Ni mazima ki agarikukwata ahari Noiri?

Abantu nyamwingi omu nsi yoona nibakuza Noiri ahabw’enshonga zitarikushushana. Abamwe nibwo barikutunga obwire bw’okuba n’abanywani baabo n’ab’omu maka gaabo. Abandi nibwo barikuteekateeka ahari Ruhanga nari nibwo barikutunga obwire bw’okuhwera abooro n’abakyene. Ebikorwa ebi ahabwabyo ti bibi. Kwonka, ebikorwa birungi ebi byakorwa omu bwire bwa Noiri, nibigira akakwate nayo.

Enshonga y’okubanza, abantu baingi abarikukuza Noiri nibateekateeka ngu nibwo obu Yesu yaazaarwa. Kwonka, ab’ebyafaayo nibaikirizana ngu obu Yesu yaazaarwa tiburikumanywa. The Christian Book of Why nikigira ngu “Abakristaayo aba ira bakanga kutaho eizooba kworeka ngu niryo Yesu yaazaariirweho” ahabw’okugira ngu bakaba nibenda “kwetantara emigyenzo y’ekikaafiire.” Kandi, Baibuli terikworeka ngu Yesu akakuza okuzaarwa kwe, nari okw’ondiijo muntu. Okutaana n’ekyo, akaragiira abakuratsi be kwijuka okufa kwe.​—Luka 22:19.

Eya kabiri, abacondooza baingi nibaikiriza ngu ebirikukorwa aha Noiri nibikomooka omu bakaafiire. Ebi nibitwariramu okubyara omuti gwa Noiri, okuhaana ebiconco, okuhemba zaakanduro, okuhunda enju, okuteera ebyeshongoro bya Noiri, n’ebindi. Aha bikwatiraine n’emigyenzo egi emwe, ekitabo The Externals of the Catholic Church nikigira kiti: “Ku turikuha abandi ebiconco nari bo bakabituha, tukahunda enju zaitu n’amakanisa, ni bangahi ahariitwe abarikumanya ngu nitubaasa kuba nitukuza emikoro y’abakaafiire?”

Obundi noobaasa kuba nooyebuuza yaaba kiri kibi kukuratira emigyenzo egi erikureebeka nk’etaine nshonga. Enshonga ya kashatu egi neeha eky’okugarukamu. Ruhanga tarikusiima okujwanzya emigyenzo y’ekikaafiire n’okuramya okw’amazima. Kurabira omu nabi Amosi, Yehova Ruhanga akagambira Abaisraeli aba ira abaabaire bahabire ati: ‘Nyanga amagyenyi gaanyu, ningagaya . . . Nimuunyiheho orwari rw’ebyeshongoro byanyu.’​—Amosi 5:21, 23.

Ahabw’enki yaabagambiire ebigambo by’amaani ebyo? Yetegyereze eki abantu ab’obugabe obw’obukiizi-bwa-bumosho aba ira baabaire nibakora. Omugabe waabo w’okubanza Yeroboamu akata ebishushani by’enyana omu rurembo rwa Dani na Beseeli, kandi yaabeihabeiha abantu kubiramya omu mwanya gw’okuramya gye Yehova Ruhanga omu hekalu omuri Yerusaalemu. Kandi omugabe ogwo akataho amagyenyi yaataho n’abanyamurwa kuhwera abantu kukuza amagyenyi ago.​—1 Abagabe 12:26-33.

Eki Abaisraeli baakozire kikaba nikireebeka nka kirungi. Ahakuba ebi byona bakaba nibabikora barikuteekateeka ngu nibaramya Ruhanga kandi ngu nibenda kumushemeza. Ebigambo bya Ruhanga kurabira omuri nabi Amosi na baanabi abandi, bikaba nibyoreka gye oku Ruhanga yaayehuriire ahabw’ebikorwa ebyo. Kurabira omuri nabi Malaki, Ruhanga akagira ati: “Nyowe MUKAMA timpinduka.” (Malaki 3:6) Mbwenu shi ekyo tikirikutumanyisa oku Ruhanga arikwehurira aha bikwatiraine n’emikoro mingi eya Noiri obunaku obu?

Bwanyima y’okushwijuma enshonga ezo zoona eziri aharuguru, obukaikuru bw’abantu bacwiremu kutakuza Noiri. Omu mwanya gw’ekyo, nibatunga okumarwa n’okushemererwa barikuba hamwe na banywani baabo n’ab’omu maka gaabo kandi bahwera abooro n’abakyene obwire bwona omu mwaka.