora aha Rushozi Sinai omuri 1513 Yesu atakazairwe. Kurabira omu ndagaano egyo, Ruhanga akatoorana Israeli kuba eihanga eritoorainwe. Yehova akaba ‘omuramuzi waabo, omutegyeki waabo, kandi Omugabe waabo.’ (Isa. 33:22) Ebyahikire aha Baisraeli nibyoreka ekirikubaho emitindo ya Ruhanga erikwera yaakuratirwa nari yaaba etakuratiirwe. Obu Ebiragiro byabaire nibizibira Abaisraeli kushwerana n’abakaafiire n’okwejumba omu kuramya kw’ebishuba, entebeekanisa egi ekaba eteirweho kurinda baijukuru ba Abrahamu kutashiishwa.​—Kur. 20:4-6; 34:12-16.

5. (a) Abaisraeli bakaba baine mugisha ki ahabw’endagaano y’Ebiragiro? (b) Ahabw’enki Ruhanga yaayangire eihanga rya Israeli?

⁵ Kandi endagaano y’ebiragiro ekabaasisa entebeekanisa y’abanyamurwa kubaho, eyaabaire neeyoreka ebirikwija kubaho omu biro by’omumaisho. (Heb. 7:11; 10:1) Buzima, kurabira omu ndagaano egyo, eihanga rya Israeli rikaba riine omugisha gw’omutaano ogw’okuba “obukama bw’abanyamurwa,” ku ogire ngu rikoorobera ebiragiro bya Yehova. (Shoma Okuruga 19:5, 6.) Kwonka, eihanga eryo rikahika ryaremwa kubyorobera. Omu mwanya gw’okushemererwa ahabw’okwija kwa Mesia, oruzaaro orukuru orwa Abrahamu, eihanga eryo rikamwanga. Ekyarugiremu, Ruhanga nawe akanga eihanga rya Israeli.

6. Ebiragiro bikahikiiriza ki?

⁶ Abaisraeli okutaguma bari abeesigwa ahari Yehova, kandi okutarugamu abanyamurwa, kikaba kitarikumanyisa ngu Ebiragiro biremirwe. Ebiragiro bikaba biri eby’okurinda oruzaaro n’okuhitsya abantu ahari Mesia. Kristo ku yaizire kandi akamanywa, ebiragiro bikahikiirizibwa. Baibuli neegira ngu “omuri Kristo nimwo ebiragiro bihikiiririzibwa.” (Rom. 10:4) Kwonka twine kwebuuza tuti: Ni baahi abaabaire nibaija kutunga omugisha gw’okuba obukama bw’abanyamurwa? Yehova Ruhanga akakora endiijo ndagaano kubaasa kutandikaho eihanga risya.

EIHANGA RISYA KUTANDIKAHO

7. Niki eki Yehova yaarangire kurabira omuri Yeremia aha bikwatiraine n’endagaano ensya?

⁷ Ira munonga endagaano y’ebiragiro etakahwaireho, Yehova kurabira omuri nabi Yeremia akaranga ngu akaba naija kuragaana “endagaano nsya” n’eihanga rya Israeli. (Shoma Yeremia 31:31-33.) Endagaano egyo ekaba neija kutaana aha ndagaano y’ebiragiro, ahabw’okugira ngu ekaba neija kubaasisa abantu kusaasirwa ebibi byabo batahaireyo bitambo by’enyamaishwa. Mu muringo ki?

8, 9. (a) Eshagama ya Yesu eyaasheeshekire neebaasisa ki? (b) Abari omu ndagaano ensya bakaheebwa mugisha ki? (Reeba ekishushani aha kutandika.)

⁸ Bwanyima y’ebyasha bingi, Yesu akatandikaho Ekiihuro kya Mukama waitu ahari Nisani 14, 33. Yesu arikugamba aha kikopo kya viinyo, akagambira entumwa ze 11 abeesigwa ati: “Ekikopo eki niyo ndagaano ensya ehamibwa eshagama yangye, esheesheka ahabwanyu.” (Luk. 22:20) Ebiri omu Kitabo kya Matayo nibyoreka ngu Yesu akagamba aha viinyo ati: “Egi n’eshagama yangye ey’endagaano ensya, esheesheka ahabwa baingi, ngu basaasirwe ebibi.”​—Mat. 26:27, 28.

⁹ Eshagama ya Yesu eyaasheeshekire niyo erikubaasisa endagaano ensya kuba ehikire. Kandi eshagama egyo neebaasisa n’omuntu kusaasirirwa kimwe ebibi bye. Yesu tari omwe aha bari omu ndagaano ensya. Ahabw’okugira ngu taine kibi, tikirikumwetengyesa kusaasirwa. Kwonka Ruhanga akaba naabaasa kusaasira baijukuru ba Adamu arikwihirira aha shagama ya Yesu eyaasheeshekire. Kandi akaba naabaasa kwakiira abantu abeesigwa kuba “abaana” be arikubashukaho omwoyo gurikwera. (Shoma Abarooma 8:14-17.) Ahabw’okureebwa nka bataine kibi omu maisho ga Ruhanga, bakaabaire nka Yesu omwana wa Ruhanga otaine kibi. Abashukirweho amajuta aba nibaija kuhungura “hamwe na Kristo” batungye omugisha gw’okuba ‘abanyamurwa b’obukama.’ Ogu nigwo mugisha ogu Abaisraeli baabaire nibaija kutunga barikutegyekwa ebiragiro. Entumwa Petero akagamba ahari abo abaraahungure “hamwe na Kristo” ati: “Imwe muri oruganda orutoorainwe, n’abanyamurwa b’obukama, eihanga eririkwera, abantu abu Ruhanga yaayetooraniire, ngu mubone kworeka oburungi bw’Owaabeetsire okuruga omu mwirima, okutaaha omu mushana gwe ogurikutangaaza.” (1 Pet. 2:9) Endagaano ensya ka ni nkuru munonga! Neebaasisa abeegi ba Yesu kuba bamwe aha b’oruzaaro rwa Abrahamu.

ENDAGAANO ENSYA KUTANDIKA KUKORA

10. Endagaano ensya ekatandika kukora ryari, kandi obwire obwo butakahikire ahabw’enki yaabaire etakatandikire kukora?

¹⁰ Endagaano ensya ekatandika kukora ryari? Teratandikire kukora obu Yesu yaagigambaho aha kiro ekyahereerukireyo ari omu nsi. Kubaasa kutandika kukora, eshagama ya Yesu ekaba eine kubanza kusheesheka, kandi omuhendo gwayo gukatwarwa omu iguru omu maisho ga Yehova. Kandi, abo abaabaire nibaija kuhungura “hamwe na Kristo” bakaba baine kubanza kushukwaho omwoyo gurikwera. N’ahabw’ekyo, endagaano ensya ekatandika kukora omu gwa 33 ahari Pentekoote obu abeegi ba Yesu abeesigwa baashukwaho omwoyo gurikwera.

11. Endagaano ensya ekabaasisa eta Abayudaaya n’Abanyamahanga kuba bamwe aha Israeli ey’omwoyo, kandi ni bangahi abaakubaire omu ndagaano egyo?

¹¹ Endagaano y’Ebiragiro ‘ekahanguura’ obu Yehova yaaranga kurabira omu Yeremia ngu akaba naija kuragaana endagaano ensya n’eihanga rya Israeli, kwonka terahwaireho okuhitsya obu endagaano ensya yaatandika kukora. (Heb. 8:13) Bwanyima y’ekyo kubaho, Ruhanga akaba naabaasa kureeba Abayudaaya n’Abanyamahanga abatashazirwe abaikiriza, nk’abarikushushana ahabw’okugira ngu “okusharwa okw’omu mutima okw’omu mwoyo, kutari kw’omu bihandiiko” nikwo kwabaire nikwetengyesa. (Rom. 2:29) Ruhanga ku yaakozire nabo endagaano nsya, akata ebiragiro ‘omu bwengye bwabo, kandi aha mitima yaabo niho yaabihandiikire.’ (Heb. 8:10) Abari omu ndagaano ensya bakaba nibaija kuhika 144,000, bakore eihanga erisya, nibo “Baisraeli ba Ruhanga” nari Israeli ey’omwoyo.​—Gal. 6:16; Kush. 14:1, 4.

12. Nitubaasa kugyeragyeranisa tuta endagaano y’ebiragiro hamwe n’endagaano ensya?

¹² Nikugyeragyeranisa ki okuri ahagati y’endagaano y’ebiragiro hamwe n’endagaano ensya? Endagaano y’ebiragiro ekaba erimu Yehova hamwe n’eihanga rya Israeli, kandi endagaano ensya erimu Yehova na Israeli ey’omwoyo. Musa niwe yaabaire ari Omuhikaanisa omu ndagaano y’ebiragiro, kandi Yesu niwe Muhikaanisa omu ndagaano ensya. Eshagama y’enyamaishwa niyo yaabaire ehamya endagaano y’ebiragiro, kandi endagaano ensya neehamibwa eshagama ya Yesu eyaasheeshekire. Eihanga rya Israeli rikaba niryebemberwa Musa kurabira omu ndagaano y’ebiragiro, kwonka abo abari omu ndagaano ensya nibeebemberwa Yesu Omutwe gw’ekibiina.​—Efe. 1:22.

13, 14. (a) Endagaano ensya eine kakwate ki n’Obukama? (b) Niki ekirikwetengyesa kubaasisa abari omu Israeli ey’omwoyo kutegyeka na Kristo omu iguru?

¹³ Endagaano ensya eine akakwate n’Obukama ahabw’okugira ngu neebaasisa eihanga eririkwera kubaho, eriine omugisha gw’okuba abagabe kandi abanyamurwa omu Bukama bw’omu iguru. Eihanga eryo nirikomookamu bamwe aha bari omu ruzaaro rwa Abrahamu. (Gal. 3:29) N’ahabw’ekyo, endagaano ensya neehamya ngu endagaano ei Ruhanga yaaragaine na Abrahamu neija kuhikiirira.

¹⁴ Endagaano ensya neekomookamu Israeli ey’omwoyo kandi ebaasisa abari omu ihanga eryo kuba abahunguzi “hamwe na Kristo.” Kwonka, hakaba niheetengyesa entebeekanisa endiijo kubaasisa abari omu Israeli ey’omwoyo kwegaita ahari Yesu omu Bukama bwe omu iguru nk’abagabe kandi abanyamurwa.

ENDAGAANO ERIKUBAASISA ABANDI KUTEGYEKA NA KRISTO

15. Ni ndagaano ki ei Yesu yaakozire n’entumwa ze abeesigwa?

¹⁵ Yesu bwanyima y’okutandikaho Ekiihuro kya Mukama waitu, akakora endagaano n’abeegi be abeesigwa, kandi endagaano egyo neekira kwetwa endagaano y’Obukama. (Luk. 22:28-30) Okutashushana n’endagaano ezindi ezirimu Yehova, endagaano egi erimu Yesu n’abakuratsi be abashukirweho amajuta. Yesu okugira ngu, “nk’oku Tata yaakozire naanye endagaano,” (NW) akaba naamanyisa endagaano ei Yehova yaaragaine nawe kuba “Omunyamurwa w’ebiro byona, omu muringo gwa Melikizedeki.”​—Heb. 5:5, 6.

16. Endagaano y’Obukama neebaasisa ki aha bikwatiraine n’abashukirweho amajuta?

¹⁶ Entumwa 11 abeesigwa bakaba ‘baagumisiriize na Yesu omu kugyezibwa kwe.’ Endagaano y’Obukama ekabahamiza ngu bakaba nibaija kuba nawe omu iguru, bashutame aha bitebe kutegyeka nk’abagabe kandi baheereze nk’abanyamurwa. Kwonka abo 11 tibo bonka abaabaire nibaija kutunga omugisha ogwo. Yesu ari omu iguru akeeyoreka entumwa Yohaana yaamugira ati: “Orikusingura, ndyamwikiriza kushutama aha kitebe kyangye ky’obukama, nkaanye oku naasingwire, nkashutama hamwe na Tata aha kitebe ky’obukama bwe.” (Kush. 3:21) N’ahabw’ekyo, endagaano y’Obukama erimu Abakristaayo 144,000 abashukirweho amajuta. (Kush. 5:9, 10; 7:4) Egi niyo ndagaano erikubahamya ngu bahikire kutegyeka na Yesu omu iguru. Eki nikibaasa kugyeragyeranisibwa n’omugore otoorainwe kushwerwa omugabe, reero nawe akatunga omugisha gw’okuba omutegyeki. Kandi kwo buzima, Ebyahandiikirwe nibigamba aha bashukirweho amajuta ‘nk’omugore’ wa Kristo, nari “nk’omwishiki oshugaine” orikuza kushwerwa Kristo.​—Kush. 19:7, 8; 21:9; 2 Kor. 11:2.

GIRA OKWIKIRIZA OMU BUKAMA

17, 18. (a) Gamba endagaano mukaaga ezi twareeba eziine akakwate n’Obukama. (b) Ahabw’enki turikubaasa kugira okwikiriza kuhami omu Bukama?

¹⁷ Endagaano zoona ezi twareeba omu kicweka eki n’eky’enyima ziine akakwate n’Obukama. (Reeba akabokisi “Oku Ruhanga Araahikiirize Ekigyendererwa Kye.”) Eki nikihamya ngu entebeekanisa y’Obukama neeyegamira aha ndagaano. N’ahabw’ekyo, twine enshonga zihikire kwesigira kimwe Obukama oburikutegyekwa Mesia, ahakuba Ruhanga naabukoresa kuhikiiriza ekigyendererwa kye eky’okubanza ahabw’ensi n’abantu.​—Kush. 11:15.

¹⁸ Mbwenu shi haine orikubaasa kubangaanisa yaaba Obukama buraareete emigisha ey’ebiro byona? Turikuhamiza kimwe, nitubaasa kumanyisa abandi ngu Obukama bwa Ruhanga nibwo buraamareho oburemeezi bw’abantu ebiro byona. Ka tuteereho kubuurira abandi amazima aga twine obweziriki!​—Mat. 24:14.